por martinho | May 14, 2018 | Autores/as, Novas, Xeral
O vindeiro sábado 19 de maio, ás 20:30h no auditorio Carmen Estévez, celebrarase un Festival Benéfico a favor da Loita contra o Cancro, organizado pola Asociación de Veciños de San Cosme de Nete.
Este festival conta coas actuacións de:
Mestura de Nete, alumnos e alumnas de Antía Maseda (pandeireta e baile tradicional), Vanesa Siso (tamboril), Ángel Sendín (gaita), Andrés Penabad (acordeón), así como o grupo de cantos, e Cantigas e Frores, de Lugo.
As entradas xa están a venda, a un prezo único de 5€, por medio dos membros da Asociación de Veciños de Nete, na Casa da Cultura e o mesmo día da actuación na taquilla.
A recadación íntegra tanto da venda de entradas coma de donativos, entregaráselle a un representante da Asociación contra o Cancro de Lugo ao finalizar o festival.
Colabora:
Concello de Vilalba
Asociación Cultural Andrade
Escola de Acordeóns Andrés Penabad
Deputación de Lugo. Programa Musiqueando
Gráficas Neal.
*Información recollida na área de Cultura do Concello de Vilalba.
por martinho | May 14, 2018 | Autores/as, Novas, Xeral
Este venres 18 de maio, ás 20.30h no auditorio Carmen Estévez de Vilalba, teremos un concerto de Corais, no que actuarán as agrupacións:
_ Coro A.C. “Músico Crisanto” de Rabade-Begonte-Outeiro de Rei.
_ Coral Polifónica Vilalbesa
e, por suposto, a organizadora do evento, a Coral Luar.
Este concerto conta con Esperanza e Aurelio (voz e piano) e Andrade Ensemble (Miguel e Néstor, trompeta e piano) como músicos convidados.
A entrada ao mesmo será de balde.
Organiza : Coral Luar
Patrocina: Coral Luar e Concello de vilalba
Colaboran: Centro Sociocomunitario de Vilalba.
*Información facilitada pola área de Cultura do Concello de Vilalba.
por martinho | May 14, 2018 | Autores/as, Literaria, Novas, Xeral
Mira Editores e o Concello de Vilalba convida á presentación dos libros de Pilar González Usón, “Asesinato en el club de bridge” e “¿Crímenes perfectos? Meluca y el caso del bridgista asesino”.
Acto que terá lugar o vindeiro martes 15 de maio ás 20:30h, na Casa da Cultura de Vilalba, e no que participarán o alcalde Agustín Baamonde, a concelleira de Cultura Chery Grandío e a autora Pilar González Usón.
Colabora: Librería Pergamino.
Adxunto vai o convite a dito evento.
*Información achegada dende a área de Cultura do Concello de Vilalba.
por martinho | May 13, 2018 | Autores/as, Literaria, Novas, Xeral
O 24 de maio, na sala do Ateneo Santiago (rúa do Vilar, 19, Compostela), terá lugar un encontro coas autoras galardoadas co Premio da Crítica 2017 en lingua galega: Emma Pedreira e Lupe Gómez.
Xunta elas, participarán Burghard Baltrusch e Teresa Seara, para falaren das obras premiadas e a traxectoria das escritoras.
*Información recollida da Asociación Galega da Crítica.
por martinho | May 11, 2018 | Autores/as, Literaria, Novas, Xeral
Ás 19:00 do venres 18 de maio a escritora catalá Isabel-Clara Simó ofrecerá, dentro do programa de actividades da súa estadía en Galiza para recoller o Premio Escritora Galega Universal 2018, un encontro-coloquio aberto ao público en xeral na Libraría Lila de Lilith (Rúa Travesa, 7 – Santiago de Compostela) acompañada por Cesáreo Sánchez Iglesias, presidente da AELG, acto ao que te convidamos.
Isabel-Clara Simón recollerá o galardón no marco da Gala do Libro Galego 2018, que terá lugar o día seguinte, sábado 19 de maio, no Teatro Principal de Santiago de Compostela, organizada pola Federación de Librarías de Galicia, a Asociación Galega de Editoras e a Asociación de Escritoras e Escritores en Lingua Galega.
por Emilia Martínez Fuentes | May 10, 2018 | Autores/as, Creación, Literaria, Xeral
TRÁNSITO
Caen as follas sen facer ruído,
caen… mansamente,
para deixar paso ás novas follas
que ocuparán o seu sitio…
Sucesión de días no almanaque,
horas vencidas…polo tempo,
segundos roubados á eternidade.
Caen as follas…
primavera durmida no berce do inverno,
días de choiva e neve,
e seguen a caer as follas…
como triste presaxio dun mañá… incerto,
como ese ouvear do vento
na fiestra
que me vén traer a cantiga
da desesperanza…
E seguen a caer as follas
no leito ermo… onde descansan
os meus pés descalzos.
Leito de herba que desperta coa calor
dos primeiros raios.
Nacen as follas…sucesivamente,
mentras seguen a caer unha tras de outra…
as mortas,
enchendo de nostálxia… os meus soños.
