O vindeiro sábado 22 de maio de 2021, ás 19:30 horas, está prevista a proxección da película ARIMA, de Jaione Camborda, no Auditorio Municipal de Vilalba.
Velaquí a nota informativa.
O vindeiro sábado 22 de maio, diante da torre de Caldaloba, a partir das 11:30 h. celebrararase un acto reivindicativo de distintas asociacións e grupos culturais chairegos e dos arredores, baixo a lenda Caldaloba. Recuperarmos o noso patrimonio, recuperarmos a nosa historia, no que reclamarán a recuperación deste emblema do patrimonio histórico galego.
As entidades convocantes son: Castiñeiro Milenario, Xermolos, IESCHA, Amigos do Castro de Viladonga, Valle Inclán, Madia Leva, Cultura do País, Os Vilares-Lareira de Soños, Irmandade Manuel María, Nova Poesía Guitirica, Lugo Patrimonio, Amigos do Patrimonio de Castroverde, Fundación Manuel María, Asociación veciñal de Cabreiros, Xotramu, A chave das noces, PolKA. Poeta Avelino Díaz e Chimchiribote.
O acto é de convocatoria aberta, dado que é un espazo ao ar libre e, por tanto, non haberá ningún problema co número de persoas asistentes, garantindo así as necesarias medidas de seguridade sanitaria que establece a pandemia da COVID-19.
PROGRAMACIÓN:
a) Intervencións públicas por parte de Antón Meilán e Orlando Viveiro.
Orlando Viveiro, coñecedor e divulgador do patrimonio da Terra Chá, participou nas Brigadas Chairegas e na loita levada a cabo hai vinte anos sobre Caldaloba. Fará unha breve intervención.
Antón Meilán, mindoniense e profesor da Universidade de Uvieu, estudoso de todo o relacionado con Pardo de Cela e a súa familia, fará unha intervención divulgativa sobre o que aconteceu no castelo de Vilaxoán ou Caldaloba e a importancia e significación destes feitos na nosa historia.
b) Acompañamento musical do grupo CAIVANCA (algúns dos seus membros pertenceron ao grupo musical CALDALOBA), que interpretará unha serie de pezas.
c) Foto de todos os participantes diante da torre cunha faixa que levará a lenda xa mencionada: Caldaloba. Recuperarmos o noso patrimonio, recuperarmos a nosa historia.
O Galician Film Forum celebra o Día das Letras Galegas coa estrea de ‘Nación’ no Reino Unido
● A organización londiniense prosegue coa súa actividade malia a pandemia coa proxección en liña do último filme de Margarita Ledo
● O mércores 19 está previsto un encontro en directo por vía telemática coa directora
● A película estará dispoñible entre os días 15 e 23 de maio na plataforma Vimeo On Demand e só no Reino Unido
O Galician Film Forum (GFF) de Londres vai celebrar este ano o Día das Letras Galegas coa estrea no Reino Unido de ‘Nación’, o último filme de Margarita Ledo. Así, entre os días 15 e 23 de maio, a película vai estar dispoñible na plataforma Vimeo On Demand en exclusiva para o Reino Unido. Alén diso, está previsto un encontro en liña coa directora o mércores 19 de maio, ás 7 da tarde (horario británico), que se retransmitirá en directo a través das redes sociais do GFF. Esta actividade é posible grazas ao patrocinio da Oficina para Asuntos Culturais e Científicos da Embaixada de España en Londres.
O filme vaise exhibir en versión orixinal con subtítulos en inglés e o alugueiro por 48 horas terá un custo de 3,95 libras; ademais, o número de entradas estará limitado. Esta proxección no Reino Unido ten lugar sete semanas logo da súa estrea nas salas comerciais en España, onde aínda se pode atopar. ‘Nación’ estreouse no 17 Festival de Sevilla, onde acadou o premio á Mellor Dirección de Filme Español, e recibiu o Mestre Mateo 2021 ao Mellor Documental.
Unha loita inconclusa
Neste filme de non ficción, Margarita Ledo aborda o moito que tardaron as mulleres en ter dereitos, “non soamente en votar, senón en acadar un traballo asalariado e a posibilidade de ser independentes. En resumo, o moito que nos levou ser Nación”. O eixo é o peche da fábrica de louza Pontesa no 2001 e como, vinte anos despois, á agardada sentencia sobre a reclamación de débeda pendente, un grupo de traballadoras lembra o símbolo da súa liberdade individual, a súa emancipación económica e a súa loita sindical.
Esas traballadoras manteñen viva a reivindicación dos dereitos da muller na España do século XX. A historia das súas vidas desenvólvese en presenza da esfinxe, encarnada por Eva Veiga, que reclama a memoria das operarias do téxtil, a louza e a conserva e anuncia voces e arquivos que engarzan tempos e corpos diferentes.
En ‘Nación’ altérnanse as imaxes de arquivo e as interpretacións de Mónica Camaño, Mónica de Nut, Laura Martínez Iglesias e Xoana Pintos coa participación das extraballadoras de Pontesa: Nieves Pérez Lusquiños, Manuela Nóvoa Pérez, Ester García Lorenzo, Carmen Portela Lusquiños e Carmen Álvarez Seoane.
Margarita Ledo Andión (1951, Castro de Rei, Lugo) é unha relevante figura da cultura coñecida polas súas facetas de cineasta e escritora. Alén diso, é catedrática de Comunicación Audiovisual na Universidade de Santiago de Compostela, onde tamén exerceu como decana. Publicou o seu primeiro libro, o poemario ‘Parolar cun eu,cun intre,cun inseuto’, en 1970, e co tempo verían a luz outros títulos de poesía, narrativa, ensaio e investigación.
Ao longo da súa traxectoria vital fundou e dirixiu diversas publicacións con especial foco na reivindicación da lingua galega e espírito militante. A súa filmografía consta das longametraxes ‘Santa Liberdade’ (2004), ‘Liste, pronunciado Líster’ (2007) e a ficción ‘A cicatriz branca’ (2012), baseada na súa novela ‘Porta Blindada’. Tamén dirixiu varias pezas curtas experimentais e documentais. No 2017 o festival internacional Documenta Madrid dedicoulle unha retrospectiva. Foi Premio Nacional da Cultura Galega 2008 en Cinema e Audiovisual e Premio Otero Pedrayo 2017 e é numeraria da Real Academia Galega.
Entradas ‘Nación’: https://vimeo.com/ondemand/nacion/
Velaí un galería de imaxes do filme
O vindeiro sábado 15 de maio de 2021, ás 19:30 horas, no Auditorio Municipal de Vilalba, está prevista a proxección da película A ILLA DAS MENTIRAS, de PAULA CONS.
Véxase nota informativa.
Este sábado 8 de maio, ás 17:00 h no Castelo de Pambre, terá lugar a inauguración da Exposición CARTOGRAFÍA SIMBÓLICA, de Antón Patiño.
Esta exposición enmárcase dentro do Programa de exposicións do IEU, que conta coa subvención de O Teu Xacobeo 2021, e, neste caso, a colaboración do Concello de Palas de Rei.
O Instituto de Estudos Chairegos (IESCHA), dentro dos actos programados co gallo das Letras Galegas’2021, organiza, en
colaboración co Concello de Vilalba, a conferencia “XELA ARIAS, A VIDA ÍA EN SERIO”, impartida por MARTA VEIGA IZAGUIRRE, profesora e xornalista.
O acto terá lugar o venres 7 de maio de 2021, ás 20:00 horas, na Casa da Cultura de Vilalba, e será presentado por Marisa
Barreiro, presidenta do Iescha.
A entrada é libre ata completar aforo, cumpríndose estrictamente a normativa anti-covid.
Xela Arias Castaño naceu en Sarria en 1962. Filla do escritor Valentín Arias, foi unha das voces máis singulares da poesía galega contemporánea e sobresaíu tamén como editora e tradutora.
En 1965, a familia mudouse a Lugo e ela iniciou os estudos no Colexio Fingoi. Por mor dos compromisos laborais do pai trasladouse máis tarde á parroquia de Sárdoma, en Vigo, onde rematou a ensinanza primaria. Para daquela xa gañara o primeiro premio no VI Concurso de Contos Infantís O Facho.
En 1990 saíu do prelo Tigres coma cabalos, asinado coa súa parella, o fotógrafo e matemático Xulio Gil, e, en 1996, o poemario Darío a diario, dedicado ao seu fillo. De 2003 é a súa derradeira obra, Intempériome.
Exerceu un labor pioneiro no mundo da tradución, ao verter ao galego os textos de Gianni Rodari, Jorge Amado, W. Fernández Flórez, Roald Dahl Bram Stoker (Drácula); tamén participou na tradución de O Quixote de Cervantes
ou Dublineses de Joyce. O seu traballo como tradutora fíxoa merecente de varios premios.
Desde 1999, exerceu a docencia en distintos institutos da xeografía galega. Foron anos de intensa actividade cultural e implicación cívica, nos que participou nas mobilizacións contra a Guerra de Iraq e a catástrofe do Prestige, na Festa da Muller ou nas Noites Solidarias de Implicadas no Desenvolvemento.
A súa morte en 2003 ocasionou unha fonda conmoción no mundo cultural.
Xela Arias anticipou nos anos oitenta moitos temas e características formais da lírica galega da década seguinte. Atreveuse a
explorar o diálogo entre a poesía e a fotografía ou a música e procurou novos espazos para ela en recitais, festivais e outras
intervencións. A súa é unha poesía urbana, que rompe formalmente co código poético, cunha dimensión social e precursora da escritura de xénero. (https://www.lingua.gal/letras-galegas/contido_0059/2021-xela-arias)
Marta Veiga Izaguirre (Cantabria, 1978) é profesora asociada da área de Xornalismo no Campus de Lugo da Universidade de Santiago de Compostela (USC) e xornalista freelance, amais de investigadora e xestora do grupo de innovación docente Xuvenciencia.
Licenciada en Ciencias da Información pola USC, ten traballado en medios de comunicación como Diario de Pontevedra e El Progreso.
Velaquí a nota informativa.