Recital MANIFESTO 25 N na Feira do Libro da Coruña o luns 9 de agosto

O vindeiro luns 9 de agosto, a partir das 18:30 h., dentro do marco de actividades que se celebran na 50ª Feira do Libro da Coruña, terá lugar un recital colectivo do libro MANIFESTO 25 N. 30 Voces Pola Eliminación da Violencia contra a Muller, editado baixo o selo de Alvarellos Editora. Dito recital, promovido pola propia editorial, contará con autoras coma Arancha Nogueira, Adolfina Mesa, Andrea Fernández Maneiro, Beatriz Maceda Abeleira, Viki Rivadulla, que son algunhas das voces cuxas obras aparecen na mencionada publicación.

Presentación do libro “Obra inacabada de Dosinda Christensen”, de Xerardo Quintiá, na Casa da Cultura de Vilalba

Este venres 28 de maio celebrarase a presentación do libro Obra inacabada de Dosinda Christensen, de Xerardo Quintiá, ás 20 horas na Casa da Cultura de Vilalba. Dita obra, que fora a gañadora no XLVI Certame de Poesía do Concello de Vilalba, está editada baixo o selo de Alvarellos Editora.

Por limitacións de capacidade derivadas da pandemia do COVID-19, as persoas interesadas en asisitir a dita presentación deberán inscribirse previamente no teléfono 982510761 ou no mail cultura@vilalba.es

MANIFESTO 25 N. 30 Voces pola Eliminación da Violencia contra a Muller

Xa hai listaxe de autoras/-es seleccionadxs que aparecerán no libro MANIFESTO 25 N. 30 Voces pola Eliminación da Violencia contra a Muller, que coeditarán a Asociación Cultural CALDALOBA e Alvarellos Editora . Nesta edición ademais participan con cadansúa achega económica as Áreas de Cultura da Deputación Provincial de Lugo e do Concello de Vilalba, e a colaboración divulgadora da web Culturalia GZ.

O libro, que nace con motivo da conmemoración anual do 25 de Novembro coma Día Internacional pola Eliminación da Violencia contra a Muller, contará con diversas e destacadas voces dentro do panorama literario galego. Está previsto que saia do prelo de cara á súa presentación na vindeira primavera.

Acto de presentación das obras HORA DE PENUMBRA, de Xurxo Alonso, e DE CASA QUEIMADA, de Iria Collazo López, no Museo das Aves de Cospeito

Onte pola tarde no Museo das Aves Cospeito, nun ambiente agradable, que cumpría as medidas sanitarias determinadas por causa da pandemia que estamos a padecer, celebrouse o acto de presentación das obras gañadoras do II Certame de Poesía TORRE DE CALDALOBA: “Hora de penumbra“, de Xurxo Alonso, e “De casa queimada“, de Iria Collazo López.
Con representación do Concello de Cospeito, na persoa do seu alcalde, Armando Castosa, da Asociación Recreativo Cultural de San Martiño de Pino, a través da súa presidenta Ines Lozano Carral, de Alvarellos Editora, o seu director Henrique Alvarellos, de Culturalia GZ, o seu administrador Martiño Maseda, chegou o momento de desfrutar en formato papel e escoitar en voz recitadora o froito poético que o xurado considerou merecedor de galardón na segunda edición deste certame poético que se vai consolidando máis aló dos lindes da Chaira.
Debido á ausencia por problemas de saúde de Iria Collazo López, enviou un texto que leu Martiño Maseda, ademais de recitar un par de poemas do seu libro “De casa queimada”.

Velaquí unha galería videográfica, facilitada por Quique Alvarellos, Ana Mar Fraga Rabade e Armando Requeixo, xurados nalgunha edición do certame e presentes no acto, no que tamén estiveron máis integrantes deliberadores/-as do citado xurado como Xosé Otero Canto e Adolfina Mesa.
Un acto ameno no que, a pesar dos tempos pandémicos, se festexou a palabra poética que fai medrar a árbore literaria de Caldaloba.



#MedreaPoesía!
#MedreCaldaloba!

A Asociación Cultural CALDALOBA e Alvarellos Editora coeditarán o libro “MANIFESTO 25 N. 25 Voces pola Eliminación da Violencia contra a Muller”

A Asociación Cultural CALDALOBA e Alvarellos Editora coeditarán o libro MANIFESTO 25 N. 25 Voces pola Eliminación da Violencia contra a Muller. Nesta edición contarán coa achega económica das Áreas de Cultura do Concello de Vilalba e da Deputación Provincial de Lugo, e a colaboración divulgadora da web Culturalia GZ.

Este libro nace co motivo da conmemoración anual do 25 de Novembro coma Día Internacional pola Eliminación da Violencia contra a Muller. Unha antoloxía que amosará desde unha vertente poética e crítica (textual, imaxinativa, gráfica) a visión particular de 25 artistas da palabra e/ou da imaxe arredor do 25 N.

Cada persoa só poderá achegar UNHA única obra ao seguinte enderezo electrónico info@culturaliagz.com.

A data límite para a recepción de obras será o mesmo 25 de novembro. A continuación realizarase unha selección de 25 obras de todas as achegadas, e que, segundo o criterio da organización, mellor reflictan o sentido da convocatoria.

Cada persoa seleccionada recibirá DOUS exemplares do libro editado, quedando os restantes para a realización, dentro do posible, de presentacións da publicación e como xeito de concienciación fronte a esta lacra social.