O director do Festival Internacional de Arpa Vila de Noia, Rodrigo Romaní, salienta o apoio do público e o seu respecto absoluto á interpretación das e dos artistas que actuaron este verán no certame musical
O festival acolleu do 3 ao 6 de agosto nove concertos de balde, nos cales houbo tres estreas absolutas e nos que destacou a alta presenza de mulleres arpistas protagonistas, como foi o caso de Laoise Kelly,Beatriz Cortesão, Musgö, Elisabeth Cerra, Claudia Besné, Begoña Riobó ou Beatriz Martínez
Hibrys, a obra gañadora do I Premio Portus Apostoli, promovido polo festival e polo Concello de Noia, terá percorrido internacional: estrearase en xuño de 2024 en Arxentina
O Festival Internacional de Arpa Vila de Noia pecha a súa décima edición cunha valoración moi positiva. O director do evento, Rodrigo Romaní, destaca o éxito da celebración nun ano moi especial, cando se cumpren dez anos desde o inicio do festival, así como “os grandes momentos que sempre lembraremos deste verán”.
“Houbo moitos momentos máxicos nesta edición. Entre eles, esas noites da Praza do Tapal, cun público cun entusiasmo que rebordaba o espazo, e que cun silencio absoluto escoitou a estrea de Hibrys, coa Real Filharmonía de Galicia, ou que gozou da primeira escoita das novas suites interpretadas por SondeSeu”, apunta Romaní. O director tamén destaca a vertente social e educativa do evento, que se fixo efectiva especificamente coa celebración da segunda edición do encontro do alumnado das escolas de arpa de Galicia na inauguración do festival. “Foi unha magnífica xornada de convivencia en Noia, con actividades de lecer e tamén ensaios conxuntos. Este encontro exemplifica a razón de ser deste festival, que non é outro que a celebración da música arredor da arpa”, asevera Romaní, quen engade: “Foron momentos moi felices, que nos animan a seguir traballando nas vindeiras ocasións e que sen dúbida, quedarán para sempre no noso maxín”.
O Noia Harp Fest celebrouse do 3 ao 6 de agosto en Noia. Nove concertos de balde, con tres estreas absolutas –Hibrys, de Alejandro Civilotti, gañadora da primeira edición do Premio Portus Apostoli promovido polo propio festival e o Concello de Noia; e as suites Micelio e Escumas Atlánticas, escritas por Anxo Pintos e Rodrigo Romaní, respectivamente-, centraron un programa no que as mulleres arpistas foron protagonistas. Laoise Kelly, Beatriz Cortesão, Musgö, Elisabeth Cerra e Claudia Besné foron cabezas de cartel dun programa que tamén contou coa presenza de Begoña Riobó, Mary Macmaster e Beatriz Martínez, bandas como The Pozzies, dúos como o de Gilles Chabenat & Daniela Heiderich; ou mesmo orquestras como a Real Filharmonía de Galicia e SonDeSeu.
“Celebramos os dez anos con moita ilusión e xa estamos pensando na seguinte edición, da que xa está convocado o II Premio Portus Apostoli de Composición, nesta ocasión para o fomento da creación e promoción de obra para arpa e banda”, expón Romaní, quen lembra que a obra gañadora será interpretada o ano que vén pola banda municipal de música de Santiago coa colaboración da banda de Noia. Ao fío, Rodrigo Romaní sinala que a peza gañadora da primeira edición, Hibrys, terá percorrido internacional. “A obra estrearase o 1 de xuño de 2024 na localidade arxentina de Paraná, da man da Orquestra Sinfónica Entre Ríos, baixo a dirección do español José Miguel Rodilla e con Florecia Arizpe como solista. Este feito confirma o obxectivo fundamental do certame, que non é outro que ampliar o repertorio de obra para arpa e orquestra”, confirma o director.
A décima edición do Noia Harp Fest, festival organizado pola asociación homónima e Nalgures Producións, contou co patrocinio da Xunta de Galicia a través da Axencia Turismo de Galicia, do Concello de Noia e da distribuidora musical Altafonte. Tamén colaboraron nesta edición o Liceo de Noia e a Asociación de Española de Arpistas (AEDA). O web no que se pode ver o programa e toda a información desta edición, ademais das bases da segunda edición do Premio Internacional Portus Apostoli de Composición é www.noiaharpfest.gal.
As e os estudantes, procedentes de diferentes escolas de Vigo, Santiago, Mos e Ferrol, ofrecerán a partir das 18:00 horas no Liceo de Noia un repertorio cheo de temas populares e arranxos de Bohemian Rapsody, de Queen, ou d’O vals do mencer, de Emilio Cao
A vila noiesa acolle até o 6 de agosto a décima edición dun festival único no noroeste peninsular no que teñen cabida o folk, a vangarda, a música tradicional ou a clásica
O Noia Harp Fest, o único festival dedicado á arpa no noroeste da Península Ibérica, inaugurará mañá, xoves 3 de agosto, a súa décima edición. Até o vindeiro domingo, día 6, a vila noiesa acollerá un evento musical aberto a todos os públicos e que aposta pola diversidade estilística na súa programación, na que a interpretación do instrumento é o fío condutor.
O 10º Noia Harp Fest comezará no serán do xoves 3 de agosto cunha sesión festiva e que porá en valor o talento local. O alumnado das escolas de arpa de Galicia abrirá, por segundo ano consecutivo, o festival. Estudantes de Vigo, Santiago, Mos e Ferrol actuarán a partir das 18:00 horas no Liceo de Noia, nun concerto cun repertorio que contará con temas tradicionais de distintas rexións do mundo e até un arranxo da Bohemian Rapsody de Queen. Como peche, todas e todos renderán homenaxe a quen introduciu, por vez primeira, a arpa na música feita en Galicia, Emilio Cao, coa interpretación do seu O vals do mencer, arranxado especificamente para a ocasión. De seguido celebrarase unha foliada de benvida ao festival.
Nesta segunda edición do Encontro de Escolas de Arpa de Galicia, participará o alumnado de Mayeusis, Conservatorio das Artes de Vigo (cuxa profesora é Mayca Alleres); da Escola Municipal de Música Folk e Tradicional ETRAD, de Vigo (Begoña Riobó); da Escola Municipal de Música de Santiago (Bleueen Le Friec); do Conservatorio Profesional de Música de Torroso, de Mos (Alba Barreiro); e doConservatorio Profesional de Música Xan Viaño, de Ferrol (María José Carralero). Ademais do concerto no Liceo de Noia, o grupo participará nunha xornada de convivencia, que incluirá un ensaio conxunto e ruta en kayak pola ría de Noia.
Noia Harp Fest
O 10º Noia Harp Fest, organizado pola asociación homónima e Nalgures Producións, e dirixido por Rodrigo Romaní coa colaboración de Beatriz Martínez e Alba Barreiro, ofrecerá este 2023 nove concertos, que serán de acceso gratuíto para o público e que terán lugar en espazos singulares da vila. Ao longo de catro xornadas, estilos coma o folk, a vangarda e a electrónica, as músicas populares galegas, francesas e alemás, ou mesmo a clásica contemporánea, percorrerán as rúas, prazas e recintos culturais de Noia.
Así, a Praza do Tapal, a Igrexa Santa María A Nova, o Teatro Coliseo Noela ou o Liceo de Noia acollerán as actuacións de arpistas de recoñecida traxectoria, coma a irlandesa Laoise Kelly, a alemá Daniela Heiderich, as escocesas The Pozzies ou a andaluza Müsgo; de novas intérpretes que están a espallar o seu talento nas mellores orquestras de Europa, coma a portuguesa Beatriz Cortesão ou as españolasElisabeth Cerra e Claudia Besné; e de agrupacións claves para a difusión da música no territorio galego, como é o caso da Real Filharmonía de Galicia ou de SonDeSeu. Ademais de artistas notables do ámbito galego, estatal e internacional, o NHF acolle tamén ás persoas amadoras do instrumento ou que se están a iniciar na súa práctica, como é o caso do alumnado de arpa das escolas de Galicia. Esta pluralidade e diversidade da práctica artística, así coma das orixes das e dos participantes, fai do Noia Harp Fest unha proposta estimulante e próxima para todos públicos de todas as idades.
O Noia Harp Fest, organizado pola asociación homónima e Nalgures Producións, conta co patrocinio da Xunta de Galicia a través da Axencia Turismo de Galicia, do Concello de Noia e da distribuidora musical Altafonte. Tamén colaboran nesta edición o Liceo de Noia e a Asociación de Española de Arpistas. Para máis información, pódese visitar www.noiaharpfest.gal.
Axenda do Noia Harp Fest para o xoves, 3 de agosto
Liceo de Noia, 18:00 horas | II Encontro de Escolas de Arpa de Galicia. Homenaxe Emilio Cao. Liceo de Noia, 20:30 horas | Foliada de benvida ao 10ª Noia Harp Fest
A vila coruñesa acolle do 3 ao 6 de agosto a décima edición dun festival único no noroeste peninsular no que teñen cabida o folk, a vangarda, a música tradicional ou a clásica
As arpistas Laoise Kelly, Müsgo, Beatriz Cortesão, Elisabeth Cerra e Claudia Besné son cabezas de cartel dun evento que contará coas irlandesas The Pozzies, a orquesta folk SonDeSeu, da Real Filharmonía de Galicia, o dúo Gilles Chabenat & Daniela Heiderich e o alumnado de arpa das escolas galegas
Todas as actuacións serán de acceso gratuíto e terán lugar a partir das 19:00 horas no Liceo de Noia, Santa María A Nova, Praza do Tapal e Teatro Coliseo Noela
A vila de Noia prepárase para celebrar esta semana un encontro musical único no noroeste da Península Ibérica. Do 3 ao 6 de agosto, a localidade coruñesa acollerá a décima edición do Noia Harp Fest, un evento que aposta pola diversidade estilística no seu cartel e cuxo fío condutor non é outro que a interpretación dun único instrumento: a arpa.
A 10ª edición do Noia Harp Fest, organizado pola asociación homónima e Nalgures Producións, e dirixido por Rodrigo Romaní coa colaboración de Beatriz Martínez e Alba Barreiro, contará no seu programa cun total de nove concertos, que serán de acceso gratuíto para o público e que terán lugar en espazos singulares da vila. Ao longo de catro xornadas, estilos coma o folk, a vangarda e a electrónica, as músicas populares galegas, francesas e alemás, ou mesmo a clásica contemporánea, percorrerán as rúas, prazas e recintos culturais de Noia.
Así, a Praza do Tapal, a Igrexa Santa María A Nova, o Teatro Coliseo Noela ou o Liceo de Noia acollerán as actuacións de arpistas de recoñecida traxectoria, coma a irlandesa Laoise Kelly, a alemá Daniela Heiderich, as escocesas The Pozzies ou a catalá Müsgo; de novas intérpretes que están a espallar o seu talento nas mellores orquestras da Península Ibérica e Europa, coma a portuguesa Beatriz Cortesão ou as españolas Elisabeth Cerra e Claudia Besné; e de agrupacións claves para a difusión da música no territorio galego, como é o caso da Real Filharmonía de Galicia ou de SonDeSeu. Ademais de artistas notables do ámbito galego, estatal e internacional, o NHF acolle tamén ás persoas amadoras do instrumento ou que se están a iniciar na súa práctica, como é o caso do alumnado de arpa das escolas de Galicia. Esta pluralidade e diversidade da práctica artística, así coma das orixes das e dos participantes, fai do Noia Harp Fest unha proposta estimulante e próxima para todos públicos de todas as idades.
PROGRAMACIÓN
O 10º Noia Harp Fest dará comezo no serán do xoves 3 de agosto cunha sesión festiva e que porá en valor o talento local. O alumnado das escolas de arpa de Galicia abrirá, por segundo ano consecutivo, o encontro. Nesta ocasión, o estudantado renderá homenaxe a quen introduciu, por vez primeira, a arpa na música feita en Galicia, Emilio Cao, coa interpretación do seu O vals do mencer, arranxado especificamente para a ocasión. De seguido celebrarase unha foliada.
O venres 4 estará fiado polo virtuosismo de mulleres arpistas do ámbito do folk. A irlandesa Laoise Kelly, considerada a máis relevante da súa xeración, abrirá a xornada da igrexa de Santa María a Nova. Pioneira nun novo estilo de conducción da arpa instrumental e recoñecida pola crítica polos seus traballos en solitario, participou na gravación de máis de 70 álbums con artistas como Seamus Heaney, The Chieftains ou Sharon Shannon. Ás 21:00 horas, na praza do Tapal, será a quenda do dúo franco-alemán conformado por Gilles Chabenat e Daniela Heiderich. Evocarán melodías de baile conmovedoras e cancións emotivas cun repertorio que incluirá tanto composicións propias modernas como músicas tradicionais francesas e alemás. A noite pecharase cunha das bandas que irromperon na escena folk nos 90, as escocesas The Poozies, e que será unha das grandes sensacións do festival pola súa gran colección de temas e melodías groovy.
O sábado 5, o Noia Harp Fest e a AEDA renderán no Coliseo Noela unha homenaxe especial a Nicanor Zabaleta considerado o mellor intérprete do instrumento- no 30º aniversario da súa morte. A cita, que terá lugar a partir das 19:00 horas no Teatro Coliseo Noela, estará guiada pô-la galega Alba Barreiro,que abordará vida e obra de Zabaleta. No concerto participarán dúas arpistas integrantes da Joven Orquesta Nacional de España: Elisabeth Cerra e a vasca Claudia Besné, membro tamén da Neue Philharmonie Munchen. De seguido, contra ás 21:30 horas, xa na Praza do Tapal, terá lugar a primeira das tres estreas mundiais que haberá neste Noia Harp Fest: Hibrys, a obra gañadora do Premio Portus Apostoli e que será interpretada pola Real Filharmonía de Galicia -dirixida polo galego Maximino Zumalave e coa arpista portuguesa Beatriz Cortesão como solista-. O repertorio da cita tamén contará con obras de Bach e Beethoven.
A última xornada da décima edición do Noia Harp Fest comezará ás 19:00 horas do domingo 6 de agostocun concerto da arpista, cantante e artista multidisciplinar Musgö, especialista en looping ao vivo e arpa eléctrica. O seu traballo é unha mestura de contemporáneo e vintage, cunha posta en escena atrevida e elegante que se poderá ver no Teatro Coliseo Noela.
Finalmente, o broche dourado do evento chegará da man da orquestra de folk de Galicia. SonDeSeu estreará na praza do Tapal, a partir das 21:30 horas, dúas novas composicións creadas especificamente para este concerto: serán as suites Micelio, de Anxo Pintos, que contará coa participación de Begoña Riobó, e Escumas Atlánticas, de Rodrigo Romaní, na que participarán Laoise Kelly, Mary Macmaster e Beatriz Martínez.
Xoves 3 de agostoLiceo de Noia, 19:00 horas | II Encontro de Escolas de Arpa de Galicia. Homenaxe Emilio Cao. Liceo de Noia, 20:30 horas | Foliada de benvida ao X Noia Harp Fest
Venres, 4 de agosto Santa María A Nova, 19:00 horas | Laoise Kelly Praza do Tapal, 21:00 horas | Gilles Chabenat & Daniela Heiderich Praza do Tapal, 22:00 horas | The PozziesSábado 5 de agostoTeatro Coliseo Noela, 19:00 horas | Homenaxe Nicanor Zabaleta: Elisabeth Cerra e Claudia Besné. Praza do Tapal, 21:30 horas | Real Filharmonía de Galicia con Beatriz Cortesão. Estrea de Hibrys.
Domingo 6 de agosto Teatro Coliseo Noela, 19:00 horas | Müsgo Praza do Tapal, 21:30 horas | SonDeSeu + convidadas. Estrea de Micelio e Escumas Atlánticas
O Noia Harp Fest, organizado pola asociación homónima e Nalgures Producións, conta co patrocinio da Xunta de Galicia a través da Axencia Turismo de Galicia, do Concello de Noia e da distribuidora musical Altafonte. Tamén colaboran nesta edición o Liceo de Noia e a Asociación de Española de Arpistas. Todos os concertos serán de entrada libre e celebraranse a partir das 19:00 horas. Para máis información, pódese visitar o espazo web www.noiaharpfest.gal.
Unha xornada de encontro entre o alumnado das escolas de arpa de Galicia, que inclúe unha actuación conxunta na que interpretarán ‘O vals do Mencer’, do pioneiro Emilio Cao, abrirá a décima edición do festival
As arpistas Elisabeth Cerra e Claudia Besné únense ao cartel deste ano, que conta con Laoise Kelly, The Pozzies, Müsgo, SondeSeu, Dilles Chabenat, Daniela Heiderich, Beatriz Cortesão e a Real Filharmonía de Galicia
A arpa volverá ser protagonista dos seráns de Noia. O vindeiro mes de agosto celebrarase a décima edición do Festival Internacional de Arpa Vila de Noia, o Noia Harp Fest. O seu director, Rodrigo Romaní, e o concelleiro de Cultura e Turismo da localidade, José Pérez, presentaron esta mañá o programa completo da iniciativa, que suma dúas novas arpistas ao seu cartel, Elisabeth Cerra e Claudia Besné, e afianza o seu compromiso coa proxección e divulgación do instrumento a través dunha xornada de encontro entre o alumnado das escolas de arpa de Galicia na que se recoñecerá ao pioneiro en introducir o instrumento na música do país: Emilio Cao.
O Noia Harp Fest é o único festival de Galicia e do noroeste da Península Ibérica que pon o foco na arpa, situándoa como única protagonista. No seu cartel, dunha notable calidade artística, conflúen desde hai unha década agrupacións e solistas de estilos moi diversos, procedentes tanto do ámbito galego ou estatal coma do internacional, mais todas elas unidas por un fío común: a interpretación musical a través da arpa. Esta diversidade explicítase tamén na vertente cultural, social e divulgativa do evento, pois no festival -alén do acceso gratuíto para o público- teñen cabida tanto as persoas amadoras ou que se están a iniciar na práctica do instrumento, como é o caso do alumnado de arpa das escolas de Galicia, como aquelas cunha ampla ou recoñecida traxectoria. É o caso da irlandesa Laoise Kelly, ou mesmo doutras voces que experimentan co instrumento desde unha vertente máis experimental, como a catalá Müsgo.
“A riqueza do Noia Harp Fest reside precisamente na pluralidade da práctica artística, que permite que todo o mundo poida gozar da interpretación dun instrumento que ofrece múltiples posibilidades e que é menos habitual sobre os escenarios dun evento estival”, apuntou Romaní, quen destacou que nesta edición do festival, renderase precisamente homenaxe, na xornada inaugural, ao pioneiro que introduciu por vez primeira a arpa na música feita en Galicia: Emilio Cao. “Farémolo dun xeito especialmente emotivo, como é a interpretación d’O vals do mencer, arranxado especificamente para a ocasión e que sairá das cordas das e dos estudantes de arpa no país, que abrirán o festival o xoves 3 de agosto”, aseverou o director. Precisamete o alumnado gozará durante ese día dunha xornada de encontro e convivencia, “a fin de estreitar vínculos arredor do instrumento”, e nas que participarán en actividades vinculadas ao mar.
Outra das novidades presentadas esta mañá é a incorporación ao cartel do Noia Harp Fest de dúas arpistas integrantes da Joven Orquesta Nacional de España (JONDE): Elisabeht Cerra e a vasca Claudia Besné, membro tamén da Neue Philharmonie Munchen. Ambas participarán no concerto-homenaxe a Nicanor Zabaleta (sábado 5 de agosto) organizado coa colaboración da Asociación Española de Arpistas (AEDA). A cita, que terá lugar a partir das 19.00 horas no Teatro Coliseo Noela, estará guiada pola arpista galega Alba Barreiro, que guiará ao público pola vida e obra de Zabaleta.
Ao fío desta incorporación, Romaní salientou a calidade e técnica das e dos participantes deste edición: “A programación deste Noia Harp Fest suma a excelencia tanto de intérpretes de recoñecida traxectoria musical, como poden ser Laoise Kelly ou Gilles Chabenat, como das novas músicas que están a destacar nas mellores orquestras europeas, como Claudia Besné ou Beatriz Cortesão”, apuntou o director. Precisamente esta última será a solista da estrea mundial de Hibrys, a gañadora da primeira convocatoria do Premio Portus Apostoli e que interpretará a Real Filharmonía de Galicia o sábado 5, ás 21:30 horas, na Praza do Tapal.
Ademais desta estrea, o Noia Harp Fest tamén acollerá a presentación pública das suites Micelio, de Anxo Pintos, e que contará coa violinista Begoña Riobó, e Escumas Atlánticas, de Rodrigo Romaní, na que participarán Laoise Kelly, Mary Macmaster e Beatriz Martínez. Ambas pezas, interpretadas por SonDeSeu, poderanse escoitar o domingo 6 de agosto, a partir das 21:30 horas, na Praza do Tapal.
PROGRAMACIÓN 10º NOIA HARP FEST
O 10º Noia Harp Fest dará comezo o xoves 3 de agosto cunha sesión festiva e que porá en valor o talento local e de proximidade. O alumnado das escolas de arpa de Galicia participará, por segundo ano consecutivo, nun encontro aberto ao público. Trátase dunha proposta moi singular ao por en relación a todas e todos os estudantes do instrumento no país.
O venres 4 estará fiado polo virtuosismo de mulleres arpistas do ámbito do folk. A irlandesa Laoise Kelly, considerada a máis relevante da súa xeración, abrirá a xornada da igrexa de Santa María a Nova. Pioneira nun novo estilo de conducción da arpa instrumental e recoñecida pola crítica polos seus traballos en solitario, participou na gravación de máis de 70 álbums con artistas como Seamus Heaney, The Chieftains ou Sharon Shannon. Ás 21.00 horas, na praza do Tapal, será a quenda do dúo franco-alemán conformado por Gilles Chabenat e Daniela Heiderich. Evocarán melodías de baile conmovedoras e cancións emotivas cun repertorio que incluirá tanto composicións propias modernas como músicas tradicionais francesas e alemás. A noite pecharase cunha das bandas que irromperon na escena folk nos 90, The Poozies, e que será unha das grandes sensacións do festival pola súa gran colección de temas e melodías groovy.
O sábado 5, o Noia Harp Fest e a AEDA renderán no Coliseo Noela unha homenaxe especial a Nicanor Zabaleta –considerado o mellor intérprete do instrumento -no trixésimo aniversario da súa morte. Na cita participarán as arpistas Elisabeht Cerra e Claudia Besné. De seguido, contra ás 21.30 horas, será a estrea mundial de Hibrys, coa Real Filharmonía de Galicia -dirixida polo galego Maximino Zumalave e coa portuguesa Beatriz Cortesão como solista-. O repertorio da cita tamén contará con obras de Johann Sebastian Bach e Ludwig van Beethoven.
A última xornada da décima edición do Noia Harp Fest comezará ás 19.00 horas do domingo 6 de agosto cun concerto da arpista, cantante e artista multidisciplinar Musgö, especialista en looping ao vivo e arpa eléctrica. O seu traballo é unha mestura de contemporáneo e vintage, cunha posta en escena atrevida e elegante que se poderá ver no Teatro Coliseo Noela. Finalmente, o broche dourado do evento chegará da man da orquestra de folk de Galicia. SonDeSeu estreará na praza do Tapal dúas novas composicións creadas especificamente para este concerto: serán as suites Micelio, de Anxo Pintos, e Escumas Atlánticas, de Rodrigo Romaní.
Todos os concertos do 10ª Festival Internacional de Arpa Vila de Noia serán de entrada libre e celebraranse en horario de tarde en espazos emblemáticos da localidade. É o caso da Praza do Tapal, da igrexa Santa María A Nova ou do Teatro Coliseo Noela. Para máis información sobre as sedes e programación, pódese visitar o espazo web www.noiaharpfest.gal. O Noia Harp Fest, organizado pola asociación homónima, conta co patrocinio da Xunta de Galicia a través da Axencia Turismo de Galicia, do Concello de Noia e da distribuidora musical Altafonte. Tamén colaboran nesta edición o Liceo de Noia e a Asociación de Española de Arpistas.
Xoves 3 de agosto Liceo de Noia, 19:00 horas no Liceo de Noia – II Encontro de Escolas de Arpa de Galicia Liceo de Noia, 20:30 horas no Liceo de Noia – Foliada de benvida ao X Noia Harp Fest
Venres, 4 de agosto 19:00 horas na igrexa Santa María A Nova – Laoise Kelly 21:00 horas na Praza do Tapal – Gilles Chabenat & Daniela Heiderich 22:00 horas na Praza do Tapal The Pozzies Sábado 5 de agosto 19:00 horas no Teatro Coliseo Noela – Homenaxe a Nicanor Zabaleta: Elisabeth Cerra e Clauda Besné. En colaboración coa AEDE. 21:30 horas na Praza do Tapal – Real Filharmonía de Galicia. Estrea absoluta de Hibrys, gañadora do premio Portus Apostoli
Domingo 6 de agosto 19:00 horas no Teatro Coliseo Noela – Müsgo 21:30 horas na Praza do Tapal – SonDeSeu + convidadas. Estrea absoluta das suites Micelio e Escumas Atlánticas
O 10 º Noia Harp Fest celebrarase do 3 ao 6 de agosto de 2023
O Noia Harp Fest convoca a II edición do Premio Internacional de Composición Portus Apostoli, que este ano buscará ampliar o repertorio de obras para arpa e banda
O certame promovido polo Festival Internacional de Arpa e o Concello Noia publica as bases do certame, que aumentará a contía dogalardón e concederá unha Mención de Honra á peza que quede en segundo lugar
‘Hibrys’, a composición gañadora da primeira edición do Portus Apostoli, estrearase o 5 de agosto da man da Real Filharmonía de Galicia, dirixida por Maximino Zumalave e coa portuguesa Beatriz Cortesão como solista
A segunda edición do premio internacional de composición Portus Apostoli xa está en marcha. O Noia Harp Fest (NHF) vén de publicar na súa web oficial, www.noiaharpfest.gal, as bases na da nova convocatoria do galardón, patrocinado polo Concello de Noia, e que nesta ocasión recoñecerá as creacións escritas para arpa e banda.
O Premio Portus Apostoli naceu en 2022 como unha aposta por ampliar o repertorio de obras para arpa e orquestra. Desta quenda, o certame afondará nesa mesma idea, mais dirixida a favorecer o aumento de obras nas que o instrumento protagonista do Noia Harp Fest, a arpa,poida combinar cunha banda O galardón, cuxo recoñecemento económico aumenta até os 2.500 euros, conlevará tamén a estrea absoluta da obra no marco dun concerto especial, vinculado ao NHF, a cargo da Banda Municipal de Santiago coa colaboración da Banda de Música de Noia, e coa interpretación de solistas do ámbito internacional. Ademais, como novidade, outorgarase unha Mención de Honra, sen achega económica, para a obra que quede en segunda posición no certame.
A convocatoria do Premio Portus Apostoli, que conta coa colaboración de Turismo de Noia, está aberta desde hoxe e até o vindeiro 23 de decembro de 2022 a todas as compositoras e compositores de calquera nacionalidade e sen límite de idade. Un xurado de recoñecido prestixio será o responsable de valorar e premiar as creacións, nas que se terán en conta, entre outros aspectos, a proposta creativa; o tratamento da técnica e da escritura para arpa; a coherencia, a proporción e o equilibrio no traballo técnico; ou o equilibrio entre dificultade e resultado musical. Ademais, o tribunal valorará positivamente aquelas obras con referencias á música ou á cultura galegas.
Cada compositora ou compositor poderá presentar unha única obra, que deberá ser orixinal e inédita, de xeito que non poderán participar no certame pezas creadas froito dun encargo remunerado, premiadas noutro concurso ou que fosen interpretadas anteriormente en concertos ou actos públicos. A nova composición será de tema libre, deberá estar escrita para arpa e banda (sen medios electroacústicos) e deberá ter unha duración de entre 10 e 15 minutos.
Para máis información sobre as bases do II Premio Internacional de Composición Portus Apostoli e a documentación que se debe remitir para poder participar, o NHF recomenda visitar o espazo web www.noiaharpfest.gal, no que se atopará o formulario de solicitude pertinente. O fallo do xurado darase a coñecer antes do 15 de febreiro de 2024.
Beatriz Cortesão e Maximino Zumalave, coa RFG na estrea mundial de ‘Hibrys’
No marco da décima edición do Noia Harp Fest, que se celebrará do 3 ao 6 de agosto, terá lugar a estrea da peza gañadora da primeira edición do Portus Apostoli: Hibrys, do compositor hispano-arxentino Alejandro Civilotti. A Praza do Tapal acollerá na noite do 5 de agosto, a partir das 21:30 horas, a primeira interpretación que se faga da obra. Chegará da man da Real Filharmonía de Galicia, baixo a dirección do galego Maximino Zumalave (Santiago de Compostela, 1956), e contará coa arpista portuguesa Beatriz Cortesão (Coimbra, 1998), membro da European Union Youth Orchestra (EUYO), como solista.
Ademais da estrea absoluta de Hibrys, o público asistente ao Noia Harp Fest poderá gozar dun concerto extraordinario no que a Real Filharmonía de Galicia interpreterá outras dúas composicións: oOratorio de Pascua (1º, 2º e 3º movemento) de Johann Sebastian Bach, e a Sinfonía no.5 en do menor, op.67,de Ludwig van Beethoven.
10º Noia Harp Fest
O Festival Internacional de Arpa Vila de Noia, coñecido como Noia Harp Fest, é o o único festival de Galicia e do noroeste da Península Ibérica que ten como absoluta protagonista a arpa. No seu cartel conflúen artistas de estilos moi diversos procedentes do ámbito galego, estatal e internacional, mais unidos pola interpretación musical a través da arpa. Bandas e solistas como Laoise Kelly, The Pozzies, Müsgo, SondeSeu ou Dilles Chabenat e Daniela Heiderich, entre outras, participarán na décima edición do NHF, que terá lugar do 3 ao 6 de agosto de 2023. Todos os concertos serán de entrada libre e celebraranse en espazos emblemáticos da vila de Noia, como é o caso da Praza do Tapal, da igrexa Santa María A Nova ou do Teatro Coliseo Noela.
