Presentación dos libros HORA DE PENUMBRA e DE CASA QUEIMADA, obras gañadoras do II Certame de Poesía Torre de Caldaloba, no Museo das Aves de Cospeito

O vindeiro sábado 12 de decembro, a partir das 17 horas no Museo das Aves de Cospeito, celebrarase a presentación das obras gañadoras no II Certame de Poesía Torre de Caldaloba, que organiza o Concello de Cospeito e a Asociación Cultural de San Martiño de Pino, en colaboración con Culturalia GZ. Trátase das obras HORA DE PENUMBRA, de Xurxo Alonso, gañadora do primeiro premio, e DE CASA QUEIMADA, cuxa autora é Iria Collazo López, que acadou o segundo premio no devandito certame.

Está prevista a asistencia ao acto de presentación, ademais dos autores citados, do alcalde de Cospeito, Armando Castosa, Inés Lozano, en representación da Asociación Cultural de Pino, Martiño Maseda, administrador de Culturalia GZ, e Henrique Alvarellos, director de Alvarellos Editora, a editorial encargada da publicación das obras que acadan premio neste certame poético nos eidos da Chaira.

Dada a situación pandémica provocada pola COVID-19 manteranse as medidas de seguridade sanitaria pertinentes.

Nesa mesma xornada tamén se realizará a xuntanza do xurado para deliberar o fallo da 3ª edición do Certame de Poesía Torre de Caldaloba.

Festival Atlántica.- Charo Pita e a Banda Municipal de Santiago musican ‘O gato con botas’

Charo Pita e a Banda Municipal de Santiago musican ‘O gato con botas’

·       O espectáculo forma parte da programación do Festival Atlántica e será este domingo, 6 de decembro, ás 12 horas, no Museo Centro Gaiás da Cidade da Cultura

·       Charo Pita tamén estará o sábado na Biblioteca Pública Miguel González Garcés da Coruña co espectáculo infantil ‘Menú de contos’

O Museo Centro Gaiás da Cidade da Cultura acolle este domingo, 6 de decembro, a partir das 12 horas, o espectáculo ‘Unha aventura singular: o gato con botas’, unha versión musicada do conto clásico na que participa a narradora Charo Pita e a Banda Municipal de Música de Santiago de Compostela coa dirección de Casiano Mouriño. O espectáculo, concibido ex profeso para a ocasión, esgotou os seus convites ás poucas horas de abrir as reservas e a lista de espera está tamén completa.

Charo Pita únese así ao grupo de contadores do Festival Atlántica que actuaron acompañados pola veterana banda picheleira, nun formato que se inaugurou na edición do 2018 con Nono Granero e que vai camiño de se converter nun clásico deste encontro de narración oral. A artista galega, que posúe unha ampla experiencia na combinación de música e contos, afronta neste espectáculo un dobre desafío: a adaptación dun clásico da tradición europea e facelo na compaña dos case 40 integrantes da banda.

‘O gato con botas’ é un conto popular europeo recompilado a finais do século XVII polo escritor Charles Perrault no seu libro ‘Contos de mamá ganso’, aínda que existen versións anteriores. Nel nárranse as argucias dun espelido gato para axudar o seu amo na procura de fortuna.

Cita cos contos na Coruña

Charo Pita vai actuar tamén este sábado dentro da programación do Festival Atlántica na Coruña. Os pequechos con idades entre 3 e 8 anos están convidados á Biblioteca Pública Miguel González Garcés, a partir das 12 horas, para gozaren con ‘Menú de contos’. A entrada é gratuíta, mais cómpre reservala no 881 960 378 ou na biblioteca.

Neste espectáculo haberá historias con princesas, sapos, bruxos, bonecos, trens, fabas, reis, lúas ou camelos. Contos tan variados coma un menú de restaurante: historias salgadas coma as patacas fritas, outras tristeiras coma os botes de espárragos e mesmo tenras coma os toriños de pescada. Dependerá do menú do día, de como veña a contadora e, sobre todo, de como sexa a fame dos que escoitan.

Artista polifacética

A galega Charo Pita naceu á idade de seis anos cando acabou de ler o seu primeiro libro. Leva contando historias de viva voz e impartindo obradoiros de narración oral e lectura en voz alta desde o ano 94, como narradora en solitario, dentro de espectáculos bilingües inglés-galego, ou en sesións nas que se combinan os contos e a música. Como escritora ten máis dunha ducia de libros publicados. Recibiu algúns galardóns literarios, como o premio Espiral Maior de poesía no ano 2001 ou o Manuel Murguía de narracións breves para adultos no 2018. Recentemente, o seu poemario ‘O cuarto de Jane’ gañou o primeiro premio do XV Certame de Poesía Erótica Illas Sisargas. Unha das súas facetas máis persoais é a de mesturar contos e música, de aí a súa participación en proxectos como ‘A nena e o grilo no país das apertas’ xunto a Magín Blanco, en ‘Estamos no verán’ xunto a Xoán Curiel ou en ‘No país do vento’ da man de María Faltri e Jorge Juncal.

No tocante á Banda Municipal de Santiago de Compostela, é unha das máis antigas de Galicia, xa que naceu en 1848. Ao primeiro tiña carácter afeccionado, ata que en 1876 o Concello decidiu facerse cargo dela e comezou a se profesionalizar. Na actualidade conta con 37 compoñentes e desenvolve unha intensa actividade de concertos ao longo de todo o ano. O seu director é o pontevedrés Casiano Mouriño Maquieira.

Fundación María José Jove. Exposición fotográfica MODO ESPERA. 99 DÍAS EN PAUSA

A Fundación María José Jove (FMJJJ), en colaboración co Concello da Coruña, organiza a Exposición fotográfica MODO ESPERA. 99 DIAS EN PAUSA. A apertura de dita exposición terá lugar o mércores, 2 de decembro de 2020, a partir das 11:30 horas, na Praza de Lugo ( zona Fnac) da Coruña.

Está prevista a asistencia ao acto de apertura a Concelleira de Igualdade da Coruña, Eudoxia Neira Fernández, a presidenta da Fundación María José Jove, Felipa Jove Santos, o alumnado do taller de fotografía inclusiva da FMJJ, o seu profesor (Asociación Why Nos), o escritor Martiño Maseda (autor dos textos que acompañarán as fotografías) e tres persoas da FMJJ involucradas na exposición.

Adxúntase cronograma da apertura da Expo MODO ESPERA. 99 EN PAUSA

Presentación do libro ABRIL, de Luz Darriba, no Centro Cultural O Vello Cárcere de Lugo

O xoves 26 de novembro, ás 20 horas no Centro Cultural O Vello Cárcere de Lugo, celebrarase a presentación do libro ABRIL, do que é autora a artista multidisciplinar Luz Darriba. O acto de presentación está organizado pola Editorial Belagua e a Libraría Trama, e nel participarán, ademais da autora do libro, a tamén escritora Marica Campo.

Debido as restricións establecidas pola pandemia da COVID-19, haberá limitación da capacidade a trinta persoas como máximo.

AELG. V Xornada da Sección de Literatura Dramática. As artes escénicas e as súas literaturas ante crises e pandemias

O 20 e 21 de novembro terá lugar a V Xornada da Sección de Literatura Dramática. As artes escénicas e as súas literaturas ante crises e pandemias, actividade organizada pola AELG, co patrocinio co patrocinio do Concello da Coruña, Deputación Provincial da Coruña e CEDRO, e a colaboración da Universidade da Coruña.

Esta edición, debido ás restricións sanitarias provocadas pola Covid-19, terá un formato virtual, retransmitíndose en directo pola canle de Youtube da AELG, nesta ligazón.

O programa é o seguinte:

SEXTA FEIRA, VENRES, 20 DE NOVEMBRO

Emisión en directo desde a canle de Youtube da AELG.

– 16:30 Apertura da IV Xornada.

– 16:45 Mesa redonda As literaturas para teatro e danza fronte ás crises.

Presentación e moderación: Afonso Becerra.

Interveñen: Branca Novoneyra e AveLina Pérez.

– 17:50 Mesa redonda A cultura é un ben necesario en tempos de crise?​

Presentación e moderación: Cilha Lourenço Módia.

Interveñen: Mercedes Queixas e Mercedes Rosón.

– 19:15 Aula maxistral a cargo de Mickael de Oliveira. Dramaturgo e Director artístico do END, Festival Encontros de Novas Dramaturgias de Portugal. Presentación a cargo de Afonso Becerra.

SÁBADO 21 DE NOVEMBRO

Desde a canle de Youtube da AELG.

Entre as 09:55 e as 13:30.

III Festival Pezas dun teatro do porvir, Galiza + Portugal. Procesos abertos de escrita dramática.

Convocatoria aberta a 7 proxectos de escrita dramática ou dramaturxia, para teatro, danza, circo ou outras modalidades escénicas, individuais ou colectivos, de dramaturgas/os que estean a escribir algunha peza nova ou que teñan unha peza recente e queiran abrila ao público, achegando un fragmento ou unha mostra desta. 4 proxectos de Galiza e 3 proxectos de Portugal.

Este festival consta dunha exposición ou mostra dun fragmento da peza ou da peza enteira, no caso de ser breve, dentro dunha duración máxima de 15 minutos. Xusto despois, haberá un tempo complementario para un breve debate ou conversa ao seu respecto, dentro dunha duración máxima 15 minutos.

Neste 2020, o formato será virtual, polo que se publicarán previamente uns vídeos de cada proposta das/os dramaturgas/os ou equipas de dramaturxia na canle de Youtube da AELG. O propio día 21, nas franxas horarias que sinalamos a continuación, retransmitirase cada vídeo e haberá unha conversa por videoconferencia duns 15 minutos cos/as autores/as, onde se lle trasladarán os comentarios máis relevantes publicados previamente na canle. Deste xeito, búscase coñecer a reacción do público, nun diálogo que, quizais, poida servir para enriquecer, por parte da/o dramaturga/o ou equipa de dramaturxia, o acabamento desas pezas en proceso. Neste sentido, animávosvos a que comentedes as vosas opinións na propia canle de Youtube, de cara a facilitar e contribuír a que o seu proceso de creación poida abrirse ás vosas ideas, pensamentos e perspectivas.

Estas son as pezas escollidas, e os horarios en que terá lugar o visionado dos vídeos enviados previamente e a conversa posterior, sempre o día 21 de novembro na canle de Youtube da AELG:

– De 09:55 a 10:00 h. Breve presentación do Festival de Pezas 2020.

– De 10:00 a 10:30 h. Mudras familiares. Borja Fernández.

– De 10:30 a 11:00 h. Mulleres que bailan na néboa. Ana Abad de Larriva.

– De 11:00 a 11:30 h. Museo-viveiro. Helena Salgueiro.

– De 11:30 a 12:00 h. Vendo Opel Corsa. Pornós Teatro: Alba Pérez, Carlota Mosquera, Lucas Simón, Lydia Prada, Noelia González, Uxía Algarra e Yago Durán.

– De 12:00 a 12:30 h. Anti-Benjamin. Ricardo Cabaça.

– De 12:30 a 13:00 h. Declaração de Amor. Isabel Milhanas Machado.

– De 13:00 a 13:30 h. DIY. Projeto Casa: Cátia Faísco.