O IEU organiza a presentación da Revista CAIRÓN en Monterroso o sábado 30 de outubro

O sábado 30 de outubro de 2021 ás 18,00 h, no salón de actos do Centro Sociocultural de Monterroso, terá lugar a presentación do quinto número da revista Cairón, Boletín do Instituto de Estudos Ulloáns

Na presentación, que está integrada na programación da Feira de Santos, intervirán Rocío Seijas, alcaldesa de Monterroso; o xornalista Daniel Salgado, director de Cairón; Francisco Pardo, director do IEU; o xornalista Fernando Salgado; e os poetas Martiño Maseda e José Carlos Ulloa.

Tamén haberá presentacións por outras localidades. Concretamente, en Palas de Rei será o domingo 7 de novembro pola mañá e en Antas de Ulla o sábado 13 de novembro pola tarde.

Lois Pérez gaña o V Premio Agustín Fernández Paz de Narrativa Infantil e Xuvenil pola Igualdade coa obra A GRUTA DA TORRE

O xurado do V Premio Agustín Fernández Paz de narrativa infantil e xuvenil pola Igualdade, convocado polo Instituto de Estudos Chairegos, o Concello de Vilalba e Edicións Xerais de Galicia, e formado por Iria Misa Peralba, Manuel Bragado Rodríguez e Xosé Lastra Muruais acordou por unanimidade, outorgar o V Premio Agustín Fernández Paz de narrativa infantil e xuvenil pola igualdade á obra titulada A GRUTA DA TORRE presentada baixo o lema ou seudónimo de UN PESO SEMPRE SE GASTOU. Unha vez aberta a plica, resultou ser o seu autor LOIS PÉREZ DÍAZ.
O xurado salienta da obra gañadora o interese da trama que se desenvolve no verán de 1990 en Ribadeo en espazos recoñecibles así como polo seu carácter como historia de formación protagonizada por un grupo diverso de rapaces e rapazas que emprenden unha viaxe de descuberta seguindo o fío das viaxes nos libros e na memoria. Escrita con mestría, empregando diversos recursos e rexistros, a novela mantén un pulso narrativo que non decae.

Velaquí a acta do xurado.

*Fotografía do Lois Pérez tomado do Centro de Documentación da AELG

*Autoría da fotografía: Distrito Xermar (2017)