CINZA, Miguel Díaz

CINZA

Miguel Díaz

Queimemos os libros,

apaguemos as historias,

desprecemos calquera son

que nos achegue á poesía…

Reduzamos a cinza

cada carta de amor,

afastemos a mirada

que nos embelece.

Declaremos a guerra

ós corazóns que aman…

Sintamos o orgullo

de ser caladas ovellas

dun rabaño desprezable…

Anulemos a nosa esencia

e vivamos na superficie

dunha lagoa noxenta…

E deste xeito tamén

conseguirán gañar eles.

Proxección en autocine do film MARÍA SOLINHA, no Campo da Feira de Vilalba

O vindeiro mércores 16 de setembro de 2020, ás 21:00 horas, no Campo da Feira de Vilalba, está prevista a proxección en formato autocine de MARÏA SOLIÑA, un film de IGANCIO VILAR. O acto está organizado polo Instituto de Estudos Chairegos e a Vicepresidencia-Área de Cultura, Patrimonio Histórico Artístico e Normalización Lingüística da Deputación de Lugo, en colaboración co Concello de Vilalba, e coa loxística da produtora do film, VÍA LÁCTEA.

Velaquí a nota informativa de dita proxección.

AELG.- Convite á XXVI Homenaxe “O Escritor na súa Terra – Letra E” a Vítor Vaqueiro: Santiago, 19 de setembro

A Homenaxe “A/O Escritor/a na súa Terra – Letra E“, que cada ano impulsa a AELG, chega neste 2020 á súa XXVI edición, recaendo por decisión da Asemblea de Socias e Socios na figura de Vítor Vaqueiro.

A actividade terá lugar o sábado 19 de setembro, en Santiago de Compostela. A partir das 11:30 horas desenvolverase o programa de actos previsto, que se pode descargar aquí:

11:30 Parque de Galeras (Santiago)

Descubrimento do Monólito conmemorativo e plantación do carballo (árbore simbólico do escritor).

– Intervención do presidente da AELG, Cesáreo Sánchez Iglesias.

– Intervención do homenaxeado, Vítor Vaqueiro.

– Intervención do Alcalde de Santiago de Compostela, ou persoa en quen delegue.

12:30 Concello de Santiago de Compostela

Acto de entrega da “Letra E”

– Lectura da acta de concesión, Anna R. Figueiredo, vicepresidenta da AELG en funcións.

– Intervención do presidente da AELG, Cesáreo Sánchez Iglesias.

– Xabier PazLaudatio.

– Entrega da peza escultórica da artista Soledad Penalta.

– Intervención do homenaxeado: Resposta á laudatio por parte de Vítor Vaqueiro.

– Intervención do Alcalde de Santiago de Compostela, ou persoa en quen delegue.

Cumprindo os protocolos relacionados coa excepcional situación sanitaria que estamos vivindo, no acto que terá lugar no interior do Concello só poderán estar presentes 12 persoas, a expensas de posíbeis modificacións das medidas existentes en cada momento en canto á saúde pública.

Dadas as actuais circunstancias derivadas da situación sanitaria provocada pola Covid-19, suspéndese o tradicional xantar de confraternidade.

*Información achegada desde a Secretaría Técnica da AELG.

Doazón do Museo de Monterroso ao IEU e ao Concello

D. Carlos Méndez, fundador do Museo Parroquial de Monterroso, e Francisco Pardo, director do IEU, asinando o documento de doazón do museo (Xullo 2020)

O sacerdote e historiador D. Carlos Méndez Vázquez, fundador e propietario do Museo Parroquial de Monterroso doou o seu museo ao Instituto de Estudos Ulloáns (IEU) e ao Concello, coa condición de que as pezas da súa extensa colección pasen a ser propiedade do Concello de Monterroso e a xestión do futuro museo sexa realizada en exclusividade polo Instituto de Estudos Ulloáns.

A colección está formada por pezas de grande interese histórico (muíños prerromanos, verracos, ídolos, tégulas, pezas de tear romano, ventás visigóticas, capiteis románicos…) que D. Carlos Méndez  recolleu e catalogou durante décadas, algunhas encontradas ou mercadas polo historiador, e outras doadas polos veciños de Monterroso  ou cedidas en depósito. A tipoloxía das pezas é moi variada, abrangan restos históricos de diferentes épocas,  e de moi diferentes temas (culinario, espiritual, festivo, artístico, documental).

Como herdeiros deste prezado legado, o IEU e o concello de Monterroso proxectan a creación dun gran complexo museístico integrado por un Centro de Interpretación da Feira, o Museo Carlos Méndez (arqueoloxía, historia e etnografía), unha Aula-taller de restauración, a biblioteca, o arquivo e unha sala de usos multíplices, agrupados todos eles baixo a denominación xeral de Museo de Monterroso.

O Museo de Monterroso será instalado no edificio do antigo centro de saúde da vila (actual sede do IEU), ocupando as tres plantas do mesmo. Na planta baixa instalarase a Aula-Taller de restauración e a sala de actos e exposicións, e na planta segunda a biblioteca especializada e o arquivo. Na planta primeira localizaranse o Centro de Interpretación da Feira, con tres grandes salas (“O enclave da feira”, “Os feirante”s e “As mercadorías”) e o Museo Carlos Méndez, con outras tres salas (“Etnografía comarcal”, “Dende as orixes de Monterroso ata a década dos 20 do século pasado”, “O último século da historia monterrosina”).

O Instituto de Estudos Ulloáns será o responsable da xestión, motivo polo que a Xunta de Goberno creou a Comisión de Xestión do Museo de Monterroso, integrada por unha directiva (directora, dous vicedirectores e conservador), unha ampla representación do concello de Monterroso e unha serie de vogais socios do IEU e de asesores externos. A directora do Museo do Monterroso será a historiadora María José Gómez Alvite e os vicedirectores serán o presidente e vicepresidente do IEU, Francisco Pardo Teijeiro e Jesús Otero Calvo.  A D. Carlos Méndez se lle concederá a distinción de director honorario.

 Trátase dun ambicioso proxecto museístico interactivo, dirixido ao público en xeral pero tamén a investigadores e estudosos das feiras e da historia da comarca da Ulloa. Un complexo museístico que pretende ser un referente de dinamización cultural da Galicia rural.

Xerardo Quintiá Pérez gaña o XLVI Premio de Poesía do Certame Literario de Vilalba

O escritor Xerardo Quintiá Pérez coa “Obra inacabada de Dosinda Christensen (I)” resultou gañador do XLVI Premio de Poesía do Certame Literario de Vilalba.
Xerardo Quintiá, natural de Friol, é poeta, narrador e autor de literatura xuvenil e infantil. En 1984 trasládase a Lugo para realizar estudos de Bacharelato, cidade na que reside desde entón. Está casado, ten un fillo e traballa como axente comercial. Publicou os seus primeiros traballos na sección cultural “Táboa Redonda” de El Progreso (1988) e colaborou en revistas como Dorna ou Xistral. Da man da editorial Galaxia, ven a luz “Unha soa man e otros intres” (1999) e, no ano 2001, “Un rabaño de ovellas brancas”. En Franka Editora publica “O libro dos aparecidos” (2002). No ano 2012 volve á narrativa para adultos
e de novo en Galaxia publica “Hotel Cidade Sur”, traducido ao castelán por Pulp Books. En maio do 2015 publica, en Galaxia, “O Viaxeiro Radical”, traducida ao catalán por Editorial Gregal (2018). No eido da literatura infantil, na colección ARBORE da Editorial Galaxia, publica “A verdadeira historia do burro Feldespato” (2002) e, en 2007, na mesma colección edítase “Ke-Tumba Ke-Tamba”, finalista do premio Raíña Lupa.
Para primeiros lectores escribiu “Titiritesa”, publicado por OQO Editora (2007) e traducido ás principais linguas europeas. Como poeta ten publicado “ailalalalelo de auga”, Do4 Edicións (2001); “Poesía en Ruta”, premio Fermín Bouza Brey, Espiral Maior 2007; “FORNELOS & FORNELOS, primeira fundación”, premio Fiz Vergara Vilariño, Espiral Maior (2011). FORNELOS & FORNELOS, segunda fundación, premio Eusebio Lourenzo Baleiron, Sotelo Branco (2016); “FORNELOS & FORNELOS, terceira
fundación”, premio Lueiro Rey, Xerais (2019).

Adxúntase a acta co fallo emitido polo xurado do XLVIPremio de Poesía do Certame Literario de Vilalba.

*Información facilitada pola área de Comunicación do Concello de Vilalba.

*Imaxe da noticia recollida do Facebook do propio Xerardo Quintiá.

A FERA, por Miguel Díaz

A FERA

Miguel Díaz

Territorio hostil.

Constrúome na rebeldía

e tamén no enfrontamento.

Son o branco perfecto

de balas indiferentes

e a fera inadaptada

ouveando no monte…

Son a póla que esgaza

dun carballo ignorado

e teimuda voz que discrepa

entre a riada insensible…

Son viaxante que camiña

en dirección prohibida…

Son o que non entende

a persistencia do odio

e o corazón que se abafa

cando a rabia se revela…

Son o estraño desnortado

na terra da vosa palabra

e arrímome ó silencio

da diferenza desprezada…

Son a pel incomprendida

e a man que agarda…

Son o verso que non les

e o libro que se esconde

porque existo nun poema

construído con feridas…