MaríaSOA e Sara Faro alíanse de novo con Berto -produtor do seu LP Acrópole– para sorprender ao público co seu lado máis bailable e urbano, sen perder parte da súa esencia: a reivindicación, propia e colectiva, dos éxitos acadados e dos espazos conquistados. Tola -un tema anterior a Acrópole– mudou en varias ocasións, desde a súa concepción e até a súa publicación, ata acadar a edición final que se lanza este venres 28. O resultado, unha canción que se pode inserir no contexto do lecer nocturno e cun discurso do que se poden apropiar as mulleres, e cun retrouso no que salienta unha sentencia: “o perreo ata abaixo pero a autoestima no ceo”.
“Queriamos facer un tema distendido, cun ritmo bailable, e que puidese formar parte do ocio nocturno, un ambiente que moitas veces é hostil para as mulleres e que queremos sentir coma un espazo seguro”. Así, Tola parte da propia experiencia das autoras e de tantas mulleres que, en discotecas ou recintos vinculados ao ocio nocturno, sofren actuacións machistas. A letra, neste sentido, é explícita: “non te pegues tanto, non quero movida”, “non te raies tío, non. Perreo sola”, “impórtame unha merda que te boten fóra”.
“Con Tola o que pretendemos é reapropiarnos dese termo que moitas veces se emprega contra as mulleres. Nós o que queremos é bailar, ser rebeldes, gozar, perrear, estar soas, coas amigas, sen máis. Queremos que Tola motive e dea forzas ás mulleres a cantar, bailar e experimentar desde outro lugar”, apuntan María e Sara.
SOBRE FILLAS DE CASSANDRA
María Pérez (MaríaSOA) e Sara Faro son Fillas de Cassandra, creadoras e protagonistas dunha proposta rotunda, marcada por unha potente sonoridade capaz de chegar e conectar con todos os públicos, como así demostraron xa nos seus directos ao longo dos últimos meses. O dúo toma coma referencia o mito de Cassandra, muller á que se lle negou á voz, e lembran que elas son porque antes houbo quen loitou, quen deu vida. É así como nace Fillas de Cassandra. A voz, as percusións, o piano e os sintetizadores son os fíos cos que o dúo tece as súas composicións, que beben tanto da música e das coplas tradicionais coma da música clásica ou do pop, e que agroman dun xeito natural acompañadas dunhas contundentes bases electrónicas.
O pasado mes de febreiro publicaron nas principais plataformas dixitais Acrópole, un álbum conceptual no que Fillas de Cassandra viaxa polos textos clásicos para poñer en relación ás personaxes da mitoloxía grega co mundo actual, ao que devolven unha ollada feminista e contemporánea a través da música. O traballo, producido por Berto e publicado da man de Tremendo Audiovisual, fía a súa narración a través de oito relatos actuais que asocian ás figuras de Antígona, Cassandra, Dafne, Eco, Pandora, Syrinx ou mesmo Lisístrata.
Nas últimas semanas, nas que Fillas de Cassandra está a percorrer numerosos escenarios, o dúo sorprendeu ao público co lanzamento de dous novos temas: Tataravoa, unha muiñeira electrónica producida por Galician Army, e o seu novo sinxelo: Tola.
A Coruña convértese un ano máis na capital universal do mundo da banda deseñada para celebrar, do 7 ao 13 de agosto, a 26º edición desta mostra internacional de referencia, que presentou esta mañá un avance do seu programa
O ilustrador Manel Cráneo asina o cartel da cita este 2023, que contará con seis grandes exposicións, ademais de charlas, visitas, firmas de libros, proxeccións de cinema, música e obradoiros para profesionais e público infantil
O festival reunirá a figuras como Laura Pérez Vernetti, Alberto Vázquez, Teresa Radice, Stefano Turconi, Isa Feu, Marta Guerrero, Marika Vila ou Elisa McCausland, ademais das homenaxes a Calpurnio Pisón e Francisco Ibáñez
Viñetas desde o Atlántico poñerá, así mesmo, en valor o rico ecosistema autoral local coa mostras colectiva BD na Coruña que bonita é. Banda deseñada creada desde A Coruña, e contará coa súa xa clásica “Rúa da BD”, a feira que acolle a editoras e librarías de prestixio de toda España
A Coruña converterase un ano máis na capital universal do mundo do cómic para celebrar, do 7 ao 13 de agosto, a 26º edición da mostra internacional Viñetas desde o Atlántico. O ilustrador coruñés Manel Cráneo asina este 2023 o cartel desta cita de referencia, que contará con seis grandes exposicións, ademais de charlas, visitas, firmas de libros, proxeccións de cinema, música e obradoiros para profesionais e público infantil.
A alcaldesa da Coruña, Inés Rey, presentou esta mañá un avance da programación desta edición número 26 de Viñetas desde o Atlántico. “Será unha edición moi especial, pois tras un cuarto de século este festival toma un novo rumbo impulsado e organizado polo Concello da Coruña da man do sector do cómic coruñés, cunha programación exclusiva e de gran nivel internacional”, sinalou a rexedora. Nos vindeiros días desvelarase o programa completo da mostra.
As grandes pioneiras do cómic en España serán as protagonistas de Viñetas 2023. O festival reunirá a figuras como Laura Pérez Vernetti, Alberto Vázquez, Teresa Radice, Stefano Turconi, Isa Feu, Marta Guerrero, Marika Vila ou Elisa McCausland, ademais das homenaxes a Calpurnio Pisón e Francisco Ibáñez. Viñetas desde o Atlántico poñerá tamén en valor o rico ecosistema autoral local coa mostra colectiva BD na Coruña que bonita é. Banda deseñada creada desde A Coruña, e contará, así mesmo, coa súa xa clásica “Rúa da Banda Deseñada”, que acolle expositores de editoras e librarías de prestixio de toda España.
Este 2023, Viñetas desde o Atlántico propón unha edición que dá voz e presenza ás mulleres no mundo da banda deseñada. Unha edición que rende unha merecida homenaxe a figuras recentemente desaparecidas. Unha edición que abre xanelas ao mundo da animación, consciente, precisamente, do grandísimo traballo que se está a realizar desde A Coruña. Unha edición que busca a diversidade e que pon en valor as autorías locais, erixíndose como o paraugas que arroupa todo o que sucede na cidade ao redor deste rico xénero. Esta é, tamén, unha edición que busca aumentar a presenza do público infantil e familiar con accións participativas.
Nesta nova etapa, Viñetas propón un novo modelo de xestión -impulsado e organizado polo Concello da Coruña en colaboración co sector-, mantendo a aposta pola excelencia e abríndose a novas formas de facer e de mirar. É por iso que o seu protagonismo recae nas autorías locais -agrupadas nos colectivos Coruña Gráfica e Autobán- e nas autorías femininas, que teñen unha presenza maioritaria na cita.
Viñetas desde o Atlántico é tamén un espazo de promoción da cultura e das artes. Un festival de banda deseñada para celebrar a arte do xénero e aos grandes artistas locais, nacionais e internacionais. Unha plataforma para promover e difundir a cultura na cidade, creando un ambiente vibrante e diverso, con actividades infantís e profesionais e coa súa xa clásica “Rúa da BD”, que reúne a editoras e librerías de prestixio de toda España. Como novidade, Viñetas sumará este ano a música e o cinema ao seu cartel, cun concerto ilustrado e unha coidada serie de proxeccións cinematográficas. En definitiva, máis dun centenar de exposicións, charlas, visitas, firmas de libros, proxeccións de cinema, música e talleres converterán de novo A Coruña na capital universal do cómic este mes de agosto.
SEIS GRANDES EXPOSICIÓNS CONFORMAN O CORAZÓN DE VIÑETAS NESTE 2023
Un ano máis, o Kiosco Alfonso será o corazón expositivo de Viñetas desde o Atlántico. A esta sala municipal súmanse outras como PALEXCO, o Palacio Municipal, A Casa Museo Picasso ou Casa Cultura de Salvador de Madariaga. Todas as exposicións estenderanse no tempo máis aló da celebración da propia feira, desde o 7 de agosto até o 10 de setembro.
Na Sala de Exposicións de PALEXCO o público poderá visitar dúas mostras das que este novo Viñetas está especialmente orgulloso: a primeira homenaxe expositiva ao recentemente finado Calpurnio, universalmente coñecido como o autor de El bueno de Cuttlas, a tira cómica que durante anos ilustrou El País Semanal. A exposición Homenaxe a Calpurnio componse de preto de 200 orixinais, ademais dun centenar de obxectos de culto, como libros, cómics, portadas de discos e secuencias das súas películas.
A segunda exposición da que poderemos gozar en PALEXCO exemplifica a evolución de Viñetas como plataforma que integra novas linguaxes e que aposta polo talento local: Alberto Vázquez: do cómic á animación é unha oportunidade única para mergullarse no universo artístico deste multipremiado creador coruñés -gañador do Goya en 2023 pola súa longametraxe de animación Unicorn Wars– e a súa riquísima imaxinación, a través de orixinais das súas bandas deseñadas e detalles dos seus procesos de animación.
O Palacio Municipal expoñerá por primeira vez na Coruña o traballo dos italianos Teresa Radice e Stefano Turconi, considerados como dous dos autores máis relevantes no panorama europeo da Novena Arte. A exposición Las chicas del Pillar. Poniendo rumbo a nuevas aventuras: cómo nace una historia de cómic propón un discurso expositivo continuo, artístico e didáctico, que mostra, mediante orixinais, o proceso creativo dun dos cómics máis celebrados dos creadores: Las chicas del Pillar.
Inmersos aínda na celebración do Ano Picasso, a súa casa museo na Coruña súmase á celebración de Viñetas desde o Atlántico e acollerá unha exposición de poesía gráfica de Laura Pérez Vernetti, considerada como unha das mellores historietistas españolas, gañadora en 2018 do Gran Premio do Salón del Cómic de Barcelona. Con ela, Viñetas ábrese a un dos xéneros máis novos do cómic actual, a poesía gráfica, coa exposición VIVE LA VIDA e outras poesías gráficas de Luis Alberto de Cuenca. Por Laura Pérez Vernetti, un traballo sobresaliente e dunha sensibilidade única, coa que a artista capta o universo interior dun dos nosos máis lúcidos creadores literarios.
Mención especial merece a mostra chegada do Museo Nacional Centro de Arte Reina Sofía Mujercitas del mundo, ¡uníos! Pioneras del cómic underground adulto, que descobre o traballo das grandes pioneiras do cómic en España, desde a Transición ata a actualidade, con nomes tan significativos como os de Núria Pompeia, Rosa Lleida, Sara Presutto, Montse Clavé, Isa Feu, Mariel Soria, Marika Vila e Laura Pérez Vernetti , entre moitas outras autoras imprescindibles.
Na cita non faltará tampouco un vivo escaparate do panorama actual da historieta na cidade, cunha exposición que abre unha nova liña de traballo para Viñetas: BD na Coruña que bonita é. Banda deseñada creada desde A Coruña, comisariada por Manel Cráneo -autor do cartel desta 26º edición da mostra-. A través dos orixinais de 25 autores e autoras locais, a exposición é unha fotografía que ensina unha instantánea diversa e variada en técnicas e estilos e que poñe en valor unha riquísima escena local da que podemos presumir con orgullo.
IBÁÑEZ EN VIÑETAS DESDE O ATLÁNTICO 2023
O recentemente finado Francisco Ibáñez, historietista de referencia e autor de personaxes fundamentais da cultura popular española da Transición, visitou Viñetas desde o Atlántico na súa primeira edición, hai hoxe 26 anos. Foi entón, en agosto de 1998, cando A Coruña acolleu unha exposición en homenaxe á súa figura polo 40 aniversario de Mortadelo e Filemón.
Viñetas desde o Atlántico 2023 non pode pasar por alto esta triste perda e, en recordo de Ibáñez, incluirá un punto continuado de lectura das súas obras, situado no edificio principal da feira, o Kiosco Alfonso, e, tamén, nas Bibliotecas Municipais da cidade. Velaquí unha proposta para que todos los públicos poidan achegarse ou reconectar coa súa figura e a súa obra a través de icónicos títulos e personaxes xa inmortais no imaxinario da banda deseñada universal.
26 ANOS DUNHA CITA INTERNACIONAL DE REFERENCIA
Viñetas desde o Atlántico é o festival internacional da banda deseñada da cidade da Coruña. Organizado pola Concellaría de Cultura do Concello da Coruña, cada mes de agosto reúne unha coidada selección de exposicións, artistas invitados, charlas, talleres, visitas guiadas, firmas, actividades paralelas e unha feira cos expositores profesionais máis relevantes do sector, que converten A Coruña nun fervedoiro de creatividade e nun punto de encontro para amantes da banda deseñada en todas as súas acepcións e singularidades.
Con máis dun cuarto de século ás súas costas, Viñetas desde o Atlántico é unha cita de referencia a nivel internacional para o público e os profesionais, que este 2023 celebra a súa 26ª edición do 7 ao 13 de agosto. Co empeño de ofrecer unha visión o máis ampla posible do mundo da banda deseñada galego, nacional e internacional, Viñetas desde o Atlántico regresa á Coruña cun novo rumbo, como un proxecto de cidade, arroupado polo sector profesional e cunha vocación de apertura a novas linguaxes, referentes e miradas.
A nova edición de Viñetas desde o Atlántico quere ser unha reflexión colectiva orquestrada xunto ao sector do cómic da cidade. Deste xeito, este 2023, a cita aposta pola posta en valor do rico ecosistema autoral e editorial local, buscando, así mesmo, sinerxias con institucións de referencia a nivel europeo e sen esquecer, tampouco, dun dos seus grandes valores e signos de identidade: a internacionalización. Tras 25 anos de historia, Viñetas continuará a ser, ademais, a punta de lanza no mes de agosto do xénero a nivel nacional, como un dos seus grandes referentes. Porque A Coruña é, sen lugar a dúbidas, unha cidade de cómic.
O CARTEL DE VIÑETAS 2023: “VOLTOU O XERIÓN”
O ilustrador coruñés Manel Cráneo -un dos más veteranos e celebrados autores galegos, fundador de Demo Editorial e impulsor de Coruña Gráfica e AGPI, entre outras valiosas iniciativas sectoriais- asina un cartel que ten, como xa é tradición, á Torre de Hércules como protagonista. A súa ilustración inspírase no Xigante Xerión, que voltou á Coruña e secuestrou os elementos máis importantes do mundo da banda deseñada na Torre. O gran heroe Hércules, armado cun lapis espada e un escudo en forma de páxina de BD, disponse a derrocar ao malvado xigante e liberar os elementos narrativos do cómic, para que A Coruña goce un ano máis de todas as marabillas que este xénero ofrece en Viñetas desde o Atlántico.
Este exercicio de metalinguaxe converte aos personaxes históricos coruñeses en personaxes de historieta e rende homenaxe á linguaxe propia da banda deseñada. O cartel é tamén unha chamada á supervivencia e á resistencia dun evento internacional que cumpre 26 anos de existencia impulsado polo Concello da Coruña e que nesta nova edición conta co apoio e a participación do sector profesional local.
Acéndense os versos que aínda me habitan e non son quen de agarralos. Soños vagalume na noite das silveiras. Agochado brillo da esperanza. Teño no bico un bico desprendido. Teño no peito as acrobacias do felgo. Na boca, un murmurio que asoma aos beizos e te procura. Agroma na humidade. Semella próximo a estoupar e, porén, non é quen de se falar. Non son quen de pronunciarme en ti. E non sei onde pousar esta sensación que renxe na saliva do silencio, afundida na barafunda da túa ausencia.
A sétima edición do WOS Festival x SON Estrella Galicia, que se celebrará endiferentes espazos únicos e extraordinarios de Santiago de Compostela entre o 14 e o 17 de setembro, reunirá a artistas de todo o mundo proclamándose como un dos festivais de refencia en Europa polasúa programación arriscada e de vangarda.
Unha das actuacións para destacar é a de Midori Takada: Japan on Film. Trátase da estrea mundialdo novo espectáculo da compositora xaponesa de 71 anos e unha lenda para o público afeccionadoda música ambient, que conta co apoio da Fundación Japón de España e do British Film Institute (BFI),do Reino Unido.
Outro dos momentos destacados desta edición serán, sen dúbida, as sesións de electrónica de bailea cargo de dous pesos pesados: Le Gamble (DJ set) e DjRUM. Meticulosos e impresionistas, as súasviaxes sonoras son navegables territorios onde conflúen o dubstep, o jungle, breaks, o hip-hop e otechno.
Loraine James (AV/AV) tampouco podía faltar nesta edición. Se o pasado foi o ano da súaconsagración, en 2023 a produtora londinense mantén o pulso coa súa música-alegación en pos dunecosistema sonoro aberto e inclusivo. Cun set minimalista, no festival veremos o seu novo espectáculoaudiovisual: apenas días despois, estrea disco no selo de Steve Goodman aka Kode9, Hyperdub,onde comparte casa con Burial, Jessie Lanza ou aya.
A escena musical europea de hoxe sería menos interesante sen o selo danés Posh Isolation, do queLoke Rahbek aka Croatian Amor é o seu mellor embaixador. Disruptivo, por intres melancólico, sempreconmovedor, Croatian Amor presentará novo traballo, A Part Of You Is Everything (2023). Xunto aRahbek, alguén que tamén sabe de paisaxes evocadoras é a francesa Barbara Braccini, máis coñecidacomo Malibu. Ninguén mellor ca ela para un set de vogais híper dimensionados e texturas etéreas.
Santiago de Compostela será tamén a cidade onde se estree, por primeira vez en España, un concertocomisariado por Berlin Atonal. Shackleton & Zimpel con Siddartha Belmannu e Pedro Maia presentaránIn The Cell Of Dreams. O dúo formado por Sam Shackleton e Waclaw Zimpel únese a un dos maiorestalentos vocais emerxentes da música carnática india, Siddhartha Belmannu para un concertoaudiovisual xunto a Pedro Maia.
Tamén hai espazo para o descubrimento. A produtora e Dj filipino-australiana CORIN desvelará nestenovo live A/V show o disco que acaba de lanzar, Lux Aeterna (UIQ, 2023), inspirado en, nadamenos, o compositor György Ligeti. Rizhomes é o espectáculo audiovisual que estrearán en Españadentro do WOS 2023 dous dos nomes máis prometedores da escena avanzada actual, Aho Ssan,recente Prix Ars Electronica 2023 Dixital Musics & Sound Art, e Sevi Iko Dømochevsky, habitualcolaborador de Grimes, Arca ou Holly Herndon, entre outros.
Puce Mary, Lamin Fofana (SCI-FI & FANTASY, NTS Radio), e Slikback & Weirdcore, presentando VOID,curado por Unsound, comisionado por Rewire, donaufestival e Unsound, son outros dos artistasanunciados. Representando á escena local, estarán Akazie e JUAIT.
Como novidade, en 2023 o festival estrea en exclusiva para a súa sétima edición un novo espazo,Fundación Laboral da Construción, cuxas naves acollerán a programación de noite na xornada dosábado 16 de setembro.
Os abonos de 4 días (Long-Weekend) e os de 3 días (Weekend), xa están á venda a través de wosfestival.es.
WOS Festival x SON Estrella Galicia é un evento anual con sede en Santiago de Compostela dedicadoa promover e fomentar a música e a cultura vangarda con concertos e actividades en diferentes espazosde alto valor patrimonial da cidade. O festival recibiu ao longo dos anos varios recoñecementos queindoors a e Europa. Máis información en wosfestival.es.
Este encontro multidisciplinar é unha iniciativa da produtora compostelá WORK ON SUNDAY, queconta con SON Estrella Galicia como patrocinador principal, ademais do apoio doutras instituciónscomo Xunta de Galicia, a través da Axencia Turismo de Galicia e da Agadic, Concello de Santiagode Compostela, Deputación provincial da Coruña e Fundación Japón.
O Pazo da Cultura de Carballo acollerá a residencia artística da creadora, que forma parte do programa Residencias Paraíso 2023, impulsado polo colectivo RPM e que conta coa colaboración da Concellaría de Cultura do Concello de Carballo,desde este luns 17 e até o domingo 30 de xullo
No seu proceso, Pampyn rende homenaxe ao traballo das intérpretes da danza, observando, cuestionando e poñendo en valor as posicións que as bailarinas ocupan nos marcos de traballo contemporáneos
A bailarina e creadora madrileña Clara Pampyn trae o seu proceso de investigación, mediación e creación Las bailarinas no tocan el cielo ao Pazo da Cultura de Carballo. A residencia artística da artista comezou este luns, día 17, e estenderase até o vindeiro 30 de xullo. No proceso, que forma parte do programa Residencias Paraíso 2023, impulsado polo colectivo RPM e que conta coa colaboración da Concellaría de Cultura do Concello de Carballo, Pampyn rende homenaxe ao traballo das intérpretes da danza, observando, cuestionando e poñendo en valor as posicións que as bailarinas ocupan nos marcos de traballo contemporáneos. Este proxecto terá unha apertura pública no marco do 32ª Festival Internacional Outono de Teatro – FIOT en outubro.
Las bailarinas no tocan el cielo traballa sobre a figura da intérprete en danza ou nas artes do movemento, en marcos contemporáneos. É un proxecto de investigación, mediación e creación. Por unha banda trata de abrir espazos de diálogo entre bailarinas que adoiten traballar para outros artistas a través de laboratorios, onde se propoñen dinámicas de discusión e prácticas físicas, e a través de entrevistas persoais. Paralelamente traballamos tamén nunha peza escénica, titulada As que bailan, que trata de facer visible as problemáticas deste lugar. Xuntas falamos da soidade, a fe, a autonomía, as relacións de poder, o diñeiro e o paso do tempo, en relación ao noso traballo.
Como parte deste proceso, Clara propón un laboratorio dirixido a bailaríns que traballan ou traballasen para outros artistas baixo o título Las bailarinas no tocan el cielo, que se desenvolverá no Pazo da Cultura de Carballo entre o 18 e o 29 de xullo 2023. As sesións colectivas marcaranse en relación á dispoñibilidade das interesadas. Os e as interesadas poden ampliar información e inscribirse no laboratorio na seguinte ligazón: https://forms.gle/WTYLu8aKYHAqZhx56.
SOBRE CLARA PAMPYN
Clara Pampyn é bailarina e coreógrafa. Como creadora, funda en 2016, xunto a Alberto Alonso, o colectivo Laimperfecta, co que crearon varias pezas. A últimas foron: Twist (Teatros del Canal, 2018) e Fuga (Escena Patrimonio, 2021). Tamén traballa como coreógrafa para a cantante Silvana Estrada, coa que crea a coreografía de varios vídeos musicais e un concerto escénico, Marchita, estreado en xaneiro de 2023 no Prototype Festival de Nova York. Como asistente de coreografía traballa para Jesús Rubio Gamo en Danzas do Sur de Europa e para Alberto Alonso en Sudar Folclore, Sobrelajuventud e 262mil pasos de baile.
Como docente, imparte clases para a formación profesional en danza contemporánea no Estudo de Danza Carmen Senra e en BambúDanza, en Madrid. Como intérprete, traballa para Elena Córdoba en Y pareceremos árboles (2022) e en Criaturas del desorden (2021); para Jesús Rubio Gamo en Acciones sencillas (2021), Gran Bolero (2019), Danzas do Sur de Europa (2018) e Bolero (2017); para Lucía Marote en El ojo del huracán (2021) e Ela (2019); e para Poliana Lima en Las cosas se mueven pero no dicen nada (2020), entre outras. É candidata aos Premios Max como mellor intérprete feminina de danza en 2019 por Gran Bolero e en 2022 por Acciones sencillas.
SOBRE LAIMPERFECTA
Laimperfecta son Alberto Alonso e Clara Pampyn, un colectivo afincado en Madrid formado en 2016. Noméanse como colectivo porque tratan de permanecer preto unha da outra, sen cercar a maneira na que participan dos procesos. Os seus roles van cambiando, pero o leitmotiv é sempre o mesmo: apoiarse e impulsar as súas inquietudes. Teñen un forte interese no coreográfico como soporte para depositar a enerxía e a súa transformación e nos estados físicos e emocionais que xera o movemento do corpo. Tamén nos procesos que pensan e cuestionan os nosos contextos.
O festival contará este 2023 con catro escenarios situados no arquipélago conformado polas illas de San Simón e Santo Antón, nos que se ofrecerá unha programación musical diversa e estimulante con agrupacións chegadas de África, Asia, América e Europa
No marco da programación de actividades paralelas, o público poderá participar nas Sesións San Simón, nas que o experto en gravacións de cilindro fonográfico Aleks Kolkowski rexistrará intervencións das e dos artistas participantes no Sinsal
O Festival Sinsal SON Estrella Galicia prepárase para celebrar esta fin de semana a súa nova edición, que decorrerá do venres 21 ao domingo 23 na illa de San Simón. Todas as entradas para asistir á cita, un dos encontros máis coidados e singulares do panorama musical estatal e cuxo cartel é secreto ata que o público desembarque na illa, están esgotadas.
Sinsal SON Estrella Galicia ofrecerá, ao longo de tres xornadas, unha pequena mostra da creación contemporánea máis estimulante do momento. Un total de 26 bandas e solistas procedentes de 18 países diferentes actuarán no festival. Angola, Arxentina, Bélxica, Burkina Faso, Colombia, Corea do Sur, Estados Unidos, Estonia, España, Francia, Holanda, Xapón, Marrocos, Nixeria, Portugal, Reino Unido, Sudán e Uganda son os lugares de orixe das e dos artistas que participarán no evento, das cales 9 se estrearán en España e 16 actuarán por vez primeira en Galicia. O festival afonda así na súa aposta pola diversidade cultural a través dunha programación aberta a todos os estilos e experiencias, desde os sons máis populares e até a música experimental, pasando pola electrónica, a psicodelia ou mesmo as músicas urbanas. Ademais, tamén destaca unha relevante presenza feminina nas propostas que conforman o cartel secreto do Sinsal, ben sexa como líderes das mesmas ou porque o 100% das súas integrantes son mulleres.
Neste 2023, Sinsal SON Estrella Galicia contará con catro escenarios nos que se desenvolverá a súa programación musical. En San Simón estarán os habituais Buxos FEST Galicia e San Simón SON Estrella Galicia; mentres que ao outro lado da ponte haberá dous palcos: Santo Antón, que acollerá concertos co público en cadeiras cada día -propostas intimistas co público sentado ás que se poderá acceder por orde de chegada ao recinto e até completar a capacidade do mesmo-, e o novo Santo Antón Clásico, que acollerá micro-concertos de música clásica de dúas agrupacións de talento novo o sábado 22 -cun repetorio centrado en compositores renacentistas-, e domingo 23 -que se centrará na celebración do 300 aniversario d’As catro estacións de Antonio Vivaldi-. Estes recitais -cada día dun ensemble diferente- terán lugar ás 17:00, 17:30 e 18:00 horas e a duración de cada pase será de 15 minutos.
As Sesións San Simón completan a programación paralela da Escola Sinsal
Durante o festival Sinsal SON Estrella Galicia sucederanse as actividades divulgativas vinculadas á programación paralela e que se enmarcan no proxecto A Escola Sinsal, e que incluirán, entre outras accións, a exposición sobre a historia da casete Do cinema familiar ás casetes domésticas,e un obradoiro impartido pola artista Sarah Rashines no que o público aprenderá a xerar loops cunha cinta de casete e creará a súa propia caixa-libro da Escola Sinsal.
Dentro desta liña, atópanse tamén as Sesións San Simón e as Audicións San Simón, dúas actividades que se levarán a cabo grazas á colaboración do experto en gravacións de cilindro fonográfico Aleks Kolkowski. A primeira delas, na que participarán artistas do festival, consiste no rexistro dunha canción de dous minutos nun ciclindro de cera. Estas Sesións San Simón -que fan referencia ao propio arquivo de vídeo do festival gravado ao longo destes anos-, ás que o público pode asistir, celebraranse en distintos espazos do arquipélago -concretamente, no mirador de cristal de Buxos e xunto ao escenario Santo Antón Clásico-, nos que se instalará un estudio de gravación cun fonógrafo do s. XIX. Os horarios e localizacións de cada sesión pódense consultar desde hoxe no apartado de Actividades paralelas do espazo web de Sinsal.
Tamén coa colaboración de Kolkowski celebraranse as escoitas das Audicións San Simón, nas que o público poderá rememorar a instalación no espazo público da primeira máquina de discos para a escoita colectiva –gramola ou jukebox-. Entre os rexistros que se poderán ouvir, están as respostas recibidas na convocatoria Que é a música para ti?, publicada por Sinsal no mes de maio.
Outra das grandes novidades da programación paralela desta edición será a posibilidade de gozar dalgunhas das actuacións do Sinsal da última década grazas á realidade virtual. Así, o venres 21, a capela de San Simón acollerá a pre-estrea do documental Road to Meta-Stage: The Documentary,proxecto impulsado por Toño Cabanelas (Liveforevr!) da man do festival Sinsal SON Estrella Galicia, e que narra a historia dun dos primeiros escenarios virtuais do mundo. A proxección realizarase no formato Theater VR, que permitirá que distintas persoas poidan experimentar, á vez, contidos inmersivos grazas á sincronización de varias lentes de realidade virtual.
Tamén na mesma capela de San Simón, pero xa de cara ao sábado 22 e o domingo 23, celebrarase Illas Imaxinadas: Laboratorio de paisaxes visuais e sonoras, un obradoiro familiar para a creación, desde unha perspectiva lúdica, de ambientes visuais e sonoros a través de diferentes procesos, dispositivos e artefactos. Estableceranse diferentes quendas e en cada unha poderán participar -de xeito totalmente gratuíto- 20 persoas.
Patrimonio natural, historico e cultural: Descubre San Simón
As e os asistentes tamén poderán coñecer de primeira man o patrimonio natural, histórico e cultural do arquipélago a través das actividadesagrupadas baixo a denominación Descubre San Simón. Como novidade, Sinsal SON Estrella Galicia 2023 propón ao público a posibilidade de realizar unroteiro polo arquipélago, sen guías, para coñecer a súa historia. A través de seis paradas, -sinalizadas e que incorporan un código QR para ampliar a documentación en galego, español e inglés- as e os asistentes ao festival coñecerán as transformacións do territorio ao longo do tempo: como fonte de inspiración da lírica medieval, como lazareto e campo de concentración, a creación do paseo dos Buxos, de cando estivo a piques de ser o primeiro aeroporto marítimo de Galicia ou mesmo da súa conexión de San Simón co Pórtico da Gloria.
As actividades gratuítas de Descubre San Simón inclúen visitas en grupo pola illa, como é o caso do Paseo Islario Marabilloso, guiado polo investigador Xosé Lois Gutiérrez Faílde e do que se celebrarán dous pases o sábado 22; ou mesmo un percorrido con axentes sociais de proximidade, como o Paseo con Amarturmar. Membros da asociación cultural de mulleres e homes do mar de Cesantes darán a coñecer ao público a diversidade mariñeira do lugar, o papel da economía circular e como o cambio climático está a transfromar os recursos naturais da zona. Para poder participar nestas andainas, será necesario realizar unha inscrición previa na propia illa, no Punto de Información e Administración. A saída de cada roteiro terá lugar desde a Casa da Cultura de San Simón.
Finalmente, Sinsal ofrecerá a posibilidade de facer unha actividade de deporte náutico 100% sostible e segura como é o pedal surf, coa que se percorrerá o perímetro da illa desde a auga en rutas duns 30 minutos. Para participar nesta actividade aberta a todos os públicos, e para menores a partir de 5 anos acompañadas dunha persoa adulta- é necesario adquirir, previamente, os tickets a través do espazo web do festival.
Toda a información das actividades paralelas, horarios, lugares de encontro dos paseos e outra información de interese sobre as inscricións ou reservas pódese consultar na páxina web de festival.sins.al, que se atopa sempre actualizada e na que se publicará, cada xornada, o programa musical do día unha vez desembarque o público na illa.
