Paula Quintas estrea o seu novo espectáculo AURORA BOREAL
Aurora Boreal: Unha danza sobre a fugacidade da vida e a forza vital.
En Carballo dentro do programa Primavera en Danza na súa XXIII edición a compañía Paula Quintas&cia, presenta Aurora Boreal, unha peza de danza contemporánea que convida á contemplación e á reflexión sobre a fugacidade da vida e a súa conxelación fronte a unha sociedade de consumo fugaz. A obra explora a loita do ser humano ante as forzas da natureza e a percepción do tempo, creando un espazo onde o movemento e a atmósfera se entrelazan para ofrecer ao público unha experiencia única.
A través do corpo en movemento, Aurora Boreal reflexiona sobre a brevidade do existir, mostrando un combate entre a efemeridade da vida e a forza da natureza. A peza utiliza a metáfora dunha flor que loita por nacer e sobrevivir nun espazo hostil, resaltando a beleza da forza vital que, a pesar das adversidades, persiste e se manifesta. Este contraste entre a loita e a beleza que xurde da adversidade é un dos eixos centrais da obra.
Cunha estética nórdica e unha forte inspiración nas luminosidades fugaces das xeografías do norte, Aurora Boreal explora tamén a velocidade e a serenidade do efémero. As luces que iluminan o escenario imitan a intensidade e a fugacidade das auroras boreais, un fenómeno que só se manifesta en determinados momentos do ano e que, ao ser tan breve, deixa unha sensación de serenidade que se esfuma rapidamente.
Aurora Boreal non só é unha obra de danza contemporánea, senón un convite a experimentar a beleza do tránsito efémero da vida e da natureza. Un espazo para a reflexión, a paciencia e a admiración por aquilo que é breve pero significativo. O público terá a oportunidade de vivir un momento único, que se presenta como unha metáfora visual e emocional do noso propio paso polo mundo.
A peza será presentada no Pazo da cultura de Carballo o 28 de Marzo de 2025, e está dirixida a todos aqueles que desexan mergullarse nunha experiencia sensorial e poética, onde a danza, a luz e a composición musical se combinan para ofrecer unha reflexión profunda sobre a vida e o tempo.
Aurora Boreal é un proxecto apoiado pola Agadic a través das axudas á creación.
FICHA ARTÍSTICA E TÉCNICA
Dirección: Rut Balbís
Asesoria de movemento: Tanit Cobas
Interpretación: Paula Quintas
Vestiario: Jandro Villa
Iluminación: Octavio Mas
Composición musical: Macarena Montesinos e Nacho Muñoz
Composición audiovisual: Carla Andrade
Asesoría artística: Manu Lago- Galicia Danza Contemporánea.
Distribución: Lilian Portela- AMARELO Distribución Escénica
Foto: Alberte Peiteavel
Audiovisual: Miramemira
Colaboradores: Concello de Carballo, Teatro Ensalle, A Casa Vella, Ifgae, Fundación Granell, Paso a dos, Concello da Estrada, LaboGo Donosti, Centro coreográfico Galego, Arturo Cobas, Xacobo Torres, Javier Quintana.