O director do Festival Internacional de Arpa Vila de Noia, Rodrigo Romaní, presentou esta mañá en Santiago de Compostela a programación do evento, que contará con artistas de Alemania, Chile, Escocia, España, Francia e Irlanda
‘Hibrys’, a obra do compositor arxentino Alejandro Civilotti gañadora do I Premio Portus Apostoli, estrearase o sábado 5 de agosto na Praza do Tapal da man da Real Filharmonía de Galicia
Noia Harp Fest, en colaboración co Instituto de Investigacións Sanitarias de Santiago de Compostela, levará esta primavera a música da arpa ás consultas do CHUS co proxecto ‘Boas vibras. Arpistas pola saúde’
A décima edición do Festival Internacional de Arpa Vila de Noia, coñecido como Noia Harp Fest, celebrarase do 3 ao 6 de agosto. O director do certame, Rodrigo Romaní, presentou esta mañá un avance da programación do evento, que festexará os seus primeiros dez anos de vida poñendo en valor a creatividade e a extensión social da arpa. Así, o festival acollerá, entre outras propostas, a estrea absoluta de tres obras, concertos de recoñecidas arpistas internacionais ou un novo encontro do alumnado das escolas de arpa de Galicia; ademais de ampliar a súa actividade achegando o instrumento aos centros hospitalarios co programa piloto Boas vibras. Arpistas pola saúde.
Rodrigo Romaní, acompañado polo concelleiro de Cultura de Noia, José Pérez, e da directora técnica da Real Filharmonía de Galicia, Sabela García, presentou hoxe no Auditorio de Galicia a programación de concertos que terán lugar no marco desta décima edición do Noia Harp Fest, o único festival de Galicia e do noroeste da Península Ibérica que ten como absoluta protagonista a arpa. No seu cartel conflúen, desde hai dez anos, solistas e grupos de estilos moi diversos procedentes do ámbito galego, estatal e internacional, mais todos eles unidos pola interpretación musical a través da arpa. Os concertos, de acceso libre e dunha notable calidade artística, celébranse en horario de tarde tanto a ceo aberto coma no interior de recintos culturais da vila de Noia, cuxo Concello é patrocinador do evento, coa intención de favorecer o achegamento ao instrumento por parte de públicos de todas as idades. A este respecto, Rodrigo Romaní avanzou que o festival dará a coñecer, nas vindeiras semanas, o programa de actividades paralelas, que inclúe as habituais clases maxistrais ou mesmo obradoiros familiares.
Unha das principais novidades deste 10º Noia Harp Fest é a estrea mundial de Hibrys, do hispano-arxentino Alejandro Civilotti. Trátase da obra gañadora da primeira edición do premio internacional de composición Portus Apostoli, patrocinado polo Concello de Noia. A Real Filhamonía de Galicia será a responsable de interpretar unha peza que, segundo o tribunal do certame, foi a máis destacada das 16 composicións recibidas pola súa “alta calidade e interese”, á vez que mostra unha “elevada técnica orquestral, onde a arpa e a orquestra concertan á perfección”. A estrea terá lugar na noite do sábado 5 de agosto na praza do Tapal de Noia.
Programación de concertos do 10º Noia Harp Fest
A décima edición do Noia Harp Fest dará comezo o xoves 3 de agosto cunha sesión festiva e que porá en valor o talento local e de proximidade. O alumnado das escolas de arpa de Galicia participará, por segundo ano consecutivo, nun encontro aberto ao público. Trátase da proposta máis singular deste eido no país, ao por en relación a todas e todos os estudantes do instrumento. O obxectivo do NHF é que este Encontro sexa unha referencia para o alumnado e que elas e eles sexan sempre as protagonistas da apertura do festival. Logo deste concerto, terá lugar unha foliada de benvida e, de seguido, un concerto do chileno Crístian Rodríguez Cuarteto será o ramo desta xornada inaugural.
O venres 4 estará fiado polo virtuosismo de mulleres arpistas do ámbito do folk. A irlandesa Laoise Kelly, considerada a máis relevante da súa xeración, abrirá a segunda xornada de concertos na igrexa de Santa María a Nova. Pioneira nun novo estilo de conducción da arpa instrumental e recoñecida pola crítica polos seus traballos en solitario, ao longo da súa carreira -na que fundou grupos como Bumblebees ou Fiddletree- participou na gravación de máis de 70 álbums con artistas como Seamus Heaney, The Chieftains ou Sharon Shannon.
Ás 21.00 horas, na praza do Tapal, será a quenda do dúo franco-alemán conformado por Gilles Chabenat e Daniela Heiderich. Cunha arpa de levas bohemia, zanfona, voz e gaita francesa, os dous músicos evocarán melodías de baile conmovedoras e cancións profundamente emotivas, no marco dun repertorio que incluirá tanto composicións propias modernas como músicas tradicionais francesas e alemás, ou mesmo melodías de manuscritos antigos. A noite pecharase cunha das bandas que irromperon na escena folk dos anos 90 para mudala: The Poozies. Esta agrupación totalmente feminina fíxose moi coñecida polas súas xiras mundiais, nas que amosaban os seus arranxos inusuais e emocionantes, ademais de harmonías vocais conmovedoras. Cunha formación renovada, The Poozies será unha das grandes sensacións do festival pola súa gran colección de temas e melodías groovy.
O sábado 5, o Noia Harp Fest e a Asociación Española de Arpistas renderán unha homenaxe especial ao músico e virtuoso Nicanor Zabaleta, considerado o mellor intérprete do instrumento, no trixésimo aniversario da súa morte. Será cun concerto, que terá lugar no Teatro Coliseo Noelia, no que intervirán solistas de prestixio internacional para interpretar obras adicadas á súa figura. De seguido, contra ás 21.30 horas, será a estrea mundial de Hibrys, coa Real Filharmonía de Galicia, na praza do Tapal. Nas vindeiras semanas darase a coñecer a ou o intérprete solista.
A última xornada da décima edición do Noia Harp Fest comezará ás 19.00 horas do domingo 6 de agosto cun concerto da arpista, cantante e artista multidisciplinar Musgö, especialista en looping ao vivo e arpa eléctrica. O seu traballo é unha mestura de contemporáneo e vintage, cunha posta en escena atrevida e elegante que se poderá ver no Teatro Coliseo Noela. Finalmente, o broche dourado do evento chegará da man da orquestra de folk de Galicia. SonDeSeu estreará na praza do Tapal dúas novas composicións creadas especificamente para este concerto: serán a Suite Micelio, de Anxo Pintos, para arpa e orquestra folk, que contará con Begoña Riobó como solista; e a Suite Escumas Atlánticas, de Rodrigo Romaní, na que serán solistas Laoise Kelly, Mary Macmaster e Beatriz Martínez.Programa piloto ‘Boas vibras. Arpistas pola saúde’
A presentación tamén serviu dar a coñecer a posta en marcha deBoas vibras. Arpistas pola saúde, un programa piloto que porán en marcha a Asociación Noia Harp Fest e a Fundación Instituto de Investigacións Sanitarias de Santiago de Compostela para favorecer a presenza da música de arpa en centros hospitalarios. A intención é acompañar a mellorar da humanización na asistencia aos pacientes así como o aproveitamento dos beneficios que supón esta práctica para a saúde, estudados e analizados noutras experiencias similares realizadas en diversas partes do mundo.
A experiencia piloto desenvolverase con pacientes de Pediatría do Complexo Hospitalario Universitario de Santiago de Compostela e estará controlada polo persoal sanitario. Cinco arpistas visitarán nas vindeiras semanas aos pacientes, establecendo unha comunicación sonora baseada na personalización da música que se interpreta, centrada na adaptación ás características e á situación de cada persoa, primando tamén a improvisación musical para chegar a provocar cambios positivos e observables na súa evolución.
A cuarta edición da Semana do Cinema Galego, unha das citas audiovisuais da tempada máis senlleiras, vai clausurar este domingo, 19 de marzo, a súa cuarta edición con Valentina, dirixida por Chelo Loureiro e producida por Abano Producións, Sparkle Animation e El Gatoverde Producciones. A proxección da cinta, gañadora do Premio Goya á mellor longametraxe de animación no 2022, vai ser ás 11:30 h e o acceso será de balde, con entrada libre, por orde de chegada, ata completar o aforo.
Grandes e pequechos están convidados a acompañar a Valentina, unha nena con síndrome de Down, na súa aventura para facer realidade o seu soño: ser trapecista. Ademais, a presentación da película vai contar coas intervencións de Chelo Loureiro, directora, produtora e guionista; Alicia Rábade, voz de Valentina nas cancións; e Lucía Serén, dobradora de Valentina na versión en galego.
O equipo de Valentina posará para os medios mañá sábado, ás 10.30 h, no Palco da Música dos Xardíns de Méndez Núñez, e, a continuación, ás 11.00 h, no interior do Teatro Colón.
Valentina de Chelo Loureiro Valentina soña con ser trapecista, pero coida que nunca o dará logrado por ter síndrome de Down. A súa avoa -que lle ensina a xogar ao xadrez e mais unha morea de cancións- anímaa sempre a perseverar: se os vermes se dan tornado en bolboretas, nada é imposible. Nunca debemos perder a ilusión nin as gañas de aprender; olla para min -di a avoa-, eu aínda estou decidida a ser directora de orquestra algún día! Pero Valentina non está moi convencida; pensa que un verme é demasiado noxento para se converter nunha bolboreta… Como será esa metamorfose da que fala a avoa? Ao se dispor a preguntarllo, Papá e Mamá danlle unha desconcertante noticia: a Avoa marchou de viaxe. De viaxe? Sen se despedir?!
A cuarta edición da Semana do Cinema Galego, unha das citas audiovisuais da tempada máis senlleiras, proxecta este sábado as películas Live is Life e O corpo aberto. O acceso á ambas as dúas películas será de balde, con entrada libre, por orde de chegada, ata completar o aforo.
A sesión do sábado 18 estará composta por un programa dobre de longametraxes de ficción con estilos moi diferentes. De primeiro, ás 19.30 h, a cita é coa comedia Live is Life dirixida por Dani de la Torre e producida por 4 Cats Pictures, Atresmedia Cine e Frida Films. O elenco deste filme coral está integrado por Adrián Baena, Juan del Pozo, Raúl del Pozo, David Rodríguez, Javier Casellas, Toni Garrido e Marc Martínez, entre outros.
Un chisco máis tarde, ás 22.00 h, será o filme gótico O corpo aberto de Ángeles Huerta quen tome a pantalla do Colón, con Tamar Novas e María Vázquez como protagonistas. O público coruñés vai ter a oportunidade de gozar novamente en pantalla grande da gran triunfadora da última edición dos Mestre Mateo, que está producida por OlloVivo Producións, Fasten Films e Cinemate. O filme alzouse con doce galardóns dos dezaseis aos que optaba, entre eles os das categorías de longametraxe, dirección e guión así como as de mellor interpretación masculina protagonista e de reparto para Tamar Novas e Federico Pérez, respectivamente. Na presentación d’O corpo abertoparticiparán a directora Ángeles Huerta, a responsable da montaxe, Sandra Sánchez, e mais o produtor Gaspar Broullón, nun coloquio guiado polo xornalista especializado Javier Trigales
O equipo d’O corpo aberto posará para os medios mañá sábado, ás 18.30 h, no Palco da Música dos Xardíns de Méndez Núñez, e, a continuación, ás 19.00 h, no interior do Teatro Colón. A actividade comezará ás 19.30 h.
Live is Life de Dani de la Torre Verán de 1985. Como cada ano, Rodri deixa Cataluña e volve á aldea galega dos seus pais para se reencontrar cos amigos. Mais este ano é distinto para eles. Os problemas do mundo real comezan aparecer nas súas vidas ameazando con separalos.
Aferrándose á amizade que os une, os cinco amigos planean escapar a noite de San Xoán na busca dunha flor máxica que, segundo conta a lenda, medra no alto dunha montaña e pode facer os desexos realidade.
O corpo aberto de Ángeles Huerta 1909. Miguel, un mestre novo, é destinado a unha pequena vila de montaña na fronteira entre España e Portugal: Lobosandaus, unha aldea inhóspita e de tradicións ancestrais. É un home de razón, pero non pode controlar os seus desexos pasionais e, conforme se achega o inverno, sente como a escuridade se apodera de todo ao seu redor á vez que crece a súa fascinación pola enigmática Dorinda.
Nun lugar dominado pola superstición, a estraña morte dun veciño da aldea libera un espírito en busca dun corpo que lle permita seguir coa súa existencia, o que levará a Miguel a cuestionar os límites entre o mundo dos vivos e o dos mortos.
A banda máis emblemática do hip hop do país actuará no Playa Club a partir das 22:00 horas, nunha cita que contará coa colaboración de Boyanka Kostava e cuxas entradas están dispoñibles en www.enterticket.es
Dios Ke Te Crew, a banda máis emblemática do hip hop galego, actuará hoxe, sábado 18 de marzo, na Coruña. A cita. que comezará ás 22:00 horas, enmárcase na nova xira do grupo, nomeada Tremendos Anos 20, coa que o grupo celebra o seu vixésimo aniversario sobre os escenarios revisando os grandes éxitos da súa traxectoria e presentando as súas últimas creacións. O Playa Club acollerá o segundo directo da xira, nunha actuación na que tamén estará presente Boyanka Kostova, o dúo de referencia do trap galego, formado por Sibran Yiyi e O Chicho do Funko (coñecido tamén polo seu proxecto musical Ortiga). As entradas están á venda na plataforma www.enterticket.es
Dios Ke Te Crew é historia do rap en galego. Desde a súa formación no 2003, a banda conformada por Mou, Sokram, Jamas e Dj Murdock destacou polo seu enxeño, habilidade narrativa e humor próximo á actualidade. Logo da publicación de tres LP e percorrer ducias de festivais e salas de concertos por toda Europa, DKTC publicou o pasado 2022 En que ano estamos?!, un EP con cinco temas nos que os seus membros demostran por que é considerada como a banda máis mítica do hip hop do país. Entre os novos tracks, acompañados por pezas audiovisuais de Xaime Miranda, destaca un dos himnos dos últimos tempos:OG (Orixinal Galego) con Boyanka Kostova.
Este mes de marzo DKTC regresa ás salas ca xira Tremendos Anos 20, na que presenta unha potente posta en escena audiovisual: as imaxes creadas polo artista de renome internacional e precursor do Gif Art, A.L. Crego, arroupan e interactúan co contido das cancións de DKTC, aumentando de maneira exponencial ás xa de por si enérxicas actuacións que caracterizan á banda.
CONVOCATORIA – DIOS KE TE CREW NA CORUÑA
Acto: concerto na Coruña da xira ‘Tremendos Anos 20’ Data: sábado 18 de marzo Hora: 22:00 horas (21:30 horas apertura de portas) Lugar: Playa Club (Andén de Riazor s/n)
As actividades desenvolveranse ao redor do 20 de marzo e nelas participan tamén -nas cidades correspondentes- Sete Falares, Falando a Boca Chea e integrantes de NOGA, a asociación de profesionais da Narración Oral de Galicia
Unha vintena de artistas espallaranse por varias cidades e vilas do país para celebrar a arte máis antiga do mundo
A XI edición do Festival Atlántica vaise celebrar durante o verán, máis o encontro non quere deixar de festexar unha das súas citas máis emblemáticas: o Día Internacional da Narración Oral. Daquela, o 20 de marzo, unha trintena de espectáculos vaise desenvolver en múltiples puntos de Galicia grazas á colaboración cos festivais Sete Falares de Pontevedra e Falando a Boca Chea da Coruña e mais os integrantes do colectivo NOGA.
As historias en estado puro percorrerán os barrios, bibliotecas, teatros e auditorios de Santiago de Compostela, Lugo, Pontevedra, A Coruña, Vigo, Lalín, Sanxenxo, Combarro, Ordes, A Laracha, Baiona, Burela, Narón, Culleredo, Meis, Moaña, Padrón, Salcedo, Negreira, Monforte, Forcarei, Vedra, A Guarda, Carral, Carballo, Teo. Será un día de festa e tamén de reivindicación.
Nesta edición a celebración salienta polo seu carácter moi solidario, xa que @s artistas o día 20 de marzo, percorreran as aulas e salas do Hospital Clínico de Santiago, do Provincial de Pontevedra, do Salnés e Montecelo levando historias aos pacientes de todas as idades dos diferentes centros médicos.
Entre os artistas participantes figuran Vero Rilo, Atenea García, Raquel Queizás, Dani Blanco, Carlos Rebolo, Charo Pita, Ángeles Goás, Cris Collazo, Olga Abad, Celso F. Sanmartín, Ana Meilán, Ramiro Neira, Pablo Díaz, Larraitz Urruzola, Cris de Caldas, Carme Domech, Quico Cadaval, Sole Felloza, Pavís Pavós, Baobab, Migallas e Polo Correo do Vento e a Street Band de jazz.
Ademais, nesta edición o histórico narrador, mestre de narradores, escritor e director de teatro José Campanari é o autor do Manifesto, un texto que dende hoxe chegará aos centros de ensino, bibliotecas e concellos para lembrar nestes tempos de tecnoloxías e pausas inexistentes a importancia e a necesidade das historias a viva voz, o encontro cos outros ao redor dunha mesa, para celebrar a memoria, a identidade e a lingua.
A información sobre as diferentes actividades vaise difundir a través das redes sociais das entidades participantes.
Unha arte de sempre e moi viva
A narración oral é unha arte escénica de pequeno formato que está presente en todas as programacións de xeito diario en Galicia. Programacións nas que a asociación de profesionais da Narración Oral Galega (NOGA) insta a ser valorada e recoñecida coma unha arte rica creativa e sólida con capacidade de adaptación a espazos moi diferentes.
Por iso levan traballando dende os festivais e NOGA para visibilizar e poñer en valor o seu oficio poñendo a Galicia e a súa lingua no mapa universal das historias. No Día Internacional da Narración Oral conmemórase a arte de narrar de viva voz, manifestación artística tamén denominada contacontos. Celébrase cada 20 de marzo, coincidindo co equinoccio de primavera. A festividade tivo a súa orixe en Suecia no ano 1991 e, aos poucos, fóronse engadindo outros países.
O parque Rosalía de Castro é un dos meus lugares preferidos da cidade das murallas, algo que arrastro xa desde a época de estudante, cando o estrafalario pavo real despregaba as espectaculares plumas da súa cola ao tempo que emitía o coñecido son de apareamento.
Así, cando preciso de sosego ou, por que non, de inspiración, alí acudo. Foi o que fixen o outro día. Necesitaba un personaxe para un relato, e que mellor sitio para atopalo. Senteime no meu banco favorito a carón da centenaria sequoia e alí agardei. A tarde estaba bastante agradable, pero apenas había xente: uns pais con dúas fillas dándolles de comer aos parrulos; unha parella de adolescentes sentados nun banco próximo, cada un absorto no seu móbil; algún que outro transeúnte; un encargado do mantemento varrendo…
Pasarían uns dez minutos e unha muller, rondando os corenta, séntase no mesmo banco que había un intre acababan de deixar baleiro os adolescentes. Saca do bolso un cigarro e ponse a fumar. Eu continúo coma cando cheguei, dándolle ao caletre, por ver se me saía algunha historia. Tras darlle a derradeira calada, a muller érguese e diríxese á papeleira máis próxima para depositar a cabicha; regresa de novo e agora, despois de remexer un bocado no bolso, retira do mesmo, un libro.
Ao principio non mo podía crer. Tiven que esvarar ata o extremo do banco e, mesmo incorporarme un pouco e con certa prudencia para que a compañeira de parque non se decatase, a fin de comprobar que, efectivamente , o libro que tiña entre as mans era “Paseando canguros”.
Xa non lle puiden quitar ollo. Totalmente concentrada na lectura pasaba folla tras folla, de vez en cando asomándose un pequeno sorriso por entre os seus beizos. Tiña que facer algo para falar con ela. Pero que? Se aínda fumase, podía ir pedirlle lume. Tamén podía preguntarlle a hora, pero xusto uns segundos antes soara o meu móbil, por mor dun WhatsApp, momento en que levantou a vista e ficou mirando cara a min.Tiña a opción de dirixirme directamente a ela e preguntarlle que libro estaba a ler, pero a miña timidez, impedíamo.
Estaba xa a superarme a situación, cando decidín marcharme e esquecerme do asunto. Mais xusto ao erguerme, lembreime de que no bolso tiña tamén un libro dos canguros (sempre levo algún, por se se dá o caso de encasquetarllo a alguén). Volvín sentarme e saquei o libro. Fixen que lía e ao cabo dun cacho deixeino sobre o banco. Sacando o móbil do bolso púxenme a falar en voz alta para que me oíra ao tempo que me erguía e me encamiñaba cara a saída.
—Señor, señor —oín como me berraba—que deixa o libro.
—Ah! Que despiste o meu! —exclamei, colléndoo e erguéndoo ben para que o vise— Moitas grazas.
—Que casualidade. Eu tamén estou lendo o mesmo—dixo, mentres mo amosaba.
—Non me diga —respondinlle, simulando sorpresa—. Ás veces danse estas coincidencias.
—Por certo. A súa cara fáiseme coñecida. Por casualidade non tocará nun grupo?
—Tocar, toco o acordeón, pero son un afeccionado. Débese confundir con outro —contesteille.
—Pois a verdade é que se me fai moi coñecido.
Realmente estaba metido nun canellón sen saída. Despois de toda a comedia que viña de representar como lle ía dicir que eu era o autor do libro? É máis, tiña que liscar xa. Que vergoña se ao final me descubría! Así que despedinme sen máis, mesmo dun xeito que podía denotar certa mala educación.
Non andaría cen metros, cando escoito a alguén detrás de min berrando: “Suso, Suso, agarda, agarda…” Pensei que me daba algo.Estaba descuberto. Nese momento recibín un pequeno golpe no brazo esquerdo. “Perdoe, señor”, escoitei, mentres seguía berrando: “Suso, Suso…” e me adiantaba. Uns metros máis adiante un home dábase a volta e agardaba por ela. Respirei tranquilo.
