Neste tema, producido por Juan de Dios Martín, a banda desata a súa rabia nunha canción intensa e pegadiza, e que marca o rumbo dun disco cheo de carácter e alma, e que verá a luz no 2025
De Ninghures publicará este venres, 22 de novembro, Corazón alionado. Trátase do primeiro avance que a banda dá a coñecer do que será o seu novo traballo discográfico, un álbum que verá a luz nos primeiros meses de 2025.
Corazón alionado, producido polo recoñecido Juan De Dios Martín, é unha peza con carácter que remarca a identidade dunha banda que pon en valor a música de raíz e a creación contemporánea. Desta quenda, De Ninghures presenta un tema no que o grupo desata a súa rabia nunha canción intensa e pegadiza. “Nace dun corazón enfurecido, que se eriza como un gato ao sentirse ameazado, nunha mestura explosiva de escuridade e forza”, expón a formación, quen apunta que o retrouso de Corazón alionado nace dunha melodía tradicional da Terra de Miranda e cuxas letras se inspiran en coplas tradicionais de diferentes puntos do país.
De Ninghures
De Ninghures fan música cos pés na terra e os brazos abertos. Son unha das bandas referentes da potente e rica escena actual en Galicia. Un grupo que mestura mestría musical e actitude desenfadada, que sorprende en cada canción coas súas diferentes voces e a súa actualización das coplas e melodías populares, e que nos fai tanto bailar como emocionarnos coa súa particular fusión da música tradicional galega con ritmos e inspiracións doutras culturas como a latinoamericana ou a magrebí.
En 2022 publicaron Aquí, o seu primeiro álbum, e máis de medio cento de concertos e algúns sinxelos despois – coma o exitoso Morena, galardoado como Mellor Música do Ano en Galicia nos Premios Ari(t)mar, ou a enérxica muiñeira de montaña Poço-, a comezos de 2025 presentarán traballo novo, do que nos adiantan xa Corazón alionado.
De Ninghures estrea este venres 5 de xullo o seu novo sinxelo, ‘Poço’, “un convite ao baile, ao bo rollo e á foliada”
O grupo, gañadordos Premios Ari(t)mar áMellor Música do Ano en Galicia polo seu tema Morena, presenta este verán un tema ateigado de “enerxía, naturalidade, desenfado e que invita ao público a pasalo ben”
A banda actuará mañá, venres 5, no ciclo Atardecer no Gaiás, e nas vindeiras semanas participará en Festigal, Carballeira de Zas, Festiletras ou Revenidas
“Vén bailar, vén bailar”. O retrouso do novo sinxelo de De Ninghures é explícito e directo: un auténtico convite ao baile, á festa e á foliada. A banda publica este venres 5 de xullo o seu novo tema,Poço, unha muiñeira enérxica, ateigada de “aire fresco bo rollo e naturalidade”, na liña da propia esencia da formación, e que desta quenda pretende convidar ao público, dun xeito sinxelo e desenfadado, “a pasalo ben”.
Poçoestará dispoñible a partir das 00.00 horas do día 5 nas principais plataformas dixitais. Nesta ocasión, o novo sinxelo de De Ninghures acompañarase dunha peza audiovisual moi especial e que estará dispoñible na súa canle de Youtube: rodada cunha Handycam polos propios membros do grupo, o videoclip pretende reflectir, con naturalidade, o día a día da propia formación, á vez que traslada o espírito de festa e foliada que a define.
“Queremos que cando a xente escoite Poço, unha muiñeira de montaña con moita enerxía, como as que nos gustan, sinta ese convite ao baile, ao bo rollo, á foliada. Que a xente sinta como propio o que cantamos e que se vexa reflectida nesa letra, nese retrouso e nesa onda de desenfado, desinhibición e alegría”, sinala o grupo, recoñecido pola súa capacidade de experimentar con influencias musicais de todo o mundo sen perder o seu obxectivo: por en valor a música de raíz e a creación contemporánea.
De Ninghures, agrupación conformada por músicos con notable experiencia procedentes de Bergantiños, Compostela e A Fonsagrada, foi recoñecida publicamente esta primavera co galardón á Mellor Música do Ano en Galicia dos Premios Ari(t)mar polo seu temaMorena, un sinxelo que dá boa conta dun dos seus máis claros sinais de identidade: a unión orgánica entre a tradición galega e a música dance, e que tamén está presente, dalgún xeito, neste novo Poço, tema do que a banda dará boa conta nos vindeiros directos que ofrecerá este verán. O primeiro deles terá lugar mañá mesmo, venres 5, en Santiago de Compostela, no marco do ciclo Atardecer no Gaiás. Entre as citas destes meses tamén están eventos como Festigal, Festa da Carballeira de Zas, Festiletras ou Revenidas, entre outras moitas.
Este sábado, 25 de febreiro, ás 20 horas, De Ninghures, en concerto, presentarannos o seu traballo “Aquí” na Casa-Museo Manuel María. Oito mozos e mozas que nos marabillarán tocando as músicas de raíz e cunha grande variedade de instrumentos: viola caipira, bongos, frauta traveseira, violín, bombo, ukelele, acordeón, pandeireta, clarinete, gaita, guitarras, pandeiro, voces, cabás…
Velaí algunha mostra da traxectoria musical deste grupo…
