María SOA e Sara Faro estarán acompañadas de Tania Camaño e Marina Vidal sobre o escenario, nunha cita que contará coa presenza de diversas colaboradoras que serán toda unha sorpresa para o público asistente
O concerto dará comezo ás 22.00 horas no hall do Auditorio Mar de Vigo, mentres que a apertura de portas terá lugar ás 21.30 horas
Fillas de Cassandra iniciara mañá venres, 16 de febreiro, a xiraÚltimas Dionisíacas na súa cidade natal, Vigo. Tras esgotar, en menos de 10 días, os 1.400 billetes dispoñibles para a cita no Auditorio Mar de Vigo, o dúo conformado por María SOA e Sara Faro estreará no hall do recinto o seu novo directo. O concerto, que comezará ás 22.00 horas (a apertura de portas será ás 21.30 horas), contará coa colaboración de diversas bandas e solistas cuxa participación será toda unha sorpresapara o público asistente. Últimas Dionisíacas é a nova proposta escénica e musical de Fillas de Cassandra, na que as artistas fan unha revisión dos temas máis coñecidos do seu primeiro LP, Acrópole, desde unha electrónica máis escura e potente. Tamén recuperan algúns dos sinxelos publicados nos últimos meses e dan a coñecer outros inéditos para o público. Neste directo, a luz e a escenografía teñen un papel moi relevante; mais unha das principais novidades é que Fillas de Cassandra están acompañadas sobre o escenario dunha banda, que integran Tania Caamaño e Marina Vidal. Desde xeito, e con esta formación, o grupo relevación do panorama musical galego no 2023 aposta pola organicidade do piano, o bombo legüero, as pandeiretas, os pandeiros, violín ou as harmonías vocais en rigoroso directo, mais sen esquecer as bases electrónicas producidas por María SOA e Berto.
Logo da estrea viguesa, Fillas de Cassandra levará as Últimas Dionisíacas á cidade da Coruña o vindeiro 22 de febreiro, nunha cita enmarcada na celebración do Día dos Medios en Galego (que terá lugar na sala INN e para a que tampouco quedan billetes dispoñibles). Despois actuarán o 3 de marzo en Arzúa (Festa do Queixo), o 12 de abril en Donostia (no marco do ciclo Bizi ala Iraun), o 13 de abril no ZEID FEST de Barakaldo e, máis adiante, nos festivais Ourensound, Ortigueira ou SonRías Baixas, entre outros.
CONVOCATORIA PRENSA E MEDIOS GRÁFICOS ACREDITADOS
Data: 16 de febreiro de 2024. Lugar: Hall do Auditorio Mar de Vigo. Hora: 21.45 horas (recollida de acreditacións e acceso de prensa a través da porta situada xunto á billeteira do recinto. A entrada do público será a partir das 21.30 horas pola porta principal e a hora de inicio do concerto será ás 22.00 horas). Acto: Fillas de Cassandra inicia a xira ‘Últimas Dionisíacas’.
Protocolo de fotos e vídeo
Sen limitación de número de cancións.
Os primeiros temas poderanse facer desde o foso (o acceso ao mesmo farase acompañado polo equipo de prensa desde a billeteira).
A continuación poderanse tomar imaxes e vídeos por todo o hall do Mar de Vigo, agás sobre o escenario e nas zonas de acceso privado.
O tema, publicado hoxe mércores 14, é o segundo adianto do novo álbum da banda muradá, nomeado La máquina del buen rollo, e que verá a luz o vindeiro mes de marzo
Rue Franklin, o novo tema da banda muradá The Rapants, xa está dispoñible nas principais plataformas dixitais. Trátase do segundo avance do LP La máquina del buen rollo, álbum que se publicará nas vindeiras semanas e para cuxa festa de presentación -unha dobre celebración que terá lugar os días 23 e 24 de marzo na Sala Capitol de Santiago- xa non quedan entradas dispoñibles.
Rue Franklin -cuxo nome rende homenaxe a unha vía de Bruxelas coñecida pola banda- é un tema de esencia disco, dando así continuidade á liña marcada por Blaster W4u,o primeiro sinxelo do LP, aínda que nesta ocasión a creación é máis rockeira e enérxica; algo que tamén acontece con outros temas dun álbum cuxa variedade estilística poderá escoitar o público a partir do mes de marzo.
O novo adianto de La máquina del buen rollo tamén conta cun videoclip, dirixido nesta ocasión por Manu Seoane. “Vivimos mil anos en un” canta The Rapants no tema, unha idea que serve como punto de partida para que tanto os catro membros do grupo coma a parella protagonista -interpretada por Eva Ramudo e José Santamaría- viaxen desde o salvaxe oeste até os anos 80. Rodado en localizacións como a Discoteca La Luna de Pontevedra, ou na Hípica e Granxa Escola Bergando de Negreira, a peza audiovisual pódese ver a través de Youtube.
Este sábado, 17 de febreiro, ás 17 h, OS MONICREQUES DE KUKAS estarán na Casa-Museo Manuel María para representar De trebellos, perellos e fedellos. Xan Perillán vai á biblioteca. Espectáculo, este, dirixido para as crianzas de tres a oito anos, e en que o protagonista, Xan Perillán, a través da pintura, a maxia e os monicreques, representa varios poemas do libro “De trebellos, perellos e fedellos”, do que é autor e ilustrador o propio Kukas.
O próximo venres 16 de febreiro, ás 18,30 h, na Casa da Cultura de Antas de Ulla será presentado o libro Toponimia de Antas de Ulla, obra da investigadora seoanesa Andrea Santiso, co-coordinadora da sección de Filoloxía, Literatura e Toponimia do IEU.
Intervirán na presentación a alcaldesa de Antas, Pilar García Porto, o presidente da Real Academia Galega, Victor Freixanes, os especialistas en toponimia Ana Boullón e Antón Santamarina, e a autora do libro.
O Instituto de Estudos Chairegos, dentro dos actos que durante os meses de febreiro e marzo ten programados en homenaxe a Rosalía de Castro baixo o título de QUERO VER O MAR-HOMENAXE A ROSALÍA, organiza o venres 16 de febreiro de 2024, ás 20:00 horas, na Casa da Cultura de Vilalba, a CONFERENCIA “ROSALÍA DE CASTRO, DE ONTE A HOXE”, que será impartida por PILAR GARCÍA NEGRO, profesora honoraria da USC e escritora, contando tamén coa presentación de MARISA BARREIRO, presidenta do IESCHA.
Sinsal publica as ‘Sesións San Simón’, as gravacións en cilindro fonográfico nas que participaron as artistas da pasada edición do festival
Os rexistros, realizados polo experto Aleks Kolkowski, pódense escoitar a través da páxina web da promotora do Sinsal, www.sinsalaudio.es.O cineasta vigués Álex Cancelo tamén recolleu en vídeo as gravacións, cuxas primeiras pezas amosan a participación de Hatis Noit, Fillas de Cassandra ou Ana Lua Caiano nesta proposta, aberta ao público durante a celebración do evento
Xa están dispoñibles en aberto as primeiras Sesións San Simón, as gravacións en cilindro fonográfico realizadas durante a pasada edición do festival Sinsal SON Estrella Galicia polo experto Aleks Kolkowski. Os primeiros audios, que se acompañan ademais dunha peza audiovisual, pódense escoitar a través da páxina web da promotora do evento, Sinsalaudio. As Sesións San Simón forman parte das actividades paralelas do Sinsal, que cada verán se celebra na illa de San Simón. Nelas participan de xeito activo as bandas e solistas que conforman o cartel secreto do festival, e consisten no rexistro dunha canción, de dous minutos, nun cilindro de cera.As sesións, realizadas en distintos espazos do arquipélago, son abertas para o público asistente.
Ademais do rexistro da canción, Sinsal recolle tamén esta gravación en vídeo da man do cineasta vigués Álex Cancelo. As piezas audiovisuais pódense visualizar a través do web www.sinsalaudio.es, na que xa están dispoñibles as sesións nas que participaron Hatis Noit, Fillas de Cassandra, Ana Lua Caiano, Duo Ruut, Dal:um, Leenalchi ou AGD7.
Enlaces directos ás Sesións San Simón do Festival Sinsal SON Estrella Galicia 2023
O Festival Sinsal SON Estrella Galicia 2024 celebrará a súa nova edición na illa de San Simón os días 26, 27 e 28 de xullo. O evento cultural do cartel secreto, que o público só descubre ao desembarcar, volverá ofrecer unha programación musical caracterizada pola diversidade de estilos musicais e orixes das bandas e solistas que convivirán no corazón da Ría de Vigo a última fin de semana de xullo. Alén das actuacións, durante o festival sucédense numerosas actividades paralelas divulgativas, á fin de dar a coñecer a historia e o patrimonio cultural e natural de San Simón; ademais de propostas vinculadas á sostibilidade ambiental e concienciación, ou á recuperación dos arquivos sonoros, que se traducen en iniciativas recollidas como as Sesións San Simón.
