Desde a Casa-Museo Manuel María anuncian un ambicioso proxecto musical que se vai levar a cabo proximamente: o Concerto As rúas do vento ceibe. Un espectáculo musical baseado na musicalización de poemas de Manuel María, pertencentes ao seu poemario “As rúas do vento ceibe”, alén doutros poemas de Rosalía e Celso Emilio Ferreiro, que se poderá desfrutar gratuitamente o 15 de maio, ás 20.30 hrs, en Lugo (Auditorio Municipal Fuxan os Ventos); o 29 de maio, ás 20.30 hrs, en Pontevedra (Pazo da Cultura); e o 30 de maio, ás 20,30 hrs, en Santiago de Compostela (Auditorio de Galicia).
O concerto vai reunir máis de 300 voces, músicos e músicas, que interpretarán as pezas compostas por Xosé Carlos Seráns. A Orquestra Sinfónica de Pontevedra, a mezzosoprano, Julia Portela Piñón e unha ampla representación coral de Galiza, cun un coro mixto -composto por cinco corais (Coro de Cámara Thalassa de María, Coro do Hospital de Lugo, Coro Liceo de Vilagarcía, Coral de Solfa de Santiago de Compostela e Sociedade Coral Polifónica de Pontevedra)- e un coro xuvenil -formado por tres coros (Peque Coro In Crescendo de Ferrol, Voces da Terra Chá e Coro do IES A Xunqueira de Pontevedra)-, todo dirixido polo director de orquestra, David Fiuza. Unha montaxe de grande envergadura musical e de grande significación cultural para Galiza.
Os billetes para poder presenciar este espectáculo pódense retirar en:
–Lugo: poden solicitarse, despois do 5 de maio, en liña: en https://entradaslugo.es ou presencialmente: no Vello Cárcere ou na Oficina de Turismo (Praza do Campo).
–Pontevedra: non hai que retirar. Entrada libre até completar o aforo.
–Santiago de Compostela: poden solicitarse, a partir do 19 de maio en liña: en https://compostelacultura.gal ou presencialmente: na Zona C (Preguntoiro, 1-Praza de Cervantes, en horario de martes a sábado, de 11 a 14 hrs e de 16 a 19 hrs).
O concerto está patrocinado pola Área de Cultura, Patrimonio Histórico-Artístico e Normalización Lingüística da Deputación de Lugo, polo Concello de Pontevedra, a través da Concellaría de Dinamización Social e Cultural, e pola área de Cultura da Deputación da Coruña. Tamén colaboran a Concellaría de Cultura,Turismo e Promoción da Lingua do Concello de Lugo e o Concello de Santiago de Compostela.
CAMINHO, O NOVO SINXELO DE QUINKILLADA QUE PROFUNDIZA NO LADO MÁIS ÍNTIMO DA BANDA
OS DO MORRAZO CAMBIAN DE REXISTRO E APOSTAN DESTA VEZ POR UN TEMA MÁIS LENTO E REFLEXIVO
MAÑÁ SÁBADO 2 DE MAIO TERÁ LUGAR O SEU CONCERTO DE COMEZO DE XIRA, CON ENTRADAS Á VENDA EN ENTRADIUM.COM
A banda morracense Quinkillada racha os seus esquemas musicais con Caminho, un tema que versa sobre a superación persoal e que permite coñecer unha visión máis intimista e persoal da banda, con ritmos máis lentos dos que teñen acostumados ao seu público, mergullándose en retrousos de música urbana lenta que derivan en ventos máis animados, creando unha sensación de que o tema vai medrando co paso dos segundos. Esa composición estrutural non é aleatoria, xa que é unha representación musical dese crecemento persoal que fai que vaias superando os obstáculos da vida.
Caminhopon o foco nas dificultades persoais que atravesamos na nosa vida, e, dende un enfoque persoal, a banda rebusca no seu interior para ofrecer un novo sinxelo que contrasta no musical e no letrístico co resto de traballos da banda. Unha nova cara que expón a versatilidade da banda que leva presentados neste ano os sinxelos Os reis do lugar e Quinkirumba.
COMEZO DA XIRA ENTRE CUMBIAS E RUMBAS
Quinkillada porá o punto de partida da súa nova xiraEntre Cumbias e Rumbas cun concerto especial na sala Adro de Cangas mañá sábado 2 de maio. O show terá lugar a partir das 22:00 e servirá para celebrar o quinto aniversario da banda, que ten preparado un directo cheo de momentos inesquecibles que levarán polas distintas festas, festivais e salas, para convertelas en torreiros cheos de baile e moita diversión. As entradas están xa dispoñibles en entradium.com.
Polo momento, os festivais confirmados son o SonRías Baixas, un dos máis importantes do verán galego, e no que xogarán na casa, así como o festival Asalto ao Castelo (Vimianzo) e Festival de la Luz (Boimorto).
28-30/08 · Festival de la Luz · Boimorto | ENTRADAS
MÁIS SOBRE QUINKILLADA
Transitando xéneros como a cumbia, o rock, o ska e os ritmos máis bailables, Quinkillada é o grupo que sintetiza a alma da festa galega. Combinando nas súas composicións tons festivos, populares e reivindicativos, a banda constrúe o seu legado a base de músicas enérxicas, auténticas e, sobre todo, bailables. Dende os torreiros das festas máis populares ás tarimas das salas e festivais máis importantes, Quinkillada é capaz de transformar calquera contexto nunha pista de baile.
Cunha carreira meteórica ás súas costas, a banda morracense xa conta con máis dun centenar de concertos no seu haber, levando o seu bo rollo a grandes festivais galegos como OurenSound, Festival de la Luz, Castañazo ou Armadiña Rock. A súa música chegou tamén ás grandes salas de concertos do estado, con actuacións nas míticas Razzmatazz de Barcelona ou Capitol de Santiago de Compostela.
Con xa tres discos publicados, acumulando centos de milleiros de reproducións en plataformas, a banda traballa en novos horizontes aos que levar a súa festa de guitarras, ventos e diversión. A verbena galega busca expandirse e chegar a todas partes envolta na súa música.
O Instituto de Estudos Chairegos, co patrocinio e financiación da Área de Cultura-Vicepresidencia da Deputación de Lugo, e coa colaboración do Concello de Vilalba, organiza o concerto NA CASA DELAS, a cargo do cuarteto vocal lucense SON DE CORDA, formado por: Esperanza Iglesias (soprano), Carmen Prendes (contralto), Fernando G. Jácome (tenor) e Antón Castro (baixo).
Neste acto participarán tamén Raúl Rodríguez (piano) e María Pichín (danza).
A realizacion de videos corre e cargo de:Manuel Lucas e Alejandro Gándara.
O acto terá lugar o domingo 10 de maio de 2026, ás 20:00 horas, no Auditorio Municipal de Vilalba.
Presentacións de libros, concertos musicais, homenaxes e apoio ás nosas letras e á nosa lingua, palestras, rutas por Galicia
Venres, 8 de maio20:00 h Presentación libro: Memorias dun porco teixo Xosé M. Felpeto Casa da Cultura de Vilalba
Domingo, 10 de maio 20:00 h Concerto: Na casa delas Son de corda Auditorio Municipal de Vilalba
Domingo, 17 de maio 12:00 h Pasquín na web e redes: Letras Galegas ’26 O IESCHA na defensa da lingua galega E apoiando a manifestación en Santiago de Compostela
Xoves, 21 de maio 20:00 h Presentación libro: Semente de mencer (Obra poética completa) Darío X. Cabana Con Alexandra Cabana Casa da Cultura de Vilalba
Venres, 29 de maio 20:00 h Palestra Letras Galegas’26: Begoña Caamaño Con Beatriz Maceda e Marica Campo Casa da Cultura de Vilalba
Domingo, 31 de maio 9:30 h. Saída de Vilalba hacia Galdo, en Viveiro XIV Ruta por Galicia: Por terras de Viveiro Con Noela Feal Saída desde a Casa da Cultura
Eris Mackenzie publica Laíño, un traballo que combina creación propia e reinterpretación emocional de clásicos da música galega, reafirmando a súa identidade musical entre a tradición e a electrónica contemporánea.
O EP está composto por seis cancións.“Vivir na Coruña”, unha homenaxe á terra de orixe, e “Teño Saudade”, icónica composición de Andrés Do Barro, máis catro cancións orixinais que reflicten o universo sonoro do artista, no que conflúen influencias da electrónica máis pura cunha sensibilidade melódica moi persoal.
Con estas versións, o artista busca render tributo a dúas pezas fundamentais da música galega, mostrando o seu respecto e admiración por un legado que marcou a súa traxectoria persoal e artística. Estas influencias esténdense a figuras como Ana Kiro, Xil Ríos e Pucho Boedo, cuxos repertorios forman parte da banda sonora vital de Eris Mackenzie.
O EP “Laíño” representa unha declaración de intencións: tender pontes entre a memoria musical de Galicia e as correntes electrónicas actuais, xerando unha proposta única que conecta pasado e presente desde unha mirada contemporánea.
O dúo Baraza, composto por Alberte Núñez (acordeón diatónico) e Uxía García (frauta e voz), estará este sábado, día 25 de abril, ás 20 horas, na Casa-Museo Manuel María, para presentar o seu proxecto Remelexo. Un espectáculo de música tradicional galega e brasileira combinado con imaxes e narración.
O concerto, que ten como fío condutor a vida de Diniña, unha muller galega que ten de emigrar para o Brasil, fai un percurso polas disintas músicas tradicionais de ambos países, Galiza e Brasil.
Alberte Núñez, músico e mestre, compaxina a súa actividade como acordeonista e arranxista coa de docente en asociacións culturais, entre outras na Tradescola de Lugo, alén de de impartir obradoiros e concertos didácticos sobre o seu instrumento. Como intérprete participa e participa en formacións como Comando Curuxás. Son numerosos os proxectos e traballos discográficos en que ten participado, quer no plano tradicional, quer noutros ámbitos como o jazz, blues, choro, klezmer ou folk.
Uxía García, frautista e filóloga, cursou os estudos profesionais e superiores de música en Santiago e na Coruña. Foi alumna da Escola de Altos Estudos Musicais e ten participado e tocado en numerosas formacións de banda popular. Na actualidade forma parte, tamén, do Coro da Ra.
Este sábado, 18 de abril, ás 21.30 horas, un dos proxectos máis singulares da nova escena musical galega presentará en Compostela, por primeira vez en vivo, o seu segundo traballo discográfico, publicado o pasado venres, 10 de abril
Con Un saber, Alana explora os ritmos da nosa tradición oral,coa súa característica base electrónica e pop, nun disco de evolución e madurez, ritmicamente diverso, para bailar, cantar, gozar e… emocionar
A Sala Capitol bailará esta fin de semana ao son de Alana. Un dos proxectos máis singulares da nova escena musical galega presentará en Santiago de Compostela, por primeira vez en vivo, o seu novo disco, Un saber, que viu a luz o pasado venres, en todas as plataformas dixitais. A cita será este sábado, 18 de abril, contra ás 21.30h.
Neste segundo LP, Alana explora os ritmos da nosa tradición oral, sen perder a súa xa característica base electrónica e pop, nun disco de evolución e madurez, ritmicamente diverso, para bailar, cantar, gozar e… emocionar. E así o poderá confirmar en directo todo o público que acuda ao directo este sábado na Capitol.
No concerto, cuxa posta en escena –de inspiración floral– correrá a cargo de As dúas e punto, Alana estará arroupada por múltiples colaboracións sorpresas. As últimas entradas están dispoñibles na páxina web da sala: https://salacapitol.entradas.plus/entradas/es/alana-capitol
Alana son Antía Vázquez, Eloy Vidal e Pablo Castro. O seu é un proxecto novo, diverso, cunha potente posta en escena e unha importante vinculación coa tradición e o baile; unha proposta que parte das recollidas e mestura a música tradicional con ritmos de base electrónica e pop, nunha coidada e xa característica produción musical.
Con este novo traballo discográfico, Un saber, Alana reflicte o seu cambio vital e amosa, tamén, unha continuidade, desde aquel O xeito á Cántigha, a súa festexada ópera prima.
Agora, a banda regresa con máis forza se cabe, e coas mesmas gañas de seguir facendo o que máis lles apaixona: “Desde o noso primeiro disco, houbo moitos cambios en nós, tanto a nivel profesional como a nivel persoal, e pensamos que o disco reflexa este cambio. Pero é, tamén, unha continuación: queremos que sexa un disco que transmita o ben que o pasamos facendo música; un disco para bailar, cantar, gozar e, se cabe, emocionar”. O proxecto do disco contou para o seu desenvolvemento co apoio da Xunta de Galicia a través da Axencia Galega das Industrias Culturais (Agadic).
Tralo seu paso pola Sala Capitol de Compostela, Alana presentará en directo Un saber, tamén, nas seguintes prazas:
22.05.2026. Festival de Cans (O Porriño).
23.05.2026. Hórreo Vivo (Rianxo).
13.06.2026. Negreira.
27.06.2026. O son da aldea (Pantón).
E moitas máis por anunciar…
UN SABER, UN DISCO PARA BAILAR, CANTAR, GOZAR E EMOCIONAR
“Un saber é unha evolución sobre como empezamos a vivir a música nos primeiros tempos de Alana e como o facemos agora… A nivel rítmico, é un disco moi diverso, xa que exploramos a meirande parte dos ritmos da nosa tradición oral. En moitos casos, as cancións están ligadas con momentos ou persoas que foron importantes nas nosas vidas”, apunta a banda. E continúa: “Había unha idea que nos rondaba na cabeza desde hai tempo, e era a pouca importancia que lle daban as propias informantes á música que facían, algo que xa sabíamos, pero que nos segue sorprendendo a día de hoxe”.
Antía, Eloy e Pablo apuntan, tamén: “O libro publicado por Beatriz Busto Miramontes, Pandereteiras de Mens, fala de como Prudencia, Asunción, Manuela, Adela e Teresa –e, como elas, tantas mulleres no noso país–, non tiñan unha «conciencia directa de que detrás da práctica de tocar a pandeireta, cantar e bailar houbese un saber musical».
Para elas a música eran esas charangas ou murgas, pensaban que o seu non constituía un ’saber’ en si mesmo, e de aí o nome do disco”. Para Alana, esa música constitúe algo de tan alto valor, de tan amplo coñecemento e de tan grande saber que “queríamos aportar o noso pequeno grao de arena para seguir con ese legado que nos deixaron e nos deixan”.
ALANA: RAÍZ, RITMO E REVOLUCIÓN
Alana é un dos proxectos máis singulares da nova escena tradicional galega. Unha formación musical á que dan vida Antía Vázquez, Eloy Vidal e Pablo Castro, e que mestura a música tradicional con ritmos de base electrónica e pop. Unha proposta nova, diversa, cunha potente posta en escena e unha importante vinculación coa tradición e o baile.
O marcado estilo persoal da banda levounos a compartir escenario con artistas como Rodrigo Cuevas e a participar nalgunhas das principais citas musicais galegas, como o Atlantic Pride ou o Festival Internacional do Mundo Celta de Ortigueira; pero, tamén, en programacións noutros lugares da Península Ibérica e de Europa, formando parte de espazos como o Festival Interceltique de Lorient (Francia) ou o Terra fest de Genève.
No seu primeiro ano de vida foron gañadores do Premio Xuventude Crea na categoría de música, gañadores do concurso de bandas do Festival Internacional do mundo celta de Ortigueira, no que tiveron a ocasión de tocar en dous anos consecutivos, finalistas como mellor proxecto de folk nos Premios da música galega Martín Códax e semifinalistas como mellor album en galego nos Premios MIN. O xeito á cántigha é o seu primeiro disco, mentres que Un saber é o seu segundo traballo.
Jobarteh, que colaborou na ‘BSO de Mandela: Long walk to freedom’, é a primeira muller solista de kora, rompendo unha tradición hereditaria de sete séculos
Armstrong, directora da Historical Harp Society of Ireland, é considerada a maior autoridade mundial na interpretación da arpa histórica gaélica
A escocesa Gilchrist salienta por revolucionar a arpa celta mediante a hibridación do folclore tradicional co jazz e a improvisación contemporánea
O Festival Internacional de Arpa Vila de Noia desvela os primeiros nomes que formarán parte da programación da súa 13ª edición, que se celebrará na localidade coruñesa do 29 de xullo ao 1 de agosto. As recoñecidas arpistas Sona Jobarteh, Siobhán Armstrong e Maeve Gilchrist encabezarán o cartel do único festival de arpa de todo o noroeste peninsular.
Con este primeiro anuncio, Noia Harp Fest festival consolida non só a súa aposta pola diversidade estilística, senón que mantén o seu compromiso de programar ás mulleres arpistas máis relevantes do panorama musical a nivel galego, nacional e internacional, á vez que actúa como plataforma de lanzamento para as novas virtuosas. Así, se no último lustro contou con nomes como Alba Barreiro, Ana Crismán, Beatriz Cortesao, Beatriz Martínez, Bleuenn Le Friec, Camille Levecque, Claudia Besné, Francesca Romada Di Nicola, Laoise Kelly, Müsgo, Nadia Birkenstock, Noelia Cotuna, este ano contará cunha programación que dará boa conta do elevadísimo nivel interpretativo que está a vivir o instrumento en distintos lugares do mundo.
O anuncio da participación de Jobarteh, Armstrong e Gilchrist tamén dá pé a coñecer tres das primeiras sedes oficiais desta edición, e que se corresponden á vez con tres dos seus espazos máis emblemáticos: o histórico Teatro Coliseo Noela, a íntima Igrexa de Santa María A Nova e a espectacular Praza do Tapal.
O Festival Internacional de Arpa Vila de Noia, coñecido como Noia Harp Fest, é unha iniciativa promovida por Nalgures Producións e cuxa dirección artística recae na Asociación Cultural Noia Harp Fest. O evento conta co apoio do Concello de Noia e da Xunta de Galicia a través de Turismo de Galicia no marco dos Concertos do Xacobeo. Tamén colaboran a Sociedade Cultura Recreativa Liceo de Noia, a Asociación Española de Arpistas (AEDA), a Deputación Provincial da Coruña e Acción Cultural Española.
Sona Jobarteh
Sona Jobarteh
Sona Jobarteh é unha recoñecida compositora, cantante e instrumentista de orixe gambiana e británica, nada en 1983. É a primeira muller solista de kora pertencente a unha das cinco familias principais de griots, rompendo cunha tradición hereditaria de sete séculos. Formada en música clásica no Royal College of Music de Londres, destaca pola súa capacidade para fusionar a tradición mandinga co blues e o afropop.
O seu estilo instrumental caracterízase por unha mestura de virtuosismo tradicional e arranxos modernos que expanden os límites da kora. Colaborou en importantes bandas sonoras cinematográficas, entre elas a da película ‘Mandela: Long Walk to Freedom’. O seu álbum ‘Fasiya’ marcou un fito na música africana contemporánea, acadando recoñecemento internacional pola súa calidade técnica e emotividade. En 2023 foi investida doutora honoris causa pola prestixiosa Berklee College of Music, consolidándose como unha das artistas máis influentes do continente africano. Alén da súa faceta artística, Jobarteh fundou a Academia Gambia en 2015, unha institución dedicada a reformar o sistema educativo en África a través da cultura. Desde Londres, hoxe en día lidera proxectos de activismo social e preservación do patrimonio musical africano.
Siobáhn Armstrong
Siobhán Armstrong
Desde as illas, concretamente desde Irlanda, chega Siobhán Armstrong, unha das súas arpistas máis importantes, recoñecida internacionalmente como unha figura clave no renacemento da arpa irlandesa antiga con cordas de metal e por ser a maior autoridade, a nivel mundial, na interpretación da arpa histórica gaélica. O seu labor foi esencial para que o instrumento fora recoñecido pola UNESCO como Patrimonio Cultural Inmaterial da Humanidade.
Fundadora e directora da Historical Harp Society of Ireland, dedicou a súa carreira á recuperación da técnica e o repertorio deste instrumento histórico esquecido durante séculos. De feito, Armstrong toca unha réplica única da arpa do Trinity College de Dublín, caracterizada por estar tallada nun só bloque de madeira de salgueiro e encordada con fíos de latón e prata. Utiliza as unllas, tal e como describen as fontes históricas do século XVII, para obter o timbre metálico e sostido propio do instrumento. A súa discografía inclúe traballos fundamentais como ‘Cláirseach na hÉireann’, onde explora as raíces da música irlandesa dos séculos XVI ao XVIII. Ten colaborado con directores de renome como William Christie ou Jordi Savall, e actualmente é a directora artística do festival Scoil na gCláirseach, o evento anual máis relevante do mundo dedicado á arpa de cordas de metal.
Maeve Gilchrist
Maeve Gilchrist
A tríade de grandes mulleres que lideran este Noia Harp Fest complétase cunha das solistas máis influentes do panorama actual: a intérprete, compositora e cantante escocesa Maeve Gilchrist, recoñecida por revolucionar a arpa de levas (arpa celta) mediante a hibridación do folclore tradicional co jazz e a improvisación contemporánea.
Nada en Edimburgo e formada no Berklee College of Music, o seu estilo destaca por un uso innovador do instrumento como percusión e o emprego de técnicas cromáticas avanzadas. O seu aclamado álbum ‘The Harpweaver’, descrito por The New York Times como “unha sofisticada mestura de folk e jazz”, foi cualificado pola crítica como “unha obra mestra da música de cámara moderna”, integrando arranxos de corda e voz.
Actualmente reside en Brooklyn, onde lidera a nova xeración de músicos que buscan elevar a arpa de levas a contextos sinfónicos e experimentais. Ademais, Gilchrist exerce tamén como directora artística do Rockport Celtic Festival, consolidándose como unha figura punteira na xestión cultural internacional.
