O novo sinxelo da banda alternativa galega, en colaboración conRebeliom do Inframundo, poderá escoitarse en todas as plataformas dixitais desde mañá venres, 7 de novembro, ás 00.00h: https://orcd.co/insaciables
Este xoves, 6 de novembro, Arrhythmia avanza Insaciables en exclusiva en YouTube contra ás 13.30 horas:
Insaciables mestura o metal alternativo con tinturas electrónicas de Arrhythmia co rap duro e combativo de Rebeliom do Inframundo, para falar do orgullo polo traballo feito, festexar quen son, o que foron e como seguir creando xuntos, abrindo, tamén, unha porta á crítica ao sistema
Durante un tempo, o escenario gardou silencio, pero a banda lucense non. Arrhythmia pasou o último ano pechada no estudo, construíndo un novo capítulo con calma, forza e claridade de ideas. Lonxe de desaparecer, decidiron parar o ruído exterior para escoitarse a si mesmos.
O resultado: esta nova etapa que mantén a enerxía e o discurso que sempre os definiu, pero cun son máis afinado e unha identidade aínda máis sólida. A evolución verase reflictida nun novo EP, que sairá á luz en 2026.
Amnesia (Galunk Producións, 2025) foi o primeiro adianto deste novo traballo, publicado o pasado mes de abril, confirmando o que moitos intuían: Arrhythmia segue a ser unha das propostas máis singulares e queridas da escena alternativa galega.
Agora, Arrhythmia presenta o segundo sinxelo deste novo EP, baixo o título Insaciables, en colaboración co grupo de rap galego Rebeliom do Inframundo. Insaciables reflicte a unión e a amizade de ambas bandas que, desde hai anos, comparten a mesma loita dentro da escena musical galega. O single estará dispoñible en todas as plataformas dixitais desde este venres, 7 de novembro, en: https://orcd.co/insaciables
Con este novo lanzamento, Arrhythmia amosa de novo que non volven, porque en realidade nunca marcharon; simplemente, estaban collendo aire para volver golpear con máis forza.
DESCUBRE INSACIABLES, O NOVO SINGLE DE ARRHYTHIA
Alberto Busto, membro de Arrhythmia e de Rebeliom do Inframundo, define Insaciables como “unha mestura do rap duro e combativo de Rebeliom do Inframundo co metal alternativo con tinturas electrónicas de Arrhythmia, creando un show potente e cheo de enerxía… É unha canción que celebra quen fomos, o que somos e a forma de seguir creando xuntos”. E remata: “O sinxelo fala do orgullo polo traballo feito, do respecto polos que despexaron o camiño e das portas abertas ás novas xeracións, pero, tamén, cunha visión crítica cara á industria e o negocio musical”.
ARRHYTHMIA, CANDO O RUIDO É UNHA LINGUAXE QUE LLE DA SENTIDO AO CAOS
Desde Lugo, Arrhythmia leva anos convertendo o ruído en linguaxe. A súa música nace da fricción entre mundos: o metal e a electrónica, o rap e o rock, a forza e o detalle.
En galego e sen filtros, constrúen cancións que son descarga e reflexión ao mesmo tempo, espello dunha xeración que pensa e latexa a outro ritmo. Recoñecidos con dous Premios Martín Códax da Música –en 2018 á mellor banda de metal galego e, en 2023, como mellor banda heavy e metal–, foron quen de erguer un son propio, ás veces brutal, ás veces hipnótico, e sempre honesto.
O seu LP I (2022), financiado grazas ao apoio directo da súa comunidade, marcou un punto de inflexión: unha declaración de independencia estética e emocional. Antes publicaran o LP II (2016) e o EP III (2012).
Hoxe, Arrhythmia non busca agradar: busca conmover. E iso, no fondo, é o que sempre fixeron: poñerlle alma á distorsión e sentido ao caos.
O artista afincado na Ribeira Sacra debuta en Compostela cun concerto en Casa das Crechas o xoves 20 de novembro. As entradas están dispoñibles en Woutick.com
O artesán sonoro PEITOESCURO chega a Compostela o xoves 20 de novembro para presentar a súa proposta musical na Casa das Crechas, a partir das 20:30h. As entradas están xa á venda en Woutick.com.
Tras o concerto, estará disponible o novo sinxelo do artista “PAN DAS PEDRAS”, en todas as plataformas dixitais. Unha semana despois, o 29 de novembro, estrearase o videoclip que a acompaña, peza que pecha a triloxía audiovisual iniciada por “ALVORADA” e continuada con “METAMORFOSE”, dirixidos por Álex Baena e producidos por Iago Pico.
O día previo, o local multiusos da Asociación de Veciños de Salcedo, xunto co propio artista, acollerá un acto presencial de proxección da triloxía, aberto a todos os veciños e veciñas que queiran achegarse.
Con cantigas populares, versos poéticos e ritmos ancestrais, PEITOESCURO eleva a tradición folclórica ibérica utilizando recursos electrónicos co fin de amplificar os latexos das serras.
Destes procesos nace un espectáculo contemporáneo onde o movemento e as emocións acadan unha potencia no escenario que non deixarán pel sen estremecer nin peito sen esperanza. Unha posta en escena valente, vibrante, para un futuro que necesita lembrar a sabedoría do rural para florecer.
“SEMENTE NA FENDA” dá nome ao seu álbum debut, producido por Iago Pico, que nos convida a bailar no ritual do enterro das sementes: unha exploración da escuridade necesaria para espertar na procura da luz.
VÉMONOS NOS SENDEIROS
20/11/25 Casa das Crechas, Santiago
28/11/25 Asociación Veciños de Salcedo. Estrea videoclip “PAN DAS PEDRAS”
06/12/25 Auditorio Municipal, Burela
28/12/25 Casa da Cultura Olga Novo, Pobra de Brollón
O grupo de Muros quece motores para prender as pistas de baile os vindeiros meses de xaneiro e febreiro de 2026, cun percorrido por algunhas das salas máis míticas de Galicia.
Despois dun verán cargado de festivais (Caudal Fest, Castelo Rock, Fene Rock..), o quinteto presenta agora nas salas o seu novo EP “Esclavos do baile”: seis himnos incendiarios que lanzan consignas que van dende a sátira lingüística ata a épica da resaca, sempre cunha conclusión clara: se queda vida, queda festa. Un traballo que os sitúa como unha das máis emocionantes propostas da escena actual.
Con letras afiadas e unha enerxía que se move entre a irreverencia de Terbutalina e o descaro de Novedades Carminha, Lisdexia consolídase como unha das propostas máis frescas e vibrantes da nova escena galega.
A formación ven de ser un dos grupos gañadores da primeira edición do ONDACHICHA, a iniciativa impulsada por Chichalovers e Radio Líder Santiago para dar visibilidade ao talento musical emerxente galego.
O programa de residencias Atopémonos Bailando, coordinado por Colectivo Glovo en colaboración coa Área de Cultura, Turismo e Promoción da Lingua do Concello de Lugo, presenta esta semana tres mostras abertas no Museo MIHL de Lugo:
➡ Martes 5 de novembro · 18:00 h
Jandross — A noite do cuco Unha figura que acompaña mentres o corpo permanece: celebra a vida, entreabre as portas do alén e encarna as contradicións que nos tecen.
Jessica Castellón & Boris Orihuela — Ni Fu Ni Fa Peza en proceso que cruza o tradicional e o contemporáneo, conectando danzas urbanas e flamenco para escavar na memoria persoal e colectiva.
➡ Xoves 7 de novembro · 18:00 h
IXA — 52-BLAU Case unha oda á adaptación: un corpo que sobrevive ao naufraxio nun océano de estímulos e información, buscando saír á tona.
O sábado 15 de novembro sobre as 20:00 horas terá lugar unha nova edición das foliadas estacionais da Asociación Cultural CASTIÑEIRO MILENARIO, coa celebración da FOLIADA DE OUTONO 2025 no Centro Sociocultural de Begonte, situado xunto ao centro médico e a pista de pádel. Dita foliada empezará cuns petiscos para coller forzas e a partir das nove da noite acontecerá o núcleo central da foliada con catro grupos participantes. Como sucedeu en edicións anteriores, abrirán a foliada os grupos residentes, as cantareiras de Foliadeir@s do Castro e o grupo de gaitas de Treitoira. Despois desde Cospeito achegarase o grupo Beteluma Cantareiras, rematando co grupo das Pontes, No Cómbaro. Finalmente haberá foliada aberta ata que o corpo aguante.
O Instituto de Estudos Chairegos (IESCHA), en colaboración coa Área de Cultura-Vicepresidencia da Deputación de Lugo, Academia Galega do Audiovisual e o Concello de Vilalba, organiza a proxección da longametraxe de ficción AS NEVES, dirixida por Sonia Méndez, película gañadora, entre outros, do Premio Mestre Mateo á mellor longametraxe de ficción. Deste xeito, rematamos coas proxeccións correspondentes ao CICLO MESTRE MATEO-2025 que durante os últimos meses brindounos a oportunidade de poder disfrutar das películas finalistas (documentais, longametraxes e curtas) dos XXIII PREMIOS MESTRE MATEO.
Esta décima proxección, e última do Ciclo Mestre Mateo por este ano, terá lugar no Auditorio Municipal de Vilalba o domingo 9 de novembro de 2025, ás 20:00h.
A entrada será de balde, pero haberá que facer reserva de localidade na web www.entradasvilalba.es ou na Casa da Cultura de Vilalba.
O derradeiro concerto rapante da xira en Galicia ata 2026 terá lugar mañá, venres 31, en Chantada, no Castañazo Rock; mentres que o peche do tour chegará na última fin de semana de febreiro no Festival Emigrason
Os muradáns, que veñen de facer dúas datas nas que penduraron o cartel de “entradas esgotadas” no Club Sauvage de Barcelona, actuarán nas vindeiras semanas en salas de Bilbao, Madrid, Valladolid e Zaragoza
The Rapants apagará definitivamente as luces de La máquina del buen rollo a última fin de semana de febreiro, no marco da cuarta edición do Festival Emigrason. Pero antes, esta mesma fin de semana, realizarán a última viaxe co seu saltón en Galicia: as fichas para subir a La máquina del buen rollo repartiranse mañá venres 31 no XX Castañazo Rock. O público galego poderase despedir dos rapantes até o ano que vén, cando regresen con novo disco e directo aos escenarios galegos.
Tras encher esta fin de semana dúas noites seguidas o Club Sauvage de Barcelona, e logo de vivir un verán ateigado de concertos en salas e festivais do país, The Rapants dá a coñecer as últimas 6 datas das viaxes no saltón. Ás xa anunciadas de Chantada no Castañazo Rock (31 de outubro), Valladolid (13 de novembro) e Madrid (15 de novembro) -estas dúas últimas co apoio de AIEnRuta e da Xunta de Galicia a través da Axencia Galega das Industrias Culturais-, súmanse agora Zaragoza (6 de febreiro), Bilbao (7 de febreiro) e Bruxelas (na fin de semana do 27 e 28 de febreiro).
O peche europeo do tour, por todo o alto, producirase na celebración do Festival Emigrason, unha cita moi querida polos rapantes, pois participaron tanto no 2023 coma no 2024. Desta quenda, a actuación na capital belga -cuxa Rue Franklin dá nome a un dos temas máis coñecidos dos muradáns- será un bolo especial, pois porá o ramo a unha intensa xira que iniciaron na Sala Capitol en marzo de 2024 (cun dobre ‘sold out’ histórico, con entradas esgotadas en menos de 15 minutos) e que se pechará, dous anos despois, con máis de 70 directos ás costas e un galardón: Premio MIN ao Mellor Álbum en Galego do Ano 2024.
Ao longo destes case 20 meses, o cuarteto ofreceu actuacións memorables en citas como O Son do Camiño, Atardecer no Gaiás -o directo máis multitudinario da historia do recinto-, Festival Noroeste -no que regresaron á praia de Riazor, logo de gañar no 2019 o certame de bandas de Cuac FM-, Festival Revenidas ou as Festas da Peregrina, entre outras. Acompañou a La Raíz no seu regreso aos escenarios en dúas ocasións (no Coliseum da Coruña e no Pavillón La Magdalena, Avilés) e converteuse na cuarta banda galegofalante máis escoitada en plataformas.
DERRADEIRAS VIAXES DE ‘LA MÁQUINA DEL BUEN ROLLO’
31.10, Chantada | XX Castañazo Rock 13.11, Valladolid | El desierto rojo (AIEnRuta)
15.11, Madrid | Camping Osuna (AIEnRuta)
06.02 Zaragoza | Inverfest – La Lata de Bombillas 07.02 Bilbao | Negufest – Sala Azkena 27-28.02 Bruxelas | IV Festival Emigrason
