Do 20 ao 22 de setembro, terá lugar a oitava edición da convivencia anual das Residencias Paraíso para a danza e as artes vivas, na que participarán as e os artistas seleccionada/os en 2024 nesta iniciativa pioneira no noso territorio, ademais de numerosa/os profesionais das artes escénicas convidada/os de dentro e fóra de Galicia
O encontro permite desenvolver durante toda a fin de semana, nunha contorna única, diferentes dinámicas de presentación e debate sobre os procesos artísticos, así como propoñer outras accións de carácter transversal, nunha convivencia de tres días con case corenta artistas e profesionais das artes vivas e a xestión cultural de distintas partes do mundo
Residencias Paraíso é un proxecto impulsado polo colectivo RPM, que conta co financiamento da Xunta de Galicia, a través da Axencia Galega das Industrias Culturais, así como o apoio de Acción Cultural Española e das distintas institucións coprodutoras do programa: Área de Cultura, Turismo e Promoción da Lingua do Concello de Lugo, Concello de Pontevedra, Concello de Vimianzo, Concello de Carballo, Concello de Ribadavia e Fundación Cidade da Cultura de Galicia
Esta fin de semana terá lugar unha nova edición do Encontro Paraíso na Illa de San Simón. Do venres 20 ao domingo 22 de setembro, o Colectivo RPM organiza a súa cita anual das Residencias Paraíso —un programa de residencias artísticas para a danza e as artes vivas pioneiro no noso territorio—, na que participarán as e os artistas seleccionada/os en 2024 na iniciativa, ademais de numerosa/os profesionais da danza e as artes escénicas convidada/os de dentro e fóra de Galicia.
Este Encontro Paraíso na Illa San Simón é unha convivencia de tres días que xera un espazo compartido entre artistas Paraíso, socias-amigas de Colectivo RPM e persoas vinculadas á rede de espazos colaboradores nun espazo único: a Illa de San Simón. Esta contorna tan especial permite desenvolver durante toda a fin de semana diferentes dinámicas de presentación e debate sobre os procesos artísticos, así como propoñer outras acciones de carácter transversal. A posibilidade de durmir ofrece, ademais, un contexto de convivencia moi especial para o encontro.
Deste xeito, o Encontro Paraíso na Illa de San Simón, que neste 2024 alcanza a súa oitava edición, é unha convivencia de tres días para atoparnos na intimidade dunha illa tan singular como a de San Simón. Participado por toda e todos as e os Artistas Paraíso 2024 —Sergio Marey, Fran Rodríguez & Brais Pombo, Ana Cotoré, Desgarradura, Noela Covelo Velasco & Élise Moreau, Cris Balboa, Lucas Damiani, José Ramón Hernández / Osikán – vivero de creación e Furia Sotelo—, xunto a case corenta profesionais das artes vivas e a xestión cultural de distintas partes do mundo, o encontro está pensado para compartir os procesos artísticos en residencia desenvolvidos durante este 2024 e, tamén, para xerar unha espazo de coñecemento conxunto. O programa deste Encontro Paraíso 2024 na Illa de San Simón pode consultarse en:
En paralelo, por segundo ano consecutivo, o Colectivo RPM amplía o seu Encontro Paraíso co desenvolvemento dunha residencia de investigación na propia Illa de San Simón nos días previos á convivencia. E faino en colaboración con Graner, o centro de creación de danza e artes vivas con quen, desde 2017, constrúe unha relación continua de colaboración entre Galicia e Cataluña.
As artistas que están a habitar a illa desde o pasado 11 de setembro e ata o vindeiro día 22 son Mar García & Javi Soler, que están somerxidas nun proceso de investigación entre o movemento e o son, en torno á representación e aos significados do bico escénico a través do imaxinario do ‘Ius Osculi’ ou o “dereito a bico” da Antiga Roma. Parte deste proceso poderase ver no Encontro Paraíso 2024 esta fin de semana: https://www.colectivorpm.gal/index.php/gl/artistas/mar-garcia-javi-soler.
SOBRE AS RESIDENCIAS PARAÍSO
Promovido polo Colectivo RPM –entidade independente dedicada ao impulso da danza e a creación contemporánea en Galicia–, o programa Residencias Paraíso 2024 diríxese a artistas de Galicia, España e Portugal, con maior ou menor traxectoria, que precisen recollerse de forma intensiva arredor dun proxecto de investigación ou creación durante dúas ou tres semanas. A iniciativa conta cun importe total de 22.000€ e, neste 2024, acolle 9 propostas en residencia –cunha dotación económica de entre 1.500 e 3.000€ (impostos incluídos) cada unha– para favorecer as distintas fases do proxecto artístico seleccionado, desde a investigación, a escritura, o traballo dramatúrxico, a creación coreográfica ou, tamén, as residencias de carácter técnico.
Neste 2024, as residencias artísticas desenvolvéronse desde o pasado mes de abril no Pazo da Cultura de Narón, o Pazo da Cultura de Carballo, a Casa da Cultura de Vimianzo, o Vello Cárcere de Lugo, a Cidade da Cultura de Santiago de Compostela, o Salón Teatro do Centro Dramático Galego, o Pazo da Cultura de Pontevedra e a Igrexa da Madalena de Ribadavia. Paralelamente, as e os artistas residentes seleccionadas e seleccionados participan neste encontro anual promovido polo Colectivo RPM que terá lugar os días 20, 21 e 22 de setembro na Illa de San Simón.
Entre os 203 proxectos recibidos na actual convocatoria das residencias, o Colectivo RPM seleccionou a Sergio Marey, Fran Rodríguez & Brais Pombo, Ana Cotoré, Desgarradura, Noela Covelo Velasco & Élise Moreau, Cris Balboa, Lucas Damiani, José Ramón Hernández / Osikán – vivero de creación e Furia Sotelo como ‘Artistas Paraíso 2024’.
Residencias Paraíso vai na procura de artistas de danza e artes vivas preocupadas e ocupadas polas derivas do seu tempo. Pretende fomentar a aparición de novos proxectos de investigación e creación arredor das novas linguaxes contemporáneas, alimentando o campo de acción da comunidade artística do noso territorio, tanto a que xa existe como a que está por chegar. Normalizar o concepto de residencia artística resulta fundamental para o presente e o futuro das políticas culturais en Galicia, porque significa atender e respectar o espazo e o tempo dedicado á investigación artística, o verdadeiro xerme de todo o que virá.
O maior valor de Residencias Paraíso é que sucede grazas a unha rede que atravesa de norte a sur o noso territorio a través da colaboración de espazos de distinta natureza, desde teatros ou centros culturais até espazos non convencionais. O exercicio de diálogo entre todas as partes (impulsores, coprodutores e espazos cómplices), dota dunha identidade singular ao programa. Ao longo da súa historia, nas Residencias Paraíso participaron artistas e colectivos como Brigitte Vasallo, Clara Pampyn, Luísa Saraiva, Fernando Epelde, Marcia Vázquez, Natalia Fernandes, Hermanas Gestring, Diego Anido, Compañía Elahood, Andrea Quintana, Alejandra Balboa, María Roja ou Laila Tafur, entre moitas outras.
Residencias Paraíso é un proxecto interinstitucional do Colectivo RPM en colaboración coa Xunta de Galicia, a través da Axencia Galega de Industrias Culturais. Está coproducido pola Área de Cultura, Turismo e Promoción da Lingua do Concello de Lugo, o Concello de Pontevedra, o Concello de Vimianzo, o Concello de Carballo, o Concello de Ribadavia e a Fundación Cidade da Cultura de Galicia. E conta cola colaboración do Centro Dramático Galego, O Vello Cárcere de Lugo, o FIOT – Festival Internacional Outono de Teatro de Carballo, o Pazo da Cultura de Narón e o Padroado da Cultura do Concello de Narón. E conta co apoio de Acción Cultural Española.
SOBRE O COLECTIVO RPM
Colectivo RPM é un colectivo de artistas vencellados á danza e ás artes vivas que imaxina, deseña e acompaña proxectos contextuais desde Galicia. Manteñe un claro compromiso polo diálogo interinstitucional e co impulso de iniciativas ao redor da creación contemporánea, a investigación e a visibilidade da comunidade artística da danza e as artes vivas.
Ademais do acompañamento de artistas e procesos, o colectivo tamén xera diálogos e accións coas comunidades locais para achegar a práctica artística á cidadanía. Dentro das liñas de acción do Colectivo RPM destaca o programa Residencias Paraíso -construído cunha rede de teatros e espazos cómplices en Galicia- que lanza unha convocatoria anual para acoller en residencia a distintos artistas ao longo do ano, despregando unha serie de programacións expandidas abertas ao público. Este programa esténdese fóra de Galicia na liña Cruceiros Paraíso que posibilita abrir liñas de colaboración con outros espazos estatais e internacionais.
Castiñeiro Milenario presenta unha nova edición, a oitava, do Ciclo de Teatro. Nesta edición contarán con tres representacións, todas elas dentro dos circuítos de teatro, tanto do afeccionado coma do profesional, promovidos pola Vicepresidencia da Deputación de Lugo.
A primeira obra será o 22 de setembro ás seis da tarde no local do Pobo da Asociación Veciñal do Castro. A compañía O Torques de Burela representará a obra titulada “ODT-TIVE“, unha comedia para todos os públicos.
A segunda obra será o 9 de novembro, a partir das sete da tarde, na Casa do Pobo da Asociación Veciñal do Castro a cargo da compañía Grupo de Teatro do Hospital de Lugo que representará a obra “Asasinato na tenda de roupa“, unha comedia, tamén con asasinatos polo medio dirixida a todos os públicos.
Para rematar este Ciclo o 30 de novembro ás sete da tarde na Casa da Cultura de Begonte e dentro do circuíto profesional da Deputación de Lugo, teremos a Bátega Teatro representando a obra “O Pano“, unha obra dramática dirixida a adolescentes e público adulto.
Agradecemos que a Vicepresidencia da Deputación de Lugo continúe apoiando o teatro, tanto afeccionado como profesional, ao Concello de Begonte por ceder a Casa da Cultura e, por suposto, á Asociación Veciñal do Castro por ceder as súas instalacións.
Gramática de superficie de Andrés Rivas Rodís na Galería NÉBOA
Inauguración: venres 20 de setembro ás 19h
Enderezo:Rúa Lamas de Prado 31, Lugo
Exposición: 20 setembro – 23 novembro
O vindeiro venres 20 de setembro, a partir das 19h, a Galería NÉBOA inaugura tempada expositiva coa mostra individual Gramática de superficie do artista compostelán Andrés Rivas Rodís.
Gramática de Superficie é o título da primeira exposición individual de Andrés Rivas Rodís na Galería NÉBOA. O elemento “superficie”, implicado tanto no proceso como na visualización das obras, constitúe precisamente, o fío condutor de toda a mostra. A superficie como capa externa desprotexida e base para a inscrición (de aí a súa relación coa escrita) é o soporte sobre o que, inconsciente ou premeditadamente, deposítanse todo tipo de elementos dun xeito xeolóxico, estratificados e remitíndose constantemente uns aos outros.
Un movemento tectónico, no que o artista dispón certos obxectos (telas, papeis, madeira, etc.) sobre os que realiza composicións básicas coa intención de producir o menor ruído posible e así, evidenciar as interaccións do externo no plano pictórico. A partir do descoido ou do accidente as pezas vanse “contaminando” do entorno, do espazo de traballo no que hai lixo, po, pegadas e desprendementos
Asemade, as obras sofren unha contaminación formal, consciente e promovida polo propio artista a base de materiais atopados extraídos de calquera libro esquecido: un debuxo simulando unha bobina, un circuíto eléctrico ou a silueta dun nocello. Como é obvio, a referencia orixinal non se asocia directamente. Para Rivas Rodís, o elemento da translación é esencial para entender como, mediante o emprego da plástica, opera a nosa visualidade, o aceno en relación coas superficies, con todo o que é susceptible de ser visto, manchado e copiado.
Algúns dos papeis que utiliza nos collages son rescatados de antigos cadernos, libros ou cartas que perderon a súa función e que foron visiblemente atravesados polo tempo: un papel mercado hai dúas horas conxúgase, xustaponse e dialoga con outro de corenta anos. E volve cobrar sentido, reactívase na superficie da obra sen medo de superpoñerse á anterior. Un movemento que opera repetidamente, e que fai que unha peza non sexa un círculo pechado ou teña un punto final, senón que funcione coma unha estrutura poliédrica.
Se, como dicía Paul Válery “o máis profundo é a pel”, é porque a pel é un órgano de contacto, de permeabilidade e repleto de poros. O capilar, o térmico, a súa división en estratos, fai que poida vinculala ao espazo do taller e ao propio proceso pictórico, xa que se converte nun espazo con milleiros de puntos perceptivos: xa non só contamos co visual, a superficie é a resposta á somatización, á asimilación dun espazo, e as obras forman parte dese corpo somático, vivo e quente que é a pintura.
Andrés Rivas Rodís (Santiago de Compostela, 2000) é graduado en Belas Artes pola Universidade Politécnica de Valencia (2022), mestrado en Investigación e Creación en Arte pola Universidade do País Vasco en Biscaia (2024), e actualmente doutorando pola Universidade de Vigo. No 2024 recibiu o Premio Gaztea do Concello de Leioa (Biscaia) e no 2022 foi galardoado co Premio Cátedra Bodegas Faustino & Willy Ramos (París) co proxecto Luz negra. Ademais, foi finalista do Xuventude Crea de Santiago de Compostela (2020 e 2021) e un dos participantes no Encontro de Artistas Novos Cidade da Cultura EAN11 (2021) coordinado por Rafael Doctor.
Entre as súas exposicións destaca a colectiva dos galardoados coa Cátedra Faustino & Willy Ramos na Galería Lupe Fullana (Valencia, 2023), XXVI Certamen Jóvenes pintores da Fundación Gaceta (Salamanca, 2023), Paisaxe_0 na Galería Metro (Santiago de Compostela, 2022), La imagen de la memoria na Biblioteca Azorín (Patraix, Valencia 2022), Xuventude Crea na Igrexa da Universidade (Santiago de Compostela, 2021) e Hidden Sessions co colectivo Orbis Vacui no Centro Cultural escuela de Ruzafa (Valencia, 2020).
Inauguración venres 20 de setembro ás 19h Enderezo Lamas de Prado 31, Lugo Exposición 20 setembro – 23 novembro, 2024 Horario martes a venres de 11h a 14h / 17h a 20h sábados 11h a 14h. Outro horario, previa cita
Queres formar parte do voluntariado do FIOT? Verás espectáculos de teatro e huir, descubrirás como funciona un festival por dentro, coñecerás xente e… pasaralo moi ven! Adaptámonos á túa dispoñibilidade.
O prazo desta convocatoria de voluntarios do #FIOT33 está aberto ata o vindeiro 20 de setembro.
Por outra banda, desde mañá, luns, 16 de setembro, ás 10.00h, o público poderá adquirir -a través da plataforma en liña Ataquilla– os bonos e entradas para a Rúa dos Contos, que neste 2024 celebra as súas vodas de prata ao cumprir 25 edicións.Vés celebralas con moito humor?
🔸26 de setembro: ‘Rescate emotivo’ de @waltervelazquezcalostro (gratuíto para a Residencia de Maiores) 🔸26 de setembro: ‘Animación de rúa’ con Walter Velázquez (gratuíto) 🔸26 de setembro: ‘Xa que o sabes, voucho contar (e cantar)’, de @fedeperez79 🔸27 de setembro: ‘Cagadas’, de Cándido Pazó 🔸27 de setembro: ‘A ver que pasa’, de Evaristo Calvo 🔸28 de setembro: ‘Riquiña’, de @jazminabuin 🔸28 de setembro: ‘Enredada’, de @letidataberna 🔸29 de setembro: ‘Sois maravillosos. D.O. Cádiz’, de @miki_dkai 🔸4 de outubro: ‘Contos entre cordas’, de @mariadapontragha e Bleuenn Le Friec 🔸4 de outubro: ‘Instrucións para tomar café’, de @carlosrebolo_charly 🔸5 de outubro: ‘O mellor e o peor dos 2000’, de Carta de Axuste 🔸11 de outubro: ‘Os diarios de Adán e Eva. Boleros no paraíso’, de @paraisoteatro.cia
🎟 Haberá un número limitado de bonos para todas as funcións da Rúa dos Contos (40 euros).
LODE ESTREA O SEU NOVO TEMA “TRES TRAGOS”, ONDE LLE CANTA AO DESAMOR
O novo sinxelo do artista de Narón é o segundo adianto do seu próximo EP
O artista galego LODE segue presentando os adiantos do que será o seu primeiro EP. Nesta ocasión publica “Tres Tragos”, onde lle canta á dolorosa ruptura dunha relación amorosa, e afoga as penas bebendo para esquecerse desa dor. Amosando unha vez máis a súa versatilidade dentro do xénero urbano, o de Narón aposta nesta ocasión por interpretar unha cumbia, que precede a “Carita de Ángel”, o afrobeat que serviu como primeiro sinxelo fai escasos meses.
“Tres Tragos” naceu coa intención de ser unha balada, pero ao non atopar un retrouso claro implementaron un ritmo de cumbia e a canción cambiou por completo. O traballo na produción de Caicer, co que xa traballou en “ENAMORAO”, foi clave para transformar o tema e que quedara ese retrouso tan aditivo xunto con eses ritmos tan marcados de cumbia. Durante o proceso compositivo tamén participaron Nuria Azzouzi, Mateo Bruquetas e o propio LODE, equipo habitual de composición do artista, ao que tamén se uniu o propio produtor Caicer.
Este novo tema, que reflexa claramente a intención de convencerse a si mesmo de que está mellor sen esa parella, pero que aínda bebendo para esquecer non logra superar a tristeza que lle provoca a súa separación, únese a “Carita de Ángel” como primeiros adiantos do seu primeiro traballo discográfico. Tras un 2023 incrible no que acadou máis de medio millón de escoitas cos seus temas, LODE asenta as bases do seu proxecto neste 2024, apostando pola súa versatilidade dentro do xénero urbano.
MÁIS DE LODE
LODE é un dos artistas galegos con maior repercusión nas redes sociais. Cun estilo urbano pero multidisciplinar, o cantante de Narón está abraiando ao seu público pola gran combinación nas súas composicións de sons actuais e bailables cunha gran voz. Tras as súas exitosas aparicións en programas televisivos como La Voz ou El Hormiguero, LODE eleva a escena urbana a base de talento, con composicións musicais e coreográficas propias de primeiro nivel.
As súas redes sociais son unha pequena mostra da repercusión do cantante e bailarín galego, acumulando máis de millón e medio de seguidores de todas as partes do mundo nelas, destacando os máis de 35 millóns de visualizacións que acumula na súa canle de YouTube. O seu talento non pasou desapercibido dentro da industria musical, sendo apoiado por grandes figuras do panorama internacional e nacional como Juanes ou Álex Ubago.
Actualmente, o cantante, bailarín e compositor está preparando novos traballos discográficos, así como un novo directo no que deixar patente o seu carácter multidisciplinar, sendo quen de combinar a súa capacidade vocal co seu talento coreográfico. LODE levará o seu éxito nas redes aos escenarios.
Adrián Conde abrirá o programa o venres 13 na praza compostelá de Praterías con Check Out, unha comedia visual inspirada no cine mudo coa que gañou o Premio Fetén 2024 a Mellor Intérprete e o Premio Oh! das artes escénicas de Asturias ao Mellor Espectáculo para a Infancia
Foz estréase este domingo 15 como sede do CEN para acoller na praza Conde de Fontao a función de novo circo By ò Bu. Aproximación al no existir, das compañías navarras Yarleku e El Punto Gunea
O encontro profesional Habitación Peregrina PRO, que terá lugar do 17 ao 19 de setembro no centro O Vello Cárcere de Lugo, mantén aberto o prazo de inscrición até o día 13 a través de www.escenanorte.com
A cuarta edición de Camiño Escena Norte, o programa de intercambio cultural no que participan compañías de teatro, danza e artes do movemento e novo circo de Galicia, Asturias, Cantabria, Euskadi e Navarra, iniciará esta fin de semana a súa andaina polo territorio galego da man do Ciclo Constelacións, a programación itinerante de corte xeneralista que conforman 15 propostas diferentes. Este venres 13, ás 19.00 horas, a praza compostelá de Praterías acollerá o espectáculo inaugural Check Out, do asturiano Adrián Conde, unha proposta dirixida a público de todas as idades, especialmente o infantil. En caso de choiva, a función -prevista inicialmente para a praza da Quintana-, terá lugar no Salón Teatro. Nos dous casos, o acceso será de balde ata completar capacidade.
Check out é unha das propostas máis premiadas este ano en Asturias. Adrián Conde foi galardoado co Premio Fetén ao Mellor Intérprete e tamén recibiu o Premio Oh! Das artes escénicas asturianas ao Mellor Espectáculo Infantil. Trátatse dunha comedia visual inspirada no cine mudo e na que o protagonista, Eugenio, é un mozo de servizo dun hotel que, entre equívocos, xogo de clown e moita diversión, descobre ao longo dunha xornada imprevista de traballo que non hai mellor futuro que vivir gozando do presente.
Dous días despois, o domingo 15, terá lugar a estrea de Foz como sede do Camiño Escena Norte, que este ano chega, na súa edición máis expansiva, a 13 localidades do país. As compañías navarras Yarleku e El punto Gunea aterrarán na Mariña luguesa para presentar By ò Bu. Aproximación al no existir, un espectáculo de novo circo dirixido a publico adolescente e adulto e que, a través do movemento, o trapecio e a palabra, expón a conversa entre as dúas partes dun mesmo ser, que aborda no diálogo a posibilidade de deixar de existir. A función, que se representará na Praza Conde do Fontao – se chove trasladarase á sala Bahía-, comezará ás 21.00 horas e tamén será de acceso libre ata completar capacidade.
Habitación Peregrina PRO pechará o venres 13 o prazo de inscrición
A sexta edición de Camiño Escena Norte traerá novamente a Galicia a celebración do encontro escénico profesional Habitación Peregrina PRO, o espazo de convivencia onde as compañías entran en contacto, coñecen as súas liñas de traballo e propostas estéticas, profundan na realidade dos distintos circuítos de programación, exploran vías de coprodución e acceden a propostas de formación que sexan de interese para o seu desenvolvemento profesional.
Habitación Peregrina PRO celebrarase do 17 ao 19 de setembro no centro O Vello Cárcere, de Lugo, e, nesta ocasión, ábrese a participación ás compañías e axentes do sector profesional dos demais territorios do Estado, á fin de favorecer unha maior conexión cultural interterritorial. Durante as tres xornadas, abordaranse cuestións como a inclusión e accesibilidade a partir dun taller de teatro accesible impartido por Chévere, o potencial transformador das artes escénicas desde un enfoque sostible ou mesmo cuestións legais e fiscais claves para as compañías no seu día a día.
Ademais, tamén por vez primeira en Habitación Peregrina PRO, haberá novos espazos de convivencia en horario nocturno, que servirán para que as e os participantes descubran a gastronomía local ou mesmo coincidan nunha “pista de baile” grazas á actividade ¡Discoteca de Señoras… y Señores también!, que contará coa bailarina Marta Alonso Tejada e coa cantante Mounqup como anfitrioas.
AXENDA CAMIÑO ESCENA NORTE | DO 13 AO 15 DE SETEMBRO DE 2024
13.09, ás 19.00 horas | Santiago de Compostela Praza de Praterías (en caso de choiva, será no Salón Teatro) Check Out, de Adrián Conde Espectáculos (AST) Teatro. Público infantil e familiar. Entrada libre ata completar capacidade.
A vida de Eugenio transcorre no vestíbulo dun hotel, entre maletas soña con deixarlle aos fillos un futuro mellor. Un mozo de servizo diferente que, entre equívocos, xogo de clown e moita diversión, descobre ao longo dunha xornada imprevista de traballo que non hai mellor futuro que vivir gozando do presente. Unha historia que convida a reflexionar sobre a importancia da familia e sobre a que lle dedicamos o tempo.
15.09, ás 21.00 horas | Foz Praza Conde de Fontao (en caso de choiva, será na Sala Bahía) By ò Bu. Aproximación al no existir, de Yarleku e El Punto Gunea (NAV) Novo circo. Público adolescente e adulto. Entrada libre ata completar capacidade.
Un espectáculo como unha boa escusa para falar de algo tan real como é o necesitar, nalgún momento dunha vida, durmir para sempre. By ò bu. Aproximación al no existir é un espectáculo que, a través do movemento, o trapecio e a palabra, expón a conversa entre as dúas partes dun mesmo ser. Este diálogo enmárcase nun espazo que ben podería ser a súa propia cabeza, chea de equilibrios e portas ás súas reflexións. Unha conversa sobre a súa existencia e a opción de deixar de existir.
