DÍAS DE LIXO, por Miguel Díaz

DÍAS DE LIXO

Miguel Díaz

Patriotas que apestan a rancio,

paus de golf, segunda residencia…

Bandeiras, Paquito, casposos,

aguias cosidas, iates á espera…

Desprezo do esforzo e dos mortos,

orneos fascistas na inconsciencia…

Rúas da falacia e do patetismo,

egoísmo de miserables ovellas…

Máis espécimes que neuronas

esixindo, a brados, liberdade

Barrio rico, xente pobre,

berrega insensible a necidade…

Rotondas cunha única dirección

á ultradereita desprezable,

xunta de escoura privilexiada,

altofalantes da barbarie…

Trapos da tea das elites,

infame festa da inhumanidade,

podremia dun tempo escuro,

pobres virus da mesquindade…

Preto de 100 obras presentadas ao Certame de Microrrelatos DÍA DO LIBRO 2020, organizado polo Concello de Vilalba e Culturalia GZ

Case un cento de obras se presentaron ao Certame de Microrrelatos DÍA DO LIBRO 2020, que organiza o Concello de Vilalba e Culturalia GZ. As entidades convocantes aplauden a elevada participación, sobre todo na categoría de adultos.

O fallo do xurado, así como a identidade das persoas que o compoñen, farase público aló polo 19 de xuño. A entrega de premios realizarase nunha data que aínda está por decidir, dada a situación de emerxencia sanitaria por causa do COVID19.

Obras gañadoras dos Premios da Gala do Libro Galego 2020

O xurado da quinta edición dos premios da Gala do Libro Galego deu a coñecer as obras e autoras gañadoras nesta convocatoria que, pola situación causada pola pandemia do COVID19, viuse na obriga de ser adiada ao outono. A Gala do Libro Galego tiña prevista a súa celebración tal día coma hoxe, 9 de maio de 2020, e a organización do evento, decidiu manter as deliberacións do xurado e dar a coñecer os libros gañadores na mesma data e adiar a gala para o outono vindeiro en canto as condicións o permitan. Os premios de honra que anualmente se conceden tamén na Gala do Libro Galego adiáronse ata a celebración deste acto.

A Gala está organizada pola Asociación Galega de Editoras (AGE), Asociación de Escritores e Escritoras en Lingua Galega (AELG), e a Federación de Librarías de Galicia (FLG) e conta coa axuda de CEDRO (Centro Español de Derechos Reprográficos), Xunta de Galicia, Deputación da Coruña e o Concello de Santiago.

O xurado desta quinta edición estivo formado pola xornalista e poeta Ana Romaní, a profesora Anxos Rial, o escritor Antón Riveiro Coello, a poeta Estíbaliz Espinosa, o editor e profesor Manuel Bragado, a tradutora María Alonso Seisdedos e o crítico literario e escritor Ramón Nicolás. O xurado celebrou unha reunión telemática para debater sobre as propostas finalistas nas quince categorías (que podedes consultar aquí) e que corresponden con obra publicada durante o ano 2019.

Os membros do xurado sinalaron as dificultades de elección entre un conxunto de obras de altísima calidade o que, segundo explicaron, quere dicir que estamos nun bo momento da creación literaria e do mundo do libro galego neste momento particularmente difícil que atravesa a sociedade.

Aquí tendes o listado completo das gañadoras e gañadores:

PREMIOS A OBRAS EDITADAS EN 2019

Ensaio e investigación

– Dentro da literatura, de Suso de Toro (Edicións Xerais de Galicia)

Divulgación

– A que cheiran as cores? A esperada guía para coñecer o cerebro, de Juan Casto Rivadulla Fernández (Editorial Galaxia)

Narrativa

– Seique (2ª ed. ampliada), de Susana Sanches Arins (Através Editora)

Infantil

– A tartaruga Amodovou, de Paula Carballeira (Oqueleo)

Xuvenil

– Os corpos invisibles, de Emma Pedreira (Edicións Xerais de Galicia)

Libro ilustrado

– Irmá paxaro, de Tamara Andrés, ilustracións de María Montes (Cuarto de Inverno)

Libro de banda deseñada

– A chaira, de Antonio Seijas (Alita Cómics Editorial)

Iniciativa bibliográfica

– Castelao. Construtor da nación. Tomo I. 1886-1930, de Miguel Anxo Seixas Seoane (Editorial Galaxia/Consorcio de Santiago)

Tradución

– Frankenstein ou o Prometeo moderno, de Mary Shelley/Tradución de Samuel Solleiro (Aira Editora)

Poesía

– Feliz Idade, de Olga Novo (Kalandraka Editora)

Teatro

– Citizen, do Grupo Chévere (Kalandraka Editora)

Libro mellor editado

– Fosforescencias, de Lupe Gómez/Ilustracións de Anxo Pastor (Alvarellos Editora)

PREMIOS A TRAXECTORIAS

Iniciativa cultural ou fomento da lectura

– Libraría Chan da Pólvora

Proxecto literario na rede

– Kalandraka TV

Xornalismo cultural

– María Yáñez

MONDOÑEDO é POESÍA (virtual) 2020. MONDOÑEDO é… LUZ

MONDOÑEDO é POESÍA (virtual) 2020

MONDOÑEDO é… LUZ

1 de maio, 16.00h.: https://www.facebook.com/mondonedoe/

A sétima edición do recital poético-musical Mondoñedo é poesía vai ser, ten que ser por forza, virtual. Será como sempre foi, o 1 de maio, Día das Quendas, mais desta as rúas, prazas e auditorios mindonienses teremos que imaxinalos, cadaquén acomodado alí onde se confinen as nosas vidas pero coa certeza de que os versos e as músicas que nos van ofrecer máis de dúas ducias de poetas veñen repositivados de alivio e boa saúde.

Nunca imaxinamos un recital nun escenario infectado de todas as ausencias, nunca que se lles negase aos versos, como en tantas ocasións nas edicións pasadas, o aplauso entusiasta dunha audiencia fiel e numerosa á que lle estaremos por sempre agradecidos. Poden estar seguros que ningún virus, nin este Covid-19 nin outro capaz de enfermar o mundo, poderá matar a poesía.

MONDOÑEDO é… LUZ

Esta edición vai dedicada a Luz Pozo Garza, in memoriam

Luz Pozo Garza quixera estar e estivo dalgunha maneira no Mondoñedo é poesía 2015. Daquela, dous días antes da data, unha circuntancia persoal impediullo. Agora, tamén en vésperas como en 2015, un contratempo acontecido o pasado día 20 de abril quixo interpoñerse e negarlle a Luz Pozo a posibilidade de acompañarnos.

Desta, equivocouse o deus do destino. Luz, que é e sempre será poesía, vai estar na nosa memoría, vai ser a Luz que ilumine intensamente esta edición tan extraña e insospeitada.

MONDOÑEDO É POESÍA (VIRTUAL) 2020

Neste edición interveñen 26 creadoras e creadores, poetas e músicos como Iolanda Aldrei, Chus Amieiro, Caxigueiro, Marta Dacosta, Alicia Fernández, Miriam Ferradáns, Antonio García Teijeiro, Montserrat González, Mª Xosé Lamas, Martiño Maseda, Rebeca Maseda, Juan Carlos Mestre, César Morán, Carlos Negro, Olga Novo, Toño Núñez, Lois Pérez, Henrique Rabuñal, Baldo Ramos, Manuel Rivas, Iván Siso Calvo, Lorena Souto, Paloma Suanzes, Eva Veiga, Eduard Velasco e Ana Vila Portomeñe.

AGRADECEMENTOS

Acompañarán as lecturas dos poemas e interpretacións musicais, imaxes coa lembranza dos carteis e publicacións que ilustraron as seis edicións anteriores en agraecemento aos colaboradores gráficos Alicia Puchades, Caxigueiro, Nachok, Ernesto González Torterolo, Xosé Vizoso, Antón Caxoto e J. Pedro Gómez.

E tamén servirá de agradecemento ao profesorado e alumnado da escola Municipal de Música ‘O Pallarego’, ao do CEIP Álvaro Cunqueiro e ao do IES San Rosendo que sempre se volcaron no deseño e montaxe dos marabillosos ‘tendais de poesía’, a Luz Galocha, Mª Paz Rodríguez Silva e Francisco Piñeiro, pola entrega amiga e xenerosa, á Asociación As San Lucas e aos máis de cen nomes de homes e mulleres que nos regalaron o seu talento nestas 7 edicións de Mondoñedo é poesía, que este ano, quere ser, vai ser, será por sempre, sobre todo, LUZ.

Data de emisión: venres, 1 de maio, ás 16:00h.

Canlehttps://www.facebook.com/mondonedoe/

Colectivo Mondoñedo É…

Mondoñedo, 30 de abril de 2020

Convocatoria do IV PREMIO AGUSTÍN FERNÁNDEZ PAZ DE LITERATURA INFANTIL E XUVENIL POLA IGUALDADE

O Insituto de Estudos Chairegos, o Concello de Vilalba e Edicións Xerais de Galicia convocan o IV Premio AGUSTÍN
FERNÁNDEZ PAZ de narrativa infantil e xuvenil pola igualdade
, de
acordo ás seguintes


BASES
Primeira.
Poderán participar todas as persoas de calquera nacionalidade e idade que
presenten narracións inéditas en lingua galega, dirixidas ao público infantil e xuvenil, cunha temática vencellada ao compromiso pola igualdade de
xénero, raza, nacionalidade…
Segunda.
Establécese un premio único e indivisible, dotado con 3.000 euros.
Esta cantidade está suxeita ás retencións legais que lle sexan aplicables
segundo a lexislación vixente.
Terceira.
A obra premiada será publicada por Edicións Xerais de Galicia, que se reserva os dereitos de edición da obra premiada nos 1.500 primeiros exemplares.
Entregaránselle ao/á gañador/a 30 exemplares.
Cuarta.
A obra terá unha extensión libre e presentarase encadernada, por
cuadriplicado, en papel impreso polas dúas caras, tamaño DIN A4.
Presentarase baixo o sistema de plica, polo que se enviará cun sobre á parte; no exterior do sobre figurará só o lema e no interior incluirase o título da obra, o lema, unha copia do NIF do/a autor/a, o enderezo, teléfono de contacto e correo electrónico.
Quinta.
O prazo de presentación de orixinais comezará o 23 de abril de 2020, Día
Internacional do Libro e prolongarase até o día 12 de xullo de 2020 (cuarto
cabodano de Agustín Fernández Paz).
Sexta.
O xurado estará formado por tres persoas de recoñecido prestixio cultural.
Emitirá o ditame, que será inapelable, na última semana do mes de outubro
de 2020.
O xurado poderá declarar o premio deserto.
Sétima.
A entrega do premio terá lugar nun acto do que se dará conta
oportunamente.
Oitava.
Os orixinais remitiranse a:
IV Premio AGUSTÍN FERNÁNDEZ PAZ de narrativa infantil e xuvenil pola igualdade
INSTITUTO DE ESTUDOS CHAIREGOS
Praza de Suso Gayoso, 1 (Casa da Cultura)
Apartado de Correos , nº 39
27800 Vilalba (Lugo)

Novena.
Os orixinais non premiados poderán recollelos os/as respectivos/as autores/as no local do Instituto de Estudos Chairegos (Casa da Cultura de Vilalba) durante un período máximo dun mes despois do ditame do premio. Os que non se recollan nese prazo serán destruídos.
Décima.
A participación nesta convocatoria supón a total aceptación destas bases.

CONVOCATORIA DO IV PREMIO AGUSTÍN FERNÁNDEZ PAZ DE NARRATIVA INFANTIL E XUVENIL POLA IGUALDADE

ENTREGA DE TRABALLOS, DO 23 DE ABRIL AO 12 DE XULLO DE 2020

Enlace ao díptico e nota informativa da convocatoria de dito certame.