O XIII Festival Atlántica chega por primeira vez a Vimianzo cunha programación que mestura historia, tradición oral e espírito rebelde en tres propostas gratuítas pensadas para todos os públicos. O Castro das Barreiras e o Castelo —dous espazos cargados de simbolismo— converteranse en escenarios da palabra viva durante os días 29 de xuño e 2 de xullo. Deste xeito, Vimianzo intégrase na ruta do Festival Atlántica, comprometéndose coa cultura oral e a posta en valor do patrimonio a través das historias que nos conectan.
A xornada do domingo 29 de xuño abrirase ás 19:30 horas no Castro das Barreiras cunha visita guiada especial a cargo do arqueólogo e divulgador Ángel Concheiro, tamén coñecido como Tito Concheiro, quen achegará ao público adulto os segredos e a historia deste importante xacemento da Idade do Ferro, un dos mellor conservados da Costa da Morte. A actividade permitirá coñecer de preto os últimos achados e interpretacións sobre este antigo poboado fortificado, descubrindo a súa complexidade, arquitectura e relevancia histórica. Un convite a pisar sobre as pegadas da historia, a escoitar o que nos contan as pedras e a deixar que o pasado nos fale con voz nova desde o corazón da terra.
Cándido Pazó: historias para rir, lembrar e vivir
A continuación, ás 20:30 horas, tamén no castro, o recoñecido actor e narrador Cándido Pazó presentará Contar para vivilo, unha sesión para público adulto chea de humor, emoción e memoria. Co seu estilo inconfundible, Pazó ofrecerá historias e parrafadas que viaxan no tempo e nos levan de volta ás xentes e lugares doutrora.
Durante sesenta minutos, Pazó despregará o seu inconfundible estilo nunha viaxe feita só de palabras: contos, lerias e parrafadas que transitan por outros tempos, outras xentes e outros mundos, pero que falan directamente ás preocupacións e alegrías do presente. Un espectáculo que mestura retranca e tenrura, e no que o escenario se transforma nun lugar de encontro co vivido e co imaxinado. Porque quen sabe contar, fai que queiramos seguir escoitando. E quen escoita, vive dúas veces.
Pepa a Loba: aventuras, misterio e igualdade dende o corazón do conto
A programación completarase o mércores 2 de xullo ás 11:00 horas no Castelo de Vimianzo coa función Procúrase Pepa a Loba, da narradora Cris Collazo, unha proposta para crianzas a partir dos 5 anos —aberta tamén ao público xeral— na que a lenda da famosa bandoleira galega se transforma nun contacontos participativo con música, danza e moito misterio. A actividade forma parte tamén do campamento de verán da vila.
A historia lévanos ata o ano 1890, xusto no día da inauguración da taberna da mítica Pepa a Loba, figura rebelde e lendaria da tradición galega. A súa extravagante gavela —formada por Xan Quinto “o vello”, Maninocente e mesmo Calamity Jane— celebra a ocasión, mais algo se agocha nas sombras: un tesouro perdido que só Pepa coñece… e que precisa da axuda do público para atopar.
A narradora Cris Collazo ofrece un contacontos dinámico e divertido, no que se reivindica a amizade, a aventura compartida e a igualdade de xénero, todo nun entorno que convida a soñar e a xogar coa historia. Un convite para cativar a pequenos e grandes cunha heroína pouco convencional e moitas ganas de facer rebulir a imaxinación.
Palabra viva como amuleto
Co leitmotiv da memoria como amuleto protector, o Festival Atlántica 2025 pon o foco no poder simbólico da narración oral como acto de protección e resistencia. Os sanandresiños de Teixido, pequenas figuras votivas cargadas de desexos e significados, inspiran a imaxe desta décimo terceira edición do festival.
A presenza de Atlántica en Vimianzo é posible grazas á financiación da Xunta de Galicia e da Deputación da Coruña e ao patrocinio do Concello da vila. Vimianzo forma parte das máis de 27 localidades galegas e portuguesas que este ano acollen o festival. Toda a información está dispoñible na web: www.festivalatlantica.gal.
Palabra viva como amuleto
Co leitmotiv da memoria como amuleto protector, o Festival Atlántica 2025 pon o foco no poder simbólico da narración oral como acto de protección e resistencia. Os sanandresiños de Teixido, pequenas figuras votivas cargadas de desexos e significados, inspiran a imaxe desta décimo terceira edición do festival.
A presenza de Atlántica en Santiago e Teo é posible grazas á financiación da Xunta de Galicia e da Deputación da Coruña, ao patrocinio dos respectivos concellos e á colaboración do Museo do Pobo Galego, da A.C. O Galo e do CSC A Rocha. Santiago e Teo forma parte das 27 localidades galegas e portuguesas que este ano acollen o festival. Toda a información está dispoñible na web www.festivalatlantica.gal.
FESTIVAL ATLÁNTICA
Atlántica, Festival Internacional de Narración Oral, naceu no ano 2013 con sede en Santiago de Compostela cunha clara vocación de ser un encontro de voces e historias de perfil atlanticista. Mantén o seu obxectivo de indagar nas raíces comúns das historias do océano, na procura da identidade cultural do Atlántico. Traballa a prol da posta en valor dunha arte escénica amarrada ao territorio, antiga pero adaptada aos tempos, e ampara, xera e difunde unha narrativa integradora, igualitaria e sostible.
O Instituto de Estudos Chairegos (IESCHA), co patrocinio e financiación da Área de Cultura-Vicepresidencia d Deputación de Lugo, e coa colaboración do Concello de Vilalba, e dentro dos actos programados co gallo do 2025-ANO CASTELAO, organiza a representación teatral COUSAS, de Castelao, a cargo do grupo Os Quinquilláns.
O acto terá lugar no Auditorio Municipal de Vilalba o venres 4 de xullo de 2025, ás 20:00 horas.
O Instituto de Estudos Chairegos (IESCHA), coa colaboración do Concello de Vilalba, organiza a palestra CASTELAO POLÍTICO 1916-1950, impartida por Uxío-Breogán Diéguez, historiador e director da cátedra de Memoria Histórica da UDC. Presentará: Marisa Barreiro, presidenta do IESCHA.
O acto terá lugar na Casa da Cultura de Vilalba o xoves 3 de xullo de 2025, ás 20:00 horas.
Tamén permanece aberta ao público na mesma Casa da Cultura a Exposición SEMPRE EN GALIZA 1944-2024.
Ferrol acollerá seis espectáculos entre os días 3 e 5 de xullo, incluíndo un roteiro en barco pola ría e contadas de artistas internacionais como Inés Álvarez ou Simone Negrin
Mugardos recunca como sede cunha programación que inclúe unha proposta sobre a memoria das lavandeiras e un espectáculo co foco na tradición oral zamorana
Todas as activades son gratuítas pero para os roteiros cómpre realizar inscrición previa
Esta edición inspírase nos sanandresiños de Teixido como símbolo de protección e memoria
O Festival Atlántica regresa un ano máis a Ferrolterra cunha programación que consolida esta comarca como un dos epicentros da narración oral en Galicia. Entre os días 3 e 5 de xullo, Ferrol e Mugardos serán escenario de contos, músicas e roteiros narrados cun total de oito propostas gratuítas dirixidas tanto a público infantil como adulto.
Precisamente en Ferrol a programación foi presentada esta semana por José Antonio Ponte Far, concelleiro de Cultura, e Soledad Felloza, directora de Atlántica. O programa ferrolá arrincará o xoves 3 de xullo co espectáculo familiar Un neno, un can, un gato e un pito da valenciana Paula Carbonell, ás 12.00 h no Centro Cívico de Canido. Unha sesión chea de imaxinación, ritmo e tenrura, onde as palabras xogan co público e cada historia convida a rir, sorprenderse e soñar. Ideal para compartir en familia e deixar que a fantasía nos leve da man.
Esa mesma tarde, ás 19.00 h, terá lugar o roteiro Ferrol na historia: a súa igrexa de San Xiao, guiado pola historiadora ferrolá Margarita Sánchez. Grazas á súa voz experta, os participantes terán a oportunidade de entender non só un edificio, senón o espírito dunha época que fixo de Ferrol unha cidade clave na historia de Galicia. Aínda quedan prazas para esta actividade pero cómpre realizar a inscrición previa na web atlantica.gal.
Ás 20.30 h, tamén no Centro Cívico de Canido, o público poderá gozar do espectáculo Polos camiños do norte: unha ponte de contos entre tres terras celtas da contadora Inés Álvarez Villa, que trae desde Escocia un fío narrativo que une ese país conn Irlanda e Asturias, tres terras célticas irmáns que comparten lendas, emocións e memorias. Contos tradicionais e vivencias persoais entrelázanse para construír unha ponte de palabras capaz de atravesar fronteiras, tempos e silencios. Porque contar tamén é recoñecerse no outro, celebrar o común e manter acesa a chama do que nos une.
O venres 4 de xullo, ás 11.00 h, o historiador Guillermo Llorca guiará o roteiro en barco O porto ilustrado, partindo do porto de Curuxeiras. Esta é a terceira proposta de Llorca no marco de Atlántica e desta volta conxuga patrimonio, paisaxe e historia, porque coñecer o porto é entender a alma dunha cidade atlántica. A actividade esgotou as súas prazas ao pouco de ser anunciada nas redes sociais pero a boa acollida animou á organización do festival a ampliar prazas que xa están dispoñibles desde hoxe, mércores 25, na web de Atlántica.
Xa pola noite, ás 20.30 h, Simone Negrin, unitaliano con alma galega, mesturará humor e superstición en Fare le corna, un espectáculo para adultos que se presentará tamén no Centro Cívico de Canido. O público gozará cunha escolma de contos para espantar a mala sorte… á italiana. Historias disparatadas e entrañables que xiran arredor da sorte —a boa, a mala e a que depende de quen conta— nunha sesión que mestura teatro, narración e moita complicidade co público. Porque, como dicía o gran Peppino De Filippo: “Non è vero… ma ci credo!”.
A programación ferrolá pecharase o sábado 5 de xullo cun concerto narrado moi especial: Patios de luz de Su Garrido Pombo (21.00 h, Baluarte de Canido). Trátase dun espectáculo íntimo e emocionante que nos convida a percorrer as curvas da memoria que levan da aldea á cidade… e de volta. É a historia das nosas avoas, das veciñas que marcharon, das hortas que quedaron atrás, dos patios onde latexa a vida que non sae na foto.
Mugardos, historias que cantan á memoria
Pola súa banda, Mugardos repite como sede do festival con dúas funcións no Centro de Interpretación de Caldoval, ambas ás 21.00 h. O xoves 3 de xullo, Vero Rilo e Santi Cribeiro presentarán Lavandeiras, unha emotiva viaxe polas historias de mulleres e a súa relación co traballo, a memoria e a identidade. Mulleres que de xeonllos, coas mans na auga e os pensamentos a ferver, lavaban roupa… e tamén feridas. En Lavandeiras, Rilo e Cribeiro poñen voz e música a esas historias silenciadas que fluíron polos regatos e polos tempos. Un ritual escénico para cantar o que se calou e para tender, ao sol da xustiza poética, as historias de mulleres que lavaron máis que roupa.
Ao día seguinte, o venres 4, será a quenda de Novas historias de filandar, do recoñecido narrador José Luis Gutiérrez ‘Don Guti’, un tributo ás voces anónimas do rural zamorano. Contos que veñen das cociñas acesas, das leiras traballadas, dos seráns compartidos e das voces anciás que gardaban o mundo enteiro nunha historia. Neste espectáculo, o romance e a tradición oral entrelázanse coma fíos nun tear antigo, fiando lembranzas, saberes e emocións. É unha homenaxe sentida a quen contou antes ca nós, a quen nos legou contos como quen deixa un pan na mesa. Un acto de gratitude e de resistencia fronte ao esquecemento, que nos convida a regresar a ese tempo no que a palabra dun vello era necesaria.
Palabra viva como amuleto
Co leitmotiv da memoria como amuleto protector, o Festival Atlántica 2025 pon o foco no poder simbólico da narración oral como acto de protección e resistencia. Os sanandresiños de Teixido, pequenas figuras votivas cargadas de desexos e significados, inspiran a imaxe desta décimo terceira edición do festival.
A presenza de Atlántica en Ferrolterra é posible grazas á financiación da Xunta de Galicia e da Deputación da Coruña, ao patrocinio dos concellos de Ferrol e Mugardos e á colaboración da Asociación Veciñal de Canido e do Centro de Interpretación de Caldoval. Ferrolterra forma parte das máis de 27 localidades galegas e portuguesas que este ano acollen o festival. Toda a información está dispoñible na web: www.festivalatlantica.gal.
FESTIVAL ATLÁNTICA
Atlántica, Festival Internacional de Narración Oral, naceu no ano 2013 con sede en Santiago de Compostela cunha clara vocación de ser un encontro de voces e historias de perfil atlanticista. Mantén o seu obxectivo de indagar nas raíces comúns das historias do océano, na procura da identidade cultural do Atlántico. Traballa a prol da posta en valor dunha arte escénica amarrada ao territorio, antiga pero adaptada aos tempos, e ampara, xera e difunde unha narrativa integradora, igualitaria e sostible.
O sábado 21 de xuño, Eira da Xoana convídanos a un roteiro dos endemismos e a unha obra teatral sobre Castelao.
– O domingo 22, o programa Goza do Ulla organiza un roteiro en Antas de Ulla (ver pdf).
– O sábado 28, Concomitentes, organizado por Ana Escariz, levaranos a un percorrido pola Uloa con diferentes paradas para comprender como se viviría na Ulloa do 2060. A xornada comezará en bus en Palas de Rei ás 10:30h e rematará cunha comida compartida en Do Picho (https://concomitentes.org/).
– O sábado 28, celebrarase durante todo o día en Agolada a feira sostenible Fiando vida.
-O domingo 29, o programa Goza do Ulla organiza outro roteiro en Monterroso (ver pdf).
A Escola Sinsal levará a San Simón as músicas dos cafés e dos actos sociais da primeira metade do século XX en Galicia
O Festival Sinsal SON Estrella e a Orquesta Clásica de Vigo convidarán ao público a viaxar no tempo a través dos microconcertos que ofrecerán os días 25, 26 e 27 na cafetería da illa
Por segundo ano consecutivo, o escenario Malmequeres acollerá as sesións musicais de apertura de cada xornada, na que se recuperarán arquivos analóxicos esquecidos dos anos 80 e 90 da man de Chus Taboada e Eva Izquierdo (Voces de Ultratumba), Marco Maril (Apenino) e dos xornalistas Isabel Díaz e Pedro Blázquez
O investigador e experto Aleks Kolkowski gravará novamente en cilindro fonográfico ás bandas e solistas do festival nas coñecidas ‘Sesións San Simón’
A exposición de cómic d’a Escola Sinsal afondará na divulgación das historias da música e do son e incorporará as personaxes de Mercedes Mariño, Amando Hermida, Manuel Mirás, Fina Galicia, Reveriano Soutullo, Ernesto Lecuona, Ana Kiro e Eloy Luis André
Os abonos e as entradas para o venres 25 e sábado 26 están esgotadas; mais aínda é posible adquirir algunha das últimas entradas para asistir o domingo 27
O Festival Sinsal SON Estrella Galicia dá a coñecer as primeiras actividades paralelas á programación de directos do evento cultural, que terá lugar do 25 ao 27 de xullo en San Simón e cuxo cartel é secreto ata que o público desembarca na illa. Microconcertos de música clásica, sesións de gravación nun cilindro fonográfico, novas audicións Malmequeres ou a incorporación de novas personaxes á exposición de cómic sobre a historia da música e do son en Galicia conformarán as propostas gratuítas que as e os asistentes poderán gozar no marco da liña A Escola Sinsal, o proxecto de Sinsalaudio que promove a difusión e coñecemento da historia dos arquivos sonoros.
Unha das grandes novidades deste Sinsal 2025 será a participación, durante os tres días do festival, da Orquesta Clásica de Vigo. Se na pasada edición rendeu homenaxe a Reveriano Soutullo -coa estrea de arranxos inéditos de La leyenda del beso, da que o compositor ponteareas é coautor-, este ano a formación propón outra viaxe ao tempo, desta queda ao compás das músicas de cafés, bailes e verbenas que tiveron en lugar en Galicia na primeira metade do século XX. A intención non é outra que poñer en valor o papel das obras interpretadas por músicos locais, instrumentistas anónimos, que realizaban un traballo ben relevante antes da popularización da música gravada, como era levar os sons e os ritmos a todos os territorios.
Na primeira das xornadas, a Orquesta Clásica de Vigo, a través dun sexteto de café, evocará desde a cafetería de San Simón un insólito filme galego de vangarda: Canto de emigración, unha peza rodada no 1935 polo ourensán Tony Román, da que unicamente se conversan vestixios que axudan a visualizar a película, e a partitura que o tudense Teódulo R. Páramos compuxo para acompañar as imaxes. Xa de cara ao sábado 26 e 27, a orquestra presentará Rumbantela. Unha formación dun cuarteto de saxofóns revisará estilos musicais que fixeron bailar as xeracións de galegas e galegos da primeira metáde do século pasado. Haberá pezas orixinais, grandes éxitos do momento, xoias preservadas dun arquivo persoal e tamén a memoria da banda de música de Sande (Ourense).
Novas Sesións San Simón
Outro dos clásicos d’A Escola Sinsal volverá á illa este verán. Trátase das Sesións San Simón, as gravacións en cilindro fonográfico realizadas ao vivo polo investigador e experto Aleks Kolkowski. Nelas participan -de xeito moi activo- as bandas e solistas que conforman o cartel secreto do festival, e consisten no rexistro dunha canción, de dous minutos, nun cilindro de cera. As sesións, que este ano se desenvolverán nun único espazo -a cafetería da illa- durante de toda a fin de semana, son abertas para o público asistente. As persoas que se acheguen poderán gozar dun feito cultural único co que viaxarán, a través do son e durante uns instantes, cen anos atrás. Algunhas das gravacións realizadas nas pasadas edicións pódense escoitar e visualizar en www.sinsalaudio.es.
Audicións no escenario Malmequeres
Un dos escenarios que se estrearon na pasada edición, Malmequeres, regresará neste 2025 para ofrecer novas sesións dentro da programación d’A Escola Sinsal. A Praza de San Simón (detrás da igrexa) acollerá a cabina que recibirá visitas de DJs durante o festival, mais tamén das convidadas das audicións Malmequeres, que serán as encargadas de abrir, cada xornada (de 12:45 a 13:45 aprox.), as actividades do festival con mesturas que farán a partir de arquivos analóxicos esquecidos.
Así, o venres 25, Chus Taboada e Eva Izquierdo (da banda punk rock Voces de Ultratumba) revisarán o seu arquivo dos anos oitenta. Ao día seguinte, o sábado 26, Marco Maril (Apenino), recuperará a súa etapa radiofónica dos anos 90 en Radio Medellín (Santiago de Compostela) e o proxecto editorial da desaparecida Sala Nasa ou o nomeado “rock parrulo”. Finalmente, o domingo 27 será a quenda de Isabel Díaz e Pedro Blázquez, dous xornalistas históricos da cultura de clubs e da música electrónica que contaron numerosos programas especializados en RNE ou Cadena SER.
Mercedes Mariño, Ana Kiro e Reveriano Soutullo incorpóranse á mostra d’A Escola Sinsal
A programación paralela d’A Escola Sinsal completarase coa ampliación da exposición de cómic que recompila e divulga a historia do son e da música gravada en Galicia a través de personalidades do país que tiveron relación coa mesma, e que abrangue desde o século XVII até o século XX.
Se o ano pasado 8 debuxantes representaban as historias de Domingo Martínez de Presa, Severino Pérez Vázquez, Andrés Avelino Comerma, Emilia Pardo Bazán, Enrique Labarta Pose, Maruja Boga, Pedro Ferrer ou os irmáns Portela Seijo; este ano outros súmanse outras tantas figuras interpretadas por outros tantos debuxantes: Mercedes Mariño (Julia Lago), Amando Hermida (Carlos G. Boy), Manuel Mirás (Nico Ben), Fina Galicia (María Ramos), Reveriano Soutullo (Paw Salcés), Ernesto Lecuona (Paula Guerrero), Ana Kiro (Luis Yang) e Eloy Luis André (David González López).
Esta historia gráfica arredor da música gravada en Galicia contempla outra novidade, xa que estas personaxes e os cómics exhibiranse no exterior, a ceo aberto, e público poderá descubrir os contidos tanto na zona dos escenarios coma noutras instalacións do festival.
SINSAL SON ESTRELLA GALICIA
Sinsal SON Estrella Galicia é unha iniciativa cultural que visualiza as artistas próximas á creación contemporánea da escena galega, estatal e internacional. Cada verán ofrece na illa de San Simón unha pequena mostra dos proxectos musicais máis estimulantes de formacións que proceden de Europa, África Asia ou América. Para poder acceder ao festival o público debe coller os barcos que Sinsal pon á súa disposición no porto de Vigo e no Centro de Interpretación de Rande (Meirande).
O transporte ata a illa (e a volta desde a mesma) está incluído no billete e os prezos son diferentes en función do embarcadoiro (que sempre é o mesmo para a saída e o regreso) e da idade, sendo máis económico o acceso para menores de 16 anos. Os abonos da edición de 2025 están esgotados, ao igual que as entradas do venres 25 e do sábado 26; mais aínda é posible adquirir, a través da plataforma Enterticket, as últimas entradas para o domingo 27 de xullo.
Sinsal SON Estrella Galicia é un festival organizado e producido pola promotora viguesa Sinsalaudio, que conta con SON Estrella Galicia como patrocinador principal, e co apoio institucional tanto da Xunta de Galicia a través da Axencia Galega das Industrias Culturais (Agadic) como da Deputación de Pontevedra a través de Turismo Rías Baixas -enmarcado nos Rías Baixas Fest-.
