“A LANDRA VIAXEIRA E O AMIGO LAMBÓN”, ESPECTÁCULO MUSICAL INFANTIL QUE PRESENTAN OS JALOCHOS ESTE SÁBADO, 18 DE XANEIRO, NA CASA-MUSEO MANUEL MARÍA
O concerto vai dirixido para nenas e nenos entre 4 e 11 anos e as súas familias.
Sabela Olivares e Suso Bello, Os Jalochos, levarán as persoas que se acheguen este sábado, ás 17 hrs, pola Casa-Museo Manuel María, a unha viaxe musical pola natureza de Galiza na procura da festa.
Concerto que ten como fío condutor o libro A Landra viaxeira e o amigo Lambón, e que será moi participativo, con todo tipo de xogos baseados en conceptos musicais (tempo, ritmo, dinámica), así como percusión corporal, baile e lingua de signos.
Respectar a natureza, viaxar por vilas e cidades, xogar co ritmo da música, cantar e bailar sen acougo, son parte das propostas que nos ofrecerán Os Jalochos este sábado.
Os Jalochos son Sabela e Suso. No ano 2021 fundan a compañía, coa que xiran co espectáculo infantil “Ritmando” e actualmente co espectáculo “A Landra viaxeira e o amigo Lambón”.
Sabela Olivares. Posúe o Grao de Educación Primaria, o Mestrado de Profesorado, o Título Superior de Música na especialidade de Instrumentos da Música Tradicional e Popular, o Título Profesional de Música na especialidade de Gaita e o Título de Profesora na especialidade de Piano. Na actualidade, exerce como docente de educación musical na Universidade de La Rioja (UNIR).
Suso Bello. Músico, produtor musical e compositor. Cunha longa traxectoria no mundo da música participou en diferentes proxectos musicais e de televisión, sendo a súa faceta máis coñecida polo público a de músico integrante de “A Companhia do Ruído”.
O Instituto de Estudios Chairegos dá comezo a actividade cultural do ano 2025 organizando, coa colaboración do Concello de Vilalba, o Concerto CARTAS ALÉN-COMPROMISO E CORAXE, a cargo do grupo SON DE CORDA, previsto para o sábado día 18 de xaneiro de 2025no Auditorio Municipal de Vilalba.
A banda de rock alternativo do Condado, Exeria, presenta o vindeiro 17 de Xaneiro un novo videoclip para o tema Neno.
No texto promocional do vídeo dise:
Para comezar novos ciclos, hai que pechar outros. Neno foi publicado no Ep Sobre a independencia en marzo de 2024 e fálanos sobre unha persoa cuxos demos persoais son incontrolables, incompatibles con valores como a lealdade, a amizade, o cariño. E difícil cando tratamos con xente así, e moito mais se temos aprecio por eles.
As guitarras acústicas e o son envolvente dos sintetizadores lévannos da man, contando a historia con crueza e pouco a pouco van misturándose coa letra, ata chegar ao retrouso catártico, onde toca sincerarnos.
As verdades poden doer moito.
O videoclip de Neno esta dirixido por Wences Lamas, artista que xa traballou coa banda en Un novo nome, o seu primeiro videoclip.Descríbese el mesmo: Gústanme moito as pontes. O meu traballo consiste en tendelas. Hai algo moi autista en min que se desenvolve na plástica e na escrita, que intento mesturar coa xente que se ve máis nos rituais, acontecementos, música e vídeos. Unha vocación de crear maionesa entre un cura gnóstico e un artista contemporáneo, entre un exhibicionista das súas propias feridas e un xardineiro de pequenas recreacións paradisíacas. No que respecta ao audiovisual dirixín uns 40 videoclips, moita videoarte, algunhas películas secretas e máis de 200 titoriais. Traballo con poucos recursos e procuro que os meus técnicos e actores sexan familiares ou se convertan en familia. Esta é a despedida dun ano cheo de concertos para a banda (mais de 20),agora tócalles mirar ao futuro e preparar os seus novos traballos.
Wences tamen dirixiu o primeiro sinxelo da banda Un novo nome.
A intención era recrear un renacemento, un punto e aparte. E tendo en conta que Exeria surxe da unión de músicos que xa levaban tempo tocando xuntos, iso buscaban plasmar.
Vimbio comeza o ano satirizando sobre a falta de ganas de traballar e cotizar co lanzamento do seu novo tema ‘Eu Non Quero Traballar’, nunha canción que se achega a un estilo máis punk e que consolida así a súa aposta renovadora á par que ecléctica. O grupo recolle a letra extraída dunha cantiga popular galega para reeditala baixo un son moito máis canalla, outorgándolle unha nova vida baixo o mesmo significado. Este tema exerce como quinto adianto do grupo e actúa como apertura dun ano no que se espera moita máis música e concertos por parte da banda.
Tras o lanzamento de ‘Insisto’, ‘Mayday’, ‘Bombas Incendiarias’ e ‘Comeza o xogo’, o grupo liderado por Álex Arnoso, unha das voces protagonistas de SonDaRúa, comeza o ano publicando ‘Eu non quero traballar’. Esta proclama contra o traballo exerce como consolidación da diversidade sobre a que se move o grupo, conformando así unha conxunción entre o rap cru e sons que circulan entre xéneros como o metal ou o punk.
Gravada en LUFS Studios, coa mestura e masterización de Damian Mo, a canción conta cun videoclip dirixido por IzanMG que foi filmado en distintas localizacións de Vigo, Porriño, Ponteareas e As Neves.
Con este lanzamento, Vimbio incorpórase ao roster de PlayPlan, axencia de representación de artistas como Tanxugueiras, Caamaño&Ameixeiras, Sabela, Hugo Guezeta, LODE ou García MC, e promotora de festivais como SonRías Baixas, BIGSOUND Pontevedra ou Festival do Pasatempo.
MÁIS SOBRE VIMBIO
Vimbio é a nova cara da escena metal. Comandados por Álex Arnoso, coñecido polo seu protagonismo en SonDaRúa, o grupo xorde para conxugar o rap coa esencia do metal da década dos 90 e do 00. Baixo un gran eclecticismo musical, o grupo propón letras e ritmos moi contundentes, combinando os flows tan característicos de Álex coa potencia dunha banda composta por grandes veteranos da escena metal galega. Vimbio nace para reflotar e rexuvenecer xéneros que viviron o seu mellor momento nos anos 2000, aportando un aire renovador e diferenciador que busca volver a poñer no foco estes estilos de música. Co lanzamento dos seus primeiros sinxelos a finais de 2024 e comezos de 2025, o grupo pon enriba da mesa a súa carta de presentación, co claro obxectivo de facer deste un ano no que brillen as guitarras e os flows contundentes.
O concerto de presentación de ‘Lovismo’ vai ser o 1 de febreiro na Sala Capitol de Santiago e as entradas están á venda na web salacapitol.com e fisicamente na tenda Trisquel Artesanía
Lovismo, o quinto disco d’A banda da Loba, ABDL, publicarase o vindeiro 17 de xaneiro nas principais plataformas. Este esperado novo LP chega logo dun ano da banda afastada dos escenarios para traballar arreo nun disco que ten como fío condutor o amor nas súas múltiples formas de expresións ―o desexo, as relacións, a maternidade, o amor propio, a sororidade, o amor polo noso…― e que leva o selo do estilo calidoscópico de ABDL.
O anuncio chega acompañado da saída do sinxelo Xogo de agardar e mais o seu videoclip, dispoñibles a partir das 00.00 horas deste venres 10 nas plataformas e mais na canle de YouTube da banda, respectivamente. Xogo de agardar é un tema inspirado no que sentimos cando coñecemos a unha persoa e, con só unha ollada, saltan faíscas. Un tema sobre as cóxegas na boca do estómago e ese xogo de sedución que pode acabar ben, ou non, pero que se converte desde o inicio nunha pequena historia de amor que enche de ledicia. Xogo de agardar publicarase ao mesmo tempo que o seu videoclip, gravado en Abrigueiro, con letra e música de Inés Mirás, exintegrante de ABDL
Ouveos de festa na Capitol
A presentación pública de Lovismo será nun concerto na Sala Capitol de Santiago o vindeiro 1 de febreiro. As entradas para esta cita están á venda na web salacapitol.com e fisicamente na tenda Trisquel Artesanía da cidade picheleira. O menores de 16 anos poden asistir ao concerto sempre que estean acompañados dun adulto responsable e será indispensable presentar o DNI.
Este concerto de presentación do novo traballo das “Lobas” vai ser unha auténtica festa na que estarán rodeadas de artistas amigos para dar a benvida a Lovismo. Polo de agora están confirmadas a participacións de Tomé Mouriño (De Ninghures) e dos músicos Adrian Real, Manu Doel, Lara Porto e Cristóbal Fernández, pero quedan aínda novas sorpresas que serán anunciadas axiña.
ABDL
A banda da Loba irrompeu na escena musical galega con Bailando as rúas (2017), co que acadaron un grande éxito e deixaron claro que chegaban para quedarse, facéndose un oco grazas ao seu heteroxéneo estilo musical. Dous anos máis tarde, no 2019 presentarían Fábrica de luz e no 2021 estrearon Hasme oír, un EP dedicado a Xela Arias, sendo ambos os dous traballos finalistas nos Premios MIN na categoría de mellor disco en lingua galega. Alén diso, no 2021, ABDL gañou o Premio Martín Códax na categoría de pop e indie. O 2022 foi o ano de Xabón Lagarta, un traballo co que estiveron xirando ata finais do 2023. Este 2025 volverán aos escenarios con Lovismo.
Na actualidade, ABDL está integrada por Andrea Porto (baixo), Estela Rodríguez (violín), Marcela Porto (percusión), Xiana Lastra (voz) e Iria de Cabo (guitarra), que chega á formación substituíndo a Inés Mirás.
1 de febreiro do 2025 | 21.30 h | Sala Capitol | 12 € anticipada e 15 € en billeteira Entradas á venda en salacapitol.com e Trisquel Artesanía [Rúa da Acibechería, 31, Santiago de Compostela] AVISO: Os menores de 16 anos poden asistir acompañados dun adulto responsable e presentando o seu DNI
PAVA pendura o cartel de “entradas esgotadas” para a presentación do seu novo EP, Pava 3, este domingo 5 na sala Mardi Gras
Se a noite do 5 de xaneiro levase por nome unha canción de Pava 3, ben podería ser Un bolo titulado “Tarde piaches!”: xa non quedan entradas dispoñibles para asistir á presentación do novo EP de PAVA, a banda liderada pola poeta e compositora coruñesa Lucía Aldao. É que, seguindo as letras de Aldao no tema Tremendamente coquetas, “todas queren estar na letra Q” e, neste caso, na Noite de Raíñas Pavas, que terá lugar o domingo 5, a partir das 22.00 horas, na sala Mardi Gras.
Pava 3 é un exercicio de pop luminoso, un traballo discográfico no que a banda torna en protagonista, mais seguen a estar presentes as liñas mestras dos EPs previos: letras coidadas e melodías exquisitas atravesadas por cuestións de xénero, identidade sexual, idade e lingua. PAVA é agora máis poliédrica, unha banda onde Lucía Aldao exerce de frontwoman, e iso reflíctese tamén na súa música, máis sólida e sofisticada.
Na estrea ao vivo de Pava 3 -dispoñible en formato dixital a través do Bandcamp de PAVA-, as asistentes poderán adquirirun merchandising moi especial: unha edición de 200 carpetas que incluirán un código de descarga dos temas do EP, as letras impresas en follas recendentes e un póster despregable coa portada de Pava 3, na que Lucía Aldao é protagonista. A elección destes obxectos non é casual e operan como unha metáfora das carpetas que non se forraron e mais os pósters que non se colgaron en tantas adolescencias noventeras.
